豪語錄
淚之小花 黃紫盈
大狀嗚咽陳詞，可能感動陪審團；歌手攞獎，直頭要谷眼淚；黃紫盈報無綫新聞時梨花帶雨，就冇咗份工。
如果說有失專業，難道主播比律師更專業？如果說表演是藝人天職，難道攞獎都係做戲咁做？不過唔重要了，反正黃紫盈變埋藝人。
她不承認自己是藝人，叫主持，轉職吃喝玩樂節目主持。「飲食是資訊，旅遊是資訊，我仍算新聞工作者。」即係楊崢、 May姐都算？
黃紫盈也不承認因哭失業。「是那件事之後，多了工作機會搵我，我喜歡新嘗試。」
於是開始懷疑：伊人因禍得福，根本早在計算之內？
Connie這天沒哭，笑得厲害，自嘲腿粗呵呵呵，廿六歲女真性情，咁咪好囉。
好學生
Connie是大好青年，讀大埔王肇枝中學，並非貴族名校卻以勤力淳樸著稱，獎勵計劃的金章得主，入 U直頭校長推薦。中大傳理系盛產這種女孩。
「那年收生成績直逼醫學院，系內老師也笑我們傻，賺不到錢嘛，印刷傳媒還開始式微，少點熱誠不會報讀。」
印刷傳媒之式微，筆者當然清楚；但擺在她們（係只限女生）面前多了條康莊捷徑——做新聞之花。
黃紫盈說：「讀書時在 TVB實習過，到畢業返去求職，對方話：『記者無空缺了，試不試主播？』」
即係，文員唔請喇，經理你做唔做？
「又唔可以咁講。我知道，以前做主播要具備多年外勤採訪經驗；後來形勢變化，收費電視廿四小時，無綫又搞互動新聞台，年輕臉孔需求大增，同學們笑言羨慕劇集《新聞女郎》，咁我又未睇過。我還是喜歡由記者做起，經驗好重要，（許）方輝是活字典，哪條公路發生意外他即時講出歷史，因為採訪得多，（方）東昇也是。
「但主播並非花瓶，要叻翻譯和應變， 311一周年，即時來了條 NHK片段，連英文都無，好彩我在日本學過日文。」
高才生再記一功。答得得體，面面俱圓，不難明白她上位之快。由於一○年入職便是互動新聞台主播，無得另計出鏡費；但同年起兼任翡翠《六點半新聞》和《天氣報告》，額外收入便可觀了。
誰說傳媒難撈？係揸筆寫字難撈啫。
佳麗們
好，我繼續寫。
相信有新聞之花嗎？
Connie說：「點定義先？好抽象喎。」
好具體嘅，漫畫裡蠟筆小新懶起床，卻依時依候爬起收看靚姐姐報新聞，看得臉紅紅，小新也可以是宅男宅佬，就係咁簡單。
「觀眾有不同喜好，正如鍾意睇伍晃榮報體育。主播明星化其實由有線張宏艷開始。」
新聞熱誠，未吸收足夠採訪經驗前，黃紫盈先要學化妝，衫唔夠靚，跑到 TVB服裝間借衫，耗不少熱誠於此。
「的確很多靚女來見工，先睇五官端正，塊面對唔對稱，把聲好唔好聽；不過之後都考翻譯和筆試。」
美貌與智慧並重，同選港姐有乜分別？
Connie說：「都可以咁講。」
選美多是非，新聞之花亦然。外勤記者之間有戰友 feel，女主播之間呢？
「我和 camera man是戰友。」
有否留意，黃紫盈多數提及男同事？於是我問起周嘉儀——近日緋聞纏身的另一小花。
「嘉儀教我很多嘢，以前一齊做《香港早晨》。戥佢唔抵，主播的私生活不應該被放大報導，即使藝人私生活都唔應該咁。我佩服娛樂記者了解人與人關係的細密，只不過自己少睇娛樂新聞。」
機會來了
更別提另一舊日女同事張文采，至今仍是禁區。一三年六月廿七日，黃紫盈報導關於曼德拉時在鏡頭前眼濕濕，非關哀悼偉人，後來《蘋果日報》揭發，乃因為與張前輩爆發罵戰而感委屈。
黃紫盈這天說：「不作評論了。」
不作評論是， TVB有個規定，新聞部職員禁止接受訪問。其實只限三色台，其他電視機構還熱衷推主播上封面呢。
不覺得不公平嗎？傳媒要講言論自由，但發生在從業員本身，卻有苦唔准講。
「新聞從業員連上街爭取合理薪酬都未試過添。我覺得 OK嘅，人應該慎言。」
咁專業，有被上司怪責失態有失專業嗎？
「我問心無愧，不作評論了。」
直接問，因為此事離職？
「這樣講吧。我一向有很多外面傳媒的同學、朋友，以前人家見我做主播做得咁好，有工作 offer都不會問我， TVB亦不容許任何兼差；到發生了事，便多咗人嚟問，離職去闖闖，我亦想作新嘗試，做司儀、做 DJ，幫有線幫 now主持飲食節目，原來都是自己喜歡的。」
算因禍得福？
「我不會製造機會，但我懂得把握機會。」
桌底新天地
黃紫盈已不在三色台，何必仍守著三色巨塔清規戒律？你有慎言的自由，但哪有沉默寡言的 DJ呢？
「做 DJ，我希望每句說話措辭準確，但先在腦裡轉一兩秒，便構（ TVB教落要唸成『救』）成 dead air了。現在反過來被記者圍訪時，我通常笑笑口：『冇嘢答喇。』記者又會笑笑口無事，是可以慢慢適應的。朋友話我主持輕鬆節目仍太一本正經太 informative。」
知識分子的頭巾氣，倒乾脆做藝人好了。
於是我重新端詳她自嘲腿粗的照片，開眼界了，主播桌前正襟危坐，的確少見穿短褲，甚至少見下半身。
今後期待她娛樂無窮的下半生。
輕重
黃紫盈用腳輕輕撥開布景裡塞滿紙巾的廢紙簍，敏感的她洞察其象徵意義。
本刊攝影師說：「設想你在慘案現場淚流不止嘛。」黃紫盈說：「新聞專業不應注入私人感情，我採訪未喊過。」
講得多麼客觀。有數得計，短短三年，大部分時間坐堂，她接觸過幾許慘案呢？
講得多理性。有淚不輕彈，神聖工作紀律嚴明，到頭來卻為辦公室意氣之爭而破戒，人生夠無奈。
時值六四廿五周年，我懷念因真情流露而「被消失」的 CCTV報導員，已經無關專業/造作/搏出位，那叫道德勇氣。
|
鍾意就快D Share啦！
|
|
|