探熱針
老細下旨 勒戒瘟仔 千語 BB焗做打女
自從被林峯私有化後，有傳吳千語為貼身拑住男友，只肯出席工時短的品牌活動，困身的電影工作可免則免。
瘟仔冇「錢」途，有指吳千語公司啟動 BB復工，安排她拍動作片又吊威吔又要瞓地，做打女捱完一輪， BB即被男友接走出埠歎世界，一切照舊！
打到瘦晒
被黃百鳴睇中，開戲捧做女主角的吳千語，得林峯「瘋愛」後，工作全面放軟手腳，專心瘟仔。
有指公司希望 BB遠離「拑住男友 shopping」新聞，於是展開洗底計劃，下令要唔願做的千語 BB連接兩套電影，包括和劉美君合作的《王家欣》及要她打餐飽做打女的《青春鬥》。
有約在身，千語 BB再不情願，也要頂硬上。
日前， BB跟對手林德信在東莞埋位拍《青春鬥》，吊威吔拍動作場面，有林峯呵住，享受慣的她連吊幾日威吔，仲要吊住大嗌，搞到聲沙晒都冇得抖，再嚟倒地拖行場場動作，不用一星期， BB已經瘦了五磅。
「打到好攰，根本冇胃口食嘢。雖然我唔係第一次吊威吔，但呢部戲好多動作，埋位前又要練習同試位，普通一個動作，都拍十幾 take，真係好辛苦。」吳千語說。
東莞攞人
陰功豬，林峯肉赤死！
開工拍戲，千語 BB封口不提男友，但據了解，為呵番女友，在北京做完宣傳的林峯，日前已飛撲落東莞，接 BB返香港，親自呵番。
上週四（八月二十一日），千語 BB出席電影《王家欣》煞科宴，被問到會否同男友出埠時，接公司 order不再將戀事掛口邊的她，問極唔講，但翌日，便與林峯一同現身機場，出埠歎世界。
拍拖密過開工
「峯語戀」年多，因二人經常黐到實，拍拖見報率近乎成為他們的月事！
|
鍾意就快D Share啦！
|
|
|
