[忽然1周 1000] 珍妮花懶理第 2次慾照風暴 瘟仔大過天 珍妮花,BKD_S,MW,

歐洋風

珍妮花懶理第 2次慾照風暴　瘟仔大過天

沉寂 3個星期嘅荷里活慾照風波，沒完沒了。上周六（ 20日），黑客再度喺 4chan、 reddit論壇發動攻勢，公開新一批女星慾照，當中有「舊雨」亦有「新知」，牽涉人數大概 15位。

上次慘遭睇蝕嘅珍妮花羅倫絲，今次亦不幸再度中招。唔開心梗有啦，不過點已露、水已笠，連警都報埋，事已至此，仲可以做咩呢？倒不如收拾心情，陪新仔 Chris Martin呢度去嗰度去，咁咪仲好！

自 9月初發生第一次艷照風波， FBI即接報調查。事件沉寂 3個禮拜，原以為告一段落，誰不知黑客再度出手，分別於周六（ 20日）、周日（ 21日）發布新一輪慾照。

汲取上一次教訓，兩大涉事論壇 4chan、 reddit不敢怠慢，逢裸照即 delete。不過你快時網民更加手快， save完重新 upload上網，結果一傳十、十傳百，依然阻止唔到呢場色慾風暴。

24歲嘅珍妮花手持鮮花行先，男友 Chris Martin則笑笑口跟住女友身後，感覺幾 sweet。

當日珍妮花着住灰色裙，腳踏 Elyse Walker布鞋。孭住 Elizabeth and James手袋，打扮隨便卻見心思。女仔識打扮即係冇事啦。

珍妮花及新歡 Chris Martin參加完音樂節後，搭私人飛機由賭城飛返洛杉磯。兩人仲好親民，笑晒口同機長嗲咗一輪。

愛情滋潤零舍唔同

自裸照風暴發生後，珍妮花未有公開露面。直至上周五（ 19日） iHeartRadio音樂節，佢露臍上陣，低調撐男友。不過兩人打死都唔肯合照，只係喺後台擦身而過。

身為受害者之一嘅珍妮花羅倫絲（ Jennifer Lawrence），兩次榜上有名，可謂黑仔到痹。幸好有新歡 Chris Martin背後支持，珍妮花先捱得過今次難關。

據知兩口子於 6月撻着，第一次風暴發生時，有傳 Chris Martin嬲到掟煲走人。事實係點？大家有眼見。上周五（ 19日）舉行嘅 iHeartRadio音樂節，兩人喺鎂光燈之下，表現避忌，但珍妮花做足女友本份，默默喺台下欣賞男友演出。翌日（ 21日）早上，亦即係第二次風暴事發當日，兩人被目睹甜蜜搭私人飛機。只見男嘅如影隨形，女嘅則手持鮮花、笑晒口周圍傾偈，心情明顯靚爆，完全不受慾照影響。啱嘅，戀愛大過天吖嘛。正所謂「認真就輸了」，再對呢啲醜聞咁上心，咁就無謂

黑客真找數

黑客曾公布一份為數 101位女星嘅裸照名單，並矢言會逐一放相上網。估唔到事隔 3個禮拜，黑客竟遵守諾言，找數將一批裸照公開。除咗珍妮花呢位「舊雨」之外，一眾「新知」亦無奈「被加入」，受害女星增加至三十多人。

舊

珍妮花今次嘅裸照，比上次更多花式，更大膽。其中一張腿張開嘅相片，刻意以貓貓遮住，估計幕後黑手有意留一手，等待第三波先發放原圖。

新

《狂野青春》女星雲妮莎夏芝絲曾於 2007、 2009及 2011年被偷裸照放上網，可以話係「裸照老手」。不過在今次風暴，則係首次中招，係新增受害者之一。

新

尊尼特普未婚妻安芭赫德，首次被公開裸照，同時係今次最大受害女星。佢被發布超過 50張照片，其中有佢寫俾未婚夫嘅紙牌自拍裸照，香艷程度爆燈。

新

2011年慘遭黑客公開裸照嘅史嘉莉祖漢遜，再次成為受害者。當年未曝光嘅裸照，今次重見天日。

妙麗高危族？

艷照風暴，搞到成個荷里活風聲鶴唳。有人估計，「妙麗」愛瑪華生會成為下一次目標。事緣早前佢發表嘅兩性平等宣言，被批評虛偽。一名活躍於 4chan嘅匿名網民，更聲言將會上載佢嘅裸照。

另有網站預測，下個受害者有機會係男星。佢哋不記名訪問過幾位男星，個個驚到有得震冇得瞓，不但要求朋友、愛侶 del相，仲頻頻換密碼，以策安全。唉，總之就人人自危

愛瑪因發表兩性平等宣言而被指摘虛偽。有網民仲專登整咗個倒數網站，時間一到就會公開艷照。

鍾意就快D Share啦！

下一篇 》