11月 18日 腰躉合一
當日盈盈要返大台拍劇，步出寓所取車時見她雖然全身黑衣，但肚凸、腰圓、大躉清晰可見，中晒孕婦初期身形轉變的特徵。
滾熱辣
與老死周家蔚齊睇中醫齊佗 B 湯盈盈有咗 2個月
兩年前，湯盈盈與周家蔚這對好姊妹夾埋一齊生 B。明年初便 2歲的洪大仁（ TJ）與錢凱晴（ Alyssa）自出娘胎就一齊玩，仲話要對親家㖭！生過翻尋味，兩位媽咪今年中又夾好出擊，齊睇養卵中醫又跟足生仔清宮圖造人，周家蔚已經率先報喜，湯盈盈亦唔執輸。
有消息指湯盈盈有喜近兩個月，雖然最近要趕拍大台劇，但她萬事小心，除動作戲交由替身代勞外，囡囡凱晴亦交由公公照顧。囡囡似老竇錢嘉樂常被人評頭品足，如果盈盈今次成功追仔，似老公都冇問題
好姊妹想夾準時間一齊生 B，其實都有難度，不過湯盈盈與周家蔚感情好到不時研究造人房事，所以兩人的仔女洪大仁與錢凱晴可以同年生。今年初二人再接再厲，一心想生馬仔，可惜錢嘉樂與洪天明都忙於工作，生第二胎的計劃延至年中。周家蔚上周率先宣布又佗仔 4個半月，將於明年羊年出世。
據知情者透露，湯盈盈與周家蔚年初開始睇同一中醫調理身體，「盈盈就快 40歲喇！唔係話有就有，想生都要身子好，所以家蔚介紹咗一直睇開嗰個女中醫俾佢。聽講睇佢嘅客人佗親九成都係仔，所以盈盈睇咗成半年，不過呢兩個月唔見佢再睇喇。佢哋成班姊妹都好信生男育女清宮圖，成日研究邊個月份可以生仔或生女，仲話有咩偏方，食咩酸鹼食物喎！不過恨女嘅家蔚呢胎咪又係仔。」周家蔚 7月知道成功後即通知盈盈，當時仍未有着落的盈盈非常焦急，隨後兩個月與錢嘉樂加緊努力。
有咗唔抱女
上月盈盈帶埋囡囡凱晴為大台錄影節目，在嬰兒 spa中心拍攝做 spa及按摩過程。當時盈盈身形圓潤不少，平時抱實個女不離身的她，當日全程由工人代勞。知情者說：「當日睇盈盈嘅行為真係似有咗㗎，啲人話大肚初期要好小心，唔可以拎重嘢。凱晴已經超過 30磅，做 spa時個 B要抱上抱落，盈盈都係叫工人做。嗰日見佢肚凸凸，都有人問係咪要恭喜佢，但佢笑得好尷尬冇答喎！聽劇組講佢拍緊嗰套劇，所有動作武打戲都搵替身㖭。」
惹火身材是盈盈的搵食架生，去年 3月凱晴出世後，她極速減 30磅做纖體代言人，相信不是為了再生 B，盈盈是絕不會讓自己發福。
11月 18日中午，盈盈獨自步出寶馬山寓所，駕車返大台開工。本刊記者看見身穿黑衫黑褲加運動外套的她， S身形消失得無影無蹤，腰肥凸肚之餘，大髀亦較以往圓潤。到了 19日台慶夜，一眾花旦都低胸上陣晒身材，當晚盈盈身穿 deep V黑色長裙，腰以下完全直落毫無線條可言，而整個節目中她都只是行行企企，未有參與任何跳舞表演或玩遊戲。
父母返港湊孫
早於今年初盈盈與嘉樂有共識再生多個，身在加拿大的湯母與湯父即計劃返港暫住，方便照顧盈盈及幫手湊孫。連日所見，凱晴不時由公公陪住在寓所樓下的停車場玩耍，或到附近公園散步，兩爺孫相處得非常開心。而上周五晚（ 21日），盈盈與嘉樂帶埋囡囡去睇阮兆祥個 Talk騷，公公婆婆都有同行。
佢想生第二個
對於夾啱時間生仔，記者致電周家蔚，但她非常口密，「冇夾埋㗎……佢都想生第二個，係都拍完套劇先到時我會話佢知要湊兩個小朋友嘅滋味。」周家蔚懷孕初期都怕肚內 BB小器，要等 4個月佗穩先公開。好姊妹佘詩曼日前更表示當時忍口忍得好辛苦，現在她們又要為盈盈守秘密喇！
佗 B兩個月的盈盈劇集月尾煞科，屆時便可全心養胎，生個肥肥白白的弟弟或妹妹陪凱晴。
湯盈盈與周家蔚 2012年夾啱時間大肚，兩 B只相差個半月出世。年初二人蠢蠢欲動想生第二個，不時研究怎樣可一擊即中「追」到心中所想，於是跟足清宮生仔圖去造人。據知湯盈盈幫襯的女中醫趙少萍，原來周家蔚懷第一胎前都是找她調理身體。
趙少萍曾任香港中醫學會會長， 65年在廣州中醫藥大學中醫全科畢業，行醫四十多年，在業界有「婦科聖手」之稱。記者曾以生仔為名求診，趙少萍解釋她以養卵為大原則，增加客人受孕機會，更教人記錄排卵的時間，從而掌握受孕的好時機。除陳慧琳外，才女梁芷珊、藝人陳松伶都是她的客人。
|
鍾意就快D Share啦！
|
|
|
