真人騷
還西裝友一個心願 綠葉王梁健平：我想扮女人
做專訪許多年，還是頭一回，遇到藝齡三十多年的藝人，竟然是最近一個月才開始與記者打交道。
是的， 20歲入邵氏，今年 54歲，個樣全香港人都熟悉，大名卻一直沒人關心。直到上個月在韓劇《命中注定我愛你》露了一面，再被英國導演揀中拍短片《三輪車伕》入圍多倫多和康城影展，終於，「梁健平」三個字，開始出現在娛樂版。
今時今日，出名可以很容易，反倒是這種在螢幕前足足生存了三十年卻從沒響過朵的更匪夷所思。我看着梁健平照着鏡子在小心翼翼整理假髮，忍不住問：「等到頭髮都甩晒至出名，覺唔覺得太遲？」
他答得爽快：「咁又點？冇所謂我哋呢啲又唔係要乜嘢。搵到餐晏仔、養大啲細路、兩公婆終老，已經夠成功喇！」
雖然不求成名，不過既然成名，也還是要享受下。
梁健平說，這個月來不停訪問不停見報，對每個初見面的記者索取名片、輸入電話，將來碌下個電話簿提醒自己有過這一頁、與這些人有過一面之緣；從未試過如此有影響力，趁機會帶挈一下其他綠葉，上星期就成功拉埋陳安瑩、鄭家生、郭卓樺、李楓一齊做了個訪問；還有，難得有人肯聽佢支笛，不如還下心願：「我十個角色有九個做西裝友，一年 365日有 360日都着西裝，其實我三十年都冇扮過女人，真係好想扮一次！」
於是乎，我們這天讓他化女妝穿女裝、黐了假睫毛套上高跟鞋，帶他在壹傳媒大樓走了一圈，他標住眼水（雙眼皮膠水假睫毛之過）、拐着腳（一世人第一次着高踭鞋行五層樓），話試過就夠，冇下次！
高潮眨下眼就過
記得自己在客串韓劇前的見報係幾時嗎?
諗下先……好似冇……真係冇。
我覺得好新奇，竟然做了三十年幕前冇同記者打過交道！
係啦，我哋呢啲咪得開鏡拜神見到記者囉，群眾演員嚟啫，去到充撐下場面。最緊要準時到，然後大合照睇住把刀拉到去燒猪條尾，咁就走得。再攞埋啲生果同燒肉俾服裝、化妝，走得大搖大擺。
定係五十幾歲、喺呢行乜都見過，就算一夜成名都睇得化？
又唔係喎，覺得好衝擊，有啲惶恐，媒體朋友咁睇得起自己，何德何能呢？真係最緊要時刻保持住謙卑之心，做人係好容易睇高自己，覺得自己好勁。其實，將你眼中嘅自己拉低多一個半，咁先至差唔多係自己真正 level。
成名後實情有冇增加工作同收入？
咁又冇，唔知未來係點㗎，係等緊開 HKTV套《風雲》囉。
以你經驗，覺得呢個遲來的事業高潮維持得幾耐？
唉，好快熄！後生就話一日可以好多個高潮，人老咗，一個月都未必有一個，就算有，都係好快走嗰隻。過咗之後，我咪又係我，又係喺天台種菜、喺門口洗車、落去西貢買料煲湯、再去茶餐廳食個 lunch。
還記得年輕時的理想嗎？有諗過成功來得咁遲嗎？
小學，我諗過做老師、做牧師。中學，就係電視迷，入到去都係想搵餐飯啫。我記得啱啱入邵氏，每日搭車經過西貢打鼓嶺新村，個心願就係有一日買得起間村屋……個心願後尾結婚前一年俾我達得成。
買咗一棟？
唔係，買得一層啫，住到𠵱家……當年樓價都係幾十萬。我哋呢啲，從來冇諗過做主角、做明星，係想搵到餐晏仔、養大啲細路、兩公婆終老，咁已經夠成功。老實講，可以將興趣變成職業已經好幸運，建築師五十幾歲都要退休啦，係我哋演員老咗都仲可以有戲拍、仲搵到個錢，坦白一句，𠵱家求得一樣，係唔想做到死。
做都要做個有個性嘅西裝友
