外傳黃𨥈瑩入股張兆輝開設的 GVG美容院，每星期也會出入美容院兩次。
探熱針
唔撈無綫 39歲黃𨥈瑩美容院 sell
九四年港姐冠軍譚小環轉行賣魚蛋，而同屆「最上鏡小姐」黃𨥈瑩，亦秘密轉行，近日有指她入股由張兆輝開設的 GVG美容院，做老闆兼示範美容吸客。
向黃𨥈瑩求證，她否認入股傳聞，純粹幫手做美容示範 sell客。「我用咗佢哋產品十幾年，覺得好幫到我，所以輝嫂叫幫手，我好樂意。」
唔撈無綫，專注美容發展，更坦言沒有復出幕前計劃，「拍劇係唔會順住你想做乜角色就做乜，有時要你做師奶，連打扮都要變得好師奶，唔可以好似而家咁，做番自己！」黃𨥈瑩說。
親自落場
拍罷《 On Call 36小時》後，黃𨥈瑩便正式退出幕前，秘密轉行做美容業。
近日有消息指黃𨥈瑩入股張兆輝開設的 GVG美容院，自己仲做埋公司的生招牌。
「佢差唔多每星期都有兩、三日去美容院開會，有時公司要做新產品推廣，𨥈瑩都會親自落場做示範，好多美容院都有睇過佢批相。」知情者說。
立下目標
對於黃𨥈瑩入股美容院，張兆輝太太代黃𨥈瑩澄清：「佢經常會幫我哋美容院做示範，拍低啲相，再喺其他美容院做推銷，可能係咁俾人誤會咗，以為佢有份投資。」
雖然無入股，但黃𨥈瑩早已成為公司生招牌，她更以張太為奮鬥目標。
「而家自己對美容方面有好大興趣，希望將來喺呢方面發展，但經營一間公司唔容易，要兼顧好多嘢，而家跟輝嫂學習緊，希望吸收多啲呢方面知識先。」
以前拍劇生活顛倒，皮膚更逐漸變差。
「可能拍劇壓力大，我以前好易出暗瘡，留咗好多印，但用咗佢哋啲產品，做咗四次微針，成塊面皮膚變得好好，所以輝嫂叫我幫手，我好樂意。」
能夠成功轉行，黃𨥈瑩還意外發現自己有美容天分。
「有時輝嫂會叫我去幫佢啲女仔試工，因為佢哋一掂我塊面，我就分得出手勢好唔好，原來我喺呢方面有天分。」
幕前工作停步不前，驅使黃𨥈瑩早於兩年多前決定離開無綫，轉做美容，眼見近日無綫人才流失，黃𨥈瑩卻沒有復出的衝動。
「係有少少戲癮，但而家競爭咁激烈，自己年紀又唔細，以前拍劇，唔可以順住你喜歡嘅角色去做，有時要你演師奶，連打扮都要好師奶，唔可以梳自己鍾意嘅髮型，好多時行街啲人見到我，都會話點解你喺劇度咁肉酸，你真人靚咁多，呢啲說話聽過無數次。所以係有少少矛盾，除非有好啱嘅角色先會考慮。」
離開無綫後，黃𨥈瑩近年收入來源主要靠到內地做美容推廣，以及商演活動，生活變得輕鬆。「除咗做美容，都會增值吓，好似學畫畫，呢排好興韓劇，我有去學韓文，但真係好難，學極都唔識。」
要愛情、棄事業
39歲的黃𨥈瑩， 94年參選港姐獲「最上鏡小姐」後加入 TVB，做主持兼拍劇集，其後與古天樂合作處境劇《餐餐有宋家》撻着，拍拖後愛情至上的她，幾乎半退出娛樂圈，黃𨥈瑩更是古天樂唯一親口承認過的女朋友，但二人最終敵不過七年之癢，分手收場。回復單身，黃𨥈瑩重投幕前工作，接拍《肥田囍事》、《女人唔易做》等， 11年約滿離開大台，《 On Call 36小時》成為她的告別作。
美容王國
張兆輝與老婆郭碧妍早年在土瓜灣開小型美容院，靠賣豐胸丸起家，其後生意愈發愈大，高峰期曾坐擁五間分店，除 facial療程外，更代理法國護膚品牌 Raffine，遠至美加及東南亞，都有美容院跟他們取貨，每年生意額高達數千萬，現於尖沙