細佬，你仲 chok過我！（設計對白）
探熱針
瞞住老豆 林峯弟捽碟入行
父親林華國是有「廈門李嘉誠」之稱的內地富商，但林峯卻對家族生意不表興趣，林父唯有培養細仔林逸洺做接班人。去年大學畢業後，林逸洺回國隨父學做生意，但一向熱愛音樂的他，最近竟秘密客串做 DJ捽碟，還在大佬林峯搭路下，為入行做好部署。家族百億大茶飯冇人吼，林父頭痕！
一樣 chok
林峯胞弟林逸洺去年在美國南加州大學商科畢業後，即被父親徵召返回廈門老家學習打理家族業務，經常陪伴林父出外傾生意。不過，只有廿四歲的林逸洺始終醉心音樂，甚至希望跟大佬睇齊，入娛樂圈出碟做歌手。要肩負家族百億生意，林逸洺依然技癢，近期更在朋友搭路下，在內地客串做 DJ捽碟。
「林逸洺識彈結他，喺美國讀書嗰陣亦有同朋友一齊玩音樂，佢屋企有齊打碟機同混音設備，乜嘢架生都齊晒。其實佢同林峯一樣鍾意 chok亦喜歡娛樂圈；幾個月前，有朋友搞咗個私人 party，佢落場幫手捽碟，好多人都讚佢掂，之後就繼續喺朋友啲 party客串做 DJ。林峯亦好撐細佬，講明不論捽碟定夾 band都會支持，仲一定會幫手搭路。」知情者說。
未必走得甩
兩兄弟都喜歡娛樂飯多過家族大茶飯，但頂替林峯做父親接班人的林逸洺仍未過到林父一關。
「佢哋阿爺林夢飛做過福建省政協副主席，林家喺政界仲有影響力；屋企生意做得咁大，林華國梗係想搵番自己後代做接班人。大佬唔肯返嚟幫手，林逸洺都知自己走唔甩，佢驚老豆唔開心，所以一直瞞住屋企偷偷去做 DJ捽碟。雖然仲未同老豆開口講數，但佢好熟內地音樂圈，亦有唔少朋友係做音樂，將來真係出碟，大把人會幫手。」知情者說。
|
鍾意就快D Share啦！
|
|
|