做咗三十年，次次收到劇本都係西裝友，好悶呢？
係㗎，所以着西裝着到怕，平時過年、去飲，死都要着便服。不過就算每次角色一樣，都可以自己求變啫。
不過變咗冇人睇呢？
人哋唔留意，自己知呀嘛。松哥劉松仁講過，有啲人恃住經驗豐富求其做，呃到對手但呃唔到自己。你係要混飯食，不如留番啲位俾嗰啲有 heart嘅人。我哋啲綠葉係一粒沙，不過可以積沙成塔，都可以出一份力改變娛樂事業。八十年代香港電視好威風，然後輪到日本，𠵱家係韓國，呢啲嘢潮流嚟啫，話唔埋輪流轉又興返香港呢？
肯定唔係個個綠葉都咁有 heart！
梗係唔係，我成日見啲人求求其其。成班兵聽長官訓話，我叉腰佢學我叉腰，我插袋佢又跟我插袋。我同佢講，你可唔可以用下腦自己諗下點做呢？就算係一班兵、一班辦公室職員，都可以各自有個性啫！
你講嘢，會唔會俾人藐？
有人會聽，有啲就扮客氣，哦兩聲走咗去……嗰個人𠵱家都上晒位。
係邊個？
衰嘅無謂講，但好嘅一定要讚。好似（鍾）嘉欣咁，捱到爆瘡又停經。好似林峯，有年我記得佢同時間香港開演唱會，仲叠住大陸一套劇同賀歲電影。有日撞到佢拍電影外景，我問佢辛唔辛苦，佢諗都唔諗就話「唔辛苦」。你哋睇到嘅花旦小生，我全部睇住佢哋由𡃁仔𡃁妹捱起，抵佢哋有今日。做綠葉再辛苦，幾時會夠班主角辛苦？
唔係個個花旦小生都咁好啩？
衰嘅都有。有一次有個同我同齡，但藝齡輩份仲老過我嘅同我講：「點解呀邊個唔理我？我驚佢聽唔到，同佢打咗三次招呼佢都見我唔到喎。」我話梗係啦，嗰個男主角見高拜見低踩，你唔紅就梗係唔會啋你。相由心生，呢啲人就算俾佢紅到都唔會入到屋。我老竇八十幾歲，有一次睇電視都同我講：「呢個男主角唔係正人君子。」我即刻話佢好犀利，呢個人自私自利，呃唔到人。
扮乸型得罪全台乸型
主角被動，綠葉會唔會仲被動？
梗係會，好彩十個有九個角色係西裝友，間中都會有其他角色，我當正呢啲係甜品，開心得好耐。不過有時個甜品係自己爭取返嚟。
你都試過自己爭取角色？
三十年以來試過一次。就係 20年前， 94年拍嘅《圓月彎刀》，古天樂係男主角。第一版嘅《圓月彎刀》我𡃁仔時睇，男主角劉松仁、女主角係趙雅芝。細細個已經好恨做嘅戲，有日俾我知無綫要重拍。松哥、趙雅芝嘅角色我唔使旨意，我叫個監製俾個「啞僕」個角色我。嘩，唔使講嘢幾大挑戰。後尾劇本出咗嚟，發達喇！真係益我喎……不過打開劇本，點解啞僕有對白嘅？原來新版改咗劇本……我頂！
咁你咪好嬲？
嬲咩？多謝人都嚟唔遲，咁好俾戲我做喎！不過有年拍《怒海孤鴻》（ 91年）就真係得罪人。我個角色好 camp，做完之後成個電視台嘅 camp人都嬲咗我，覺得我扮緊佢哋，嗰年成年都冇人搵我開工咁滯，幾陰功。
成名了，然後點呢？
有乜點？我咁多年都係仰慕兩個人，第一周潤發，第二係黃霑。我唔係想似發哥咁高成就、似霑叔咁多鬼才，我係想望住佢哋背影嚟行。嗰份親民，嗰份笑容，嗰種瀟灑。成名又點，我問你，蝦叔關海山、鮑方叔後生靚仔又好戲，全世界華人邊個唔識，但係佢哋病咗係咩？
病人？
係囉！咁佢哋死咗係咩？
死人？
係囉！今時今日有幾何會有人提番呢兩個咁勁嘅前輩先？所以話成就嘅嘢唔重要，點知聽日係唔係仆街×家剷？做人最緊要珍惜今日嘅緣份、眼前嘅嘢。
|
鍾意就快D Share啦！
|
|
|
