掃呢頁CODE去手機

2014年11月6日 星期四

[壹週刊 - 1287] 再創新低價 港姐月薪七千簽七年 港姐,M1,




上週二(十月二十八日)晚,一班港姐約在圓方飯聚,席間大吐苦水,食完飯,一班女仔又擺晒甫士影大合照。

探熱針

再創新低價 港姐月薪七千簽七年

無綫今年有盈利依然裁員減薪,出爐香港小姐亦慘遭同樣命運,除了做慈善活動無騷錢外,底薪更跌破新低,開出七千月薪簽七年約苛刻條件。人工仲低過酒樓洗碗阿姐,搞到一班落選港姐,冇一個願意簽約留低大台捱驢仔。

吐苦水

由假普選誕生的新一屆香港小姐,人氣同觀眾緣跌至新低,唯獨被網友稱為「民選港姐」的吳凱欣,三甲不入反而最得民心。外界對冠亞季零興趣,大台對自己一手捧出來的港姐亦零重視,今年開出的港姐合約,苛刻度爆燈,以致早前一班女仔相約出來食飯大吐苦水。

「早排公司叫晒成班女仔返去電視城傾偈,落選嗰班以為有機會簽約,點知樂大媽(樂易玲)同佢哋傾唔夠十分鐘,就叫班女仔走人,話有消息會通知佢哋,等咗成個月冇聲氣,各人都打定輸數,好多都開始搵工。不過就算有得簽都有排煩,事關得獎幾個女仔卸任後,份約月薪都係得七千,仲要簽足七年,聽講第二年仲會減薪,因為之後有機會拍劇同出活動,有騷錢計,所以唔會再七千蚊全包。」知情者說。

當選以來,港姐出親都是慈善活動,冇錢收。

冠軍邵珮詩決心在娛樂圈發展,就算低薪年期長都願意留低。

有離意

薪低年期長,大台更以「拍拖」論,勸幾位得獎港姐視今年為拍拖年,觀察是否適合留低,若果未如理想,可以分手走人。

據了解,亞軍王卓淇以及「旅遊小姐」吳凱欣早有離意,除了人工低問題,吳凱欣恃住有導演男友關照,計劃孖必組公司,出外拍電影搵食。

「冠軍(邵珮詩)就一定會簽無綫,因為佢後台硬有人撐,加上佢覺得自己有機會好似喺溫哥華返嚟嘅陳茵媺同鍾嘉欣咁,做到一姐,所以就算錢少都想留喺大台。其實無綫對佢特別優待,其他幾個得獎女仔仲係做緊冇錢收嘅慈善騷,但佢已經上過《安樂窩》做嘉賓接受訪問,上呢類節目有騷錢,嚟緊又有可能做《東張西望》主持,因為無綫要陳倩揚提早放產假,佢本來一月生,十二月先開始放假,但突然收到通知,叫佢做埋十月三十日最後一晚就走,聽講邵珮詩好想做主持,所以高層特登俾呢個機會佢。」知情者說。

港姐出席慈善活動,通常都要做布景板,企定定跟不同嘉賓影相。

參選期間,是非吳凱欣被指整容愛名牌,但無損受歡迎程度。

陳凱琳跟蔡思貝雖然人工奀,但未卸任即有劇拍,且套套擔正,算係好彩。

民選港姐吳凱欣未參選前已為導演男友 Nick拍過短片,雄心壯志的她,更打算卸任後出外拍電影。

大肚陳倩揚突然在《東張西望》「被放假」,有指是要讓位給邵珮詩,她亦在微博暗示要提早放產假。

每況愈下

今時今日,已經無港姐飛上枝頭變鳳凰呢支歌仔唱,選美入娛樂圈,除非屋企有米,或者靠名銜搵到老細,否則只能有名無利。

葉翠翠$15,000

05年冠軍葉翠翠卸任後有萬五蚊底薪,不過其後遇上內地富商黃有龍,拍拖一年即有過千萬豪宅揸手,馬上脫貧。

朱晨麗$10,000

相隔六年, 11年冠軍朱晨麗底薪減到得番一萬蚊,唔夠食唔夠使,只能靠當選時出商演活動拍廣告賺落的外快幫補。

陳凱琳$8,000

13年冠軍陳凱琳,雖然只有八千底薪,不過未卸任便獲安排拍劇力捧,開始有騷錢計,加上家住九龍塘,有米女根本唔使愁。



鍾意就快D Share啦!