[壹週刊 1278] 賽果異常 內地造馬騷 洪卓立走音都入圍 洪卓立,M1,

探熱針

賽果異常　內地造馬騷　洪卓立走音都入圍

有鄧紫棋 G.E.M.參加《我是歌手 2》爆紅做辦，令不少香港歌手積極參加內地電視台的唱歌 PK真人騷，包括參加珠江電視台《麥王爭霸》的洪卓立、泳兒、關楚耀及可嵐等。據了解，比賽已內定了四強名單，表現差強人意的洪卓立亦有得留低。另外，參加浙江衞視《中國好聲音》第三季的 Robynn& Kendy、陳樂基及鄧小巧雖然成功入圍，但據知香港代表已全軍覆沒，未能進身決賽。

G.E.M.做辦

不少香港歌手參加內地真人騷，希望可以學 G.E.M.，一夜成名，當中的洪卓立、泳兒、關楚耀及可嵐參加了由廣東電視台珠江頻道聯合廣東電台主辦的《麥王爭霸》。

「呢個節目一一年開始搞，之前係普通市民參賽，今年就跟足《我是歌手 2》搞明星賽，主辦搵咗好多香港歌手參加，為咗感覺上更專業，四位評判舒文、梁榮駿、黃毅成及馮翰銘，都係出名音樂製作人。抄《我是歌手》格式做，希望引起更多人留意。」知情者說。

泳兒的唱功不容置疑，與師弟洪卓立齊齊參加比賽，錄影當天水準依然。

評判之一的舒文是容祖兒的御用監製，與英皇娛樂的關係要好，很容易令人聯想偏幫英皇娛樂旗下歌手。

洪卓立參加《麥王爭霸戰》錄影當晚，在微博上載了現場圖片。

內定四強

月前，有份參賽的香港歌手到廣州進行錄影，表現不錯的可嵐很早階段已被淘汰，反而失準的洪卓立卻攞到高分。

「英皇派泳兒同洪卓立出賽，早已傾好佢哋會入四強，泳兒隨時係冠軍，其中一個評判舒文係容祖兒御用監製，有人好辦事！另一個評判梁榮駿自己隊 Fabel都有份參賽，都係內定四強之一。洪卓立唱到甩嘴走音，但就俾晒位佢講咗段好煽情嘅說話，仲有容祖兒加油片段，最後出奇地高分。至於可嵐同關楚耀其實唱得幾好，不過可嵐冇後台好早就出局，關楚耀有唱片公司撐，都仲可以陪玩，唔使咁快被踢出局。」知情者說。

關楚耀雖然在錄影當晚的表現不錯，但因比賽早已有內定結果，所以他最後亦會被淘汰出局。

肥媽是節目中的明星觀察員，會對參賽者作出客觀的評價。

可嵐唱《讓我跟你走》的水準不俗，可惜因她既沒唱片公司撐也腰的關係，所以很早便被踢出局。

陳奕迅、王菲的御用監製梁榮駿是評判之一，亦是參賽組合 Fabel的經理人，因而有指 Fabel是內定四強之一。

有賺冇蝕

香港二人女子組合 Robynn& Kendy、陳樂基與鄧小巧，入圍第三季《中國好聲音》後，惹來傳媒及網民廣泛討論，可惜在節目第二輪已全軍覆沒，連被指有特權的已故中共元老葉劍英孫女 Robynn都冇得留低。

「其實俾佢哋入圍都係搞噱頭，今年《好聲音》俾 now同步直播，有港星入圍，觀眾易有親切感！但內地參賽者水準始終較高，被 out係意料中事。」一名工作人員說。入圍當贏咗！陳樂基表示自此多了人認識自己和樂隊 Killersoap，因工作機會多了，還可打開內地市場，有賺冇蝕。

Robynn& Kendy

鄧小巧

陳樂基

鍾意就快D Share啦！

下一篇 》