鬼節又到，潘紹聰帶記者到曹公潭探訪靈界朋友。
香港的猛鬼地點他差不多去勻，但幾乎都沒感應到什麼。
無感應是福，他說，有些聽眾一日到黑見到嘢，好困擾的。
非常人語
講鬼王 潘紹聰
農曆七月，鬼門關大開。但香港如今群魔亂舞，鬼又有什麼可怕？潘紹聰作為「職業鬼古佬」，更加不會被嚇倒。雖然「鬼王」這個「朵」是別人冠上的，「唔會叫自己做鬼王啩?!咁𤓓。」其實這銜頭他擔得起。在網台主持靈異節目《恐怖在線》，收月費，保守估計月入近十五萬。行家說他是最賺錢的網台主持，他一笑推卻，「我唔敢咁講，唔知人哋賺幾多㗎嘛。」重點是他不靠廣告商、老闆或神秘人出糧，聽眾就是金主。
晚晚講鬼古，也不是完全無懼。去年蕭若元突然「心灰意冷」關掉香港人網，《恐怖在線》陪葬；他決定賭一鋪，自立門戶，自負盈虧，「平均每集一蚊多啲，聽成個半鐘，都俾唔到？」但香港人有幾孤寒，他心中沒有底，「輸給自己的決定，死也甘心。」
一年過去，聽眾由人網時代的十幾萬，跌剩兩成，卻全是鐵了心的粉絲，甘願付費。他與聽眾有長年累月的感情，成功模式或許難以複製，只望大家培養到這意識，「你鍾意睇、鍾意聽，你要俾錢去買，如果唔係件事唔會延續到。」世上原本沒有免費午餐。
鬼王講鬼，眨眼十三年。一星期講足五晚。遇事離港，必先錄定存貨，只有幾次找替工幫手，「依家收咗人錢，更加行唔開。」因為要聽眾肯掏腰包，養成習慣最重要，「佢聽完你個節目，就瞓覺喇。無聽過你呢，會覺得嗰日係未完嘅。」每晚聽人談靈述異，竟是某些人的小確幸。潘紹聰自己卻從沒醉心過鬼神之說，他喜歡音樂，中學已夢想做 DJ；大學畢業加入港台報交通，後來得償所願，轉到新城主持通宵音樂節目《是夜不是夜》，對上一個時段是蔡康年的《恐怖熱線》。千禧年，蔡涉嫌打女友施念慈，上了幾日娛樂頭條，最終離職。新城要潘接手，「諗住都係一個鐘，聽吓電話啫，咪頂埋囉。」
收聽率甚佳，但節目氣氛驚嚇，廣告商卻步，人氣無法轉化為收益，《恐怖熱線》逐漸不受重視，時段被愈推愈遲；最後去到凌晨三點，連死忠 fans都不敵睡魔，「真係俾鬼聽！」○八年過檔蕭若元的網台「香港人網」，改稱《恐怖在線》。開始時約有七萬聽眾，五年後，每集平均下載人次升至十一、二萬，高峰期達廿萬，是人網之冠。
「如果唔係人網摺埋，我都唔會諗收費。但無咗個節目，大家覺得『快啲自己搞啦，我哋唔可以無得聽呀！』之後我搞收費，就好似順理成章。」沒多久，蕭若元開辦新網台「謎米香港」，召他回巢。但他決心自負盈虧，借用「謎米」的錄音室和助手，月費收入要分大約四成給對方。節目名照舊是《恐怖在線》，直播免費，聲音重溫月費廿五元，視像重溫三十五元。「我都想試吓自己嘅實力，係咪俾錢都有人聽？」去年五月首播，首月已有六千人掏腰包。三個月後，收入有增無減，便知陣腳站穩。
免費餐
香港人錙銖必較， WhatsApp收八蚊都吵翻天，潘紹聰倒是沒聽到什麼怨言，「可能聽眾都見到，我哋呢行，突然間換老細，你嘅節目時間又要轉，冇咗你又得，好無助㗎。蕭生而家照玩啫，你唔知佢老人家幾時唔再玩㗎嘛。」這次他決心要獨立，「除非我自己唔做，如果唔係，我一世都可以做十一點半到一點，無人阻止到我。」
但聽眾對價格還是敏感的。今年五月，潘紹聰自立門戶一周年，月費減五蚊，大酬賓，即時多了一批新客。目前每晚聽免費直播約萬多人，「訂戶實數唔講啦，講咗你就計到，未夠一萬嘅。」就當八千，平均月費每位三十，他佔六成，月入也接近十五萬，傳統電台主持有這收入的也極少。對比 D100，大班曾嘆謂：「五十萬聽眾，只有萬二人肯俾錢。」潘紹聰聽眾的付費比率相當高。至於廣告就一直寥寥，他笑稱「希望寶福山睇得起我」：「其實唔會㗎喇，殯儀嘢使乜落廣告，你一定要搵佢㗎啦。我唔可以依靠廣告，希望收入來自聽眾。」
他不鼓勵聽眾預繳，以免責任太重。「我叫佢哋最多俾三個月就算。」若覺得唔啱聽、或懶得入數，下個月就可以離棄他。要留住聽眾，內容就要加碼。過去《恐怖在線》有固定嘉賓，每日是誰，都編排定。現在盡量搵新人，每晚節目開波，聽眾才知人選。除了「專家」，也多了各行各業的普通人來談經歷，像地產代理上節目，訴說凶宅鬧鬼之餘，也會談及市道和睇樓客百態；最近又有懲教人員講述監獄裡的靈異事件，原來出獄前是囚犯自殺高危期，因為監禁多年，有些囚犯早已妻離子散、擔心出獄後無法融入社會。聽眾對《恐怖在線》着迷，不只為了鬼故事，也因為從中知道更多世態與人情。
顏聯武
這些年來，各電台和電視台的靈異節目甚多，卻只有潘紹聰長做長有。論主持風格，他堪稱靈異界顏聯武，敢對聽眾當頭棒喝。有人 phone in亂噏作大，一定俾佢窒；自己嚇自己的，他不會陪你癲。「你做晒所有嘢嚟呃我的話，我實俾你呃到嘅。但如果我聽到你講嘢唔合邏輯，一定會質疑。」最離譜一次，有聽眾自稱身在露台，有隻怪獸衝過來，要搶他的電話。「如果佢話係鬼呢，咁件事可能都合理，但佢用『怪獸』囉……我唯有話，你個電話都幾正喎，怪獸都嚟搶，然後就 cut咗佢線。」不過，撞鬼始終是個人的經歷和感受，只要故事不太犯駁，他都不會打斷，「我唔能夠話『你嘅感受係錯嘅』，我只能夠講『哇咁誇？』」
潘紹聰聲靚，不過目露兇光，相貌有煞氣。「成日有師傅問我，『係咪學過法？』即係神功呀、茅山嗰啲。可能佢 feel到我磁場有啲唔一樣。但我乜都無學，唔鍾意呢啲嘢。」他自言對鬼神並不特別敏感。猛鬼熱點像摩星嶺、黃竹洋、南固臺，甚至台北君悅酒店，他都去過，「但無乜感應。」他信佛，信有鬼神存在，所以講鬼也要有職業道德。免得靈界朋友來找晦氣，亦避免沾上網絡世界以訛傳訛的陋習。「靈界係要 respect嘅，唔好因為要交貨，就不停喺度作古仔。」
最經典的「作古仔」事件，要算元朗屏山的達德學校。傳說曾有女校長穿紅衣在校內吊頸自殺，從此學校便有長髮女鬼出沒云云；潘紹聰問過在屏山長大的鄧達智、問過達德從前的老師、校友，連警察都問了，根本從沒發生自殺事件，校內也沒死過人。「你話鬧鬼，可能因為周邊真係好多山墳，唔出奇嘅，但唔係因為呢件事囉。」鎖羅盤傳說村民一夜間消失，羅盤到此又會失靈，但他問過活躍那一帶的行山客，其實沒這回事，那只是普通不過的鄉村衰落、村民外遷，早年曾遊遍新界的掌故專家朱維德就說，每年太平清醮時，村民還會回去慶祝。大埔運頭塘的由來就更離譜，謠傳日軍把人斬頭後把屍首運到這裡的亂葬崗埋掉，所以是「運頭」，實情日軍根本沒到那一帶活動，而且運頭塘的名字清朝已經出現。只要翻翻歷史，就知是子虛烏有。
除了求教專家，潘自己也會親自搜證。去年有聽眾報料，有段短片拍得數碼港有架無人駕駛的小巴，撞到路壆及其他車輛，網友議論紛紛。有些說短片沒拍到司機位，根本是惡搞；也有目擊者打電話上節目，確認是無人駕駛。潘親往那小巴站打聽。那裡的司機說，當天是一位過世同行的頭七，他們都見到小巴自己開動，事後已打齋超度。
不過，一講到 UFO和陰謀論，潘就耍手擰頭，「鬼古我某程度證實到，嗰個係凶宅，死咗咁多人喎，所以鬧鬼，咁好似好合邏輯。但突然間天空上面有隻嘢飛過，可以係太空垃圾、國家偵察機，都得㗎，你永遠搵唔到答案，咁講唔到落去㗎喎。」地球事都未解構完，無謂說外星。
有借有還
有人批評潘紹聰主持節目的態度太抽離，他承認是刻意與「靈異嘢」保持距離，以免負能量積聚。每日聽大量鬼古，盡量聽過就忘記。獨對一件事耿耿於懷。幾年前，有位聽眾叫陶夫，是個靈異發燒友，不時在節目裡分享經驗、提供資料。有次他帶潘紹聰到銅鑼灣一間酒店的後梯，不知是誰在那裡供奉了一個「無主孤魂」牌，氣氛陰森。事後他與陶夫失了聯絡。一年多後才輾轉得悉，陶夫經常獨自返去那後梯流連，最後自殺收場。潘此後更緊記，敬鬼神而遠之。
他謹慎，符咒和佛牌不敢亂戴。因為從前不少師傅送符給他，他就隨手儲了一堆在銀包。大約八年前，他拜訪一位女奇人，對方一見面就說他銀包裡有異物，連符的樣子都能準確描述，潘大為詫異，「佢話邊幾張符唔好，會攞咗我啲魂。」現時就只帶一塊泰國高僧相贈的佛牌隨身。
又有一次組團去大嶼山靈探，有團友在荒廢的骨灰場裡喃喃許願，求考試順利，未幾就變成「懵仔」般，呆呆滯滯，沒反應，在場的師傅大力打他耳光也不知痛，師傅說他是魂魄被盜，事後作法兩三日才替他招齊魂魄。「唔好同靈界有交易。佢知你有所求，就會向你攞嘢。」人間的事，人間解決。潘紹聰的免撞鬼大法好簡單，「曬太陽，做多啲運動。」思想要正面，「靈異節目係長青的。因為就算俾鬼壓，每個人俾鬼壓的經歷都唔一樣；酒店鬧鬼，每個人去都有唔同感應。所以呢個話題不死，你永遠鍾意聽。」他豪言，就算要講足一世鬼，都肯定有貨。
|
鍾意就快D Share啦！
|
|
|
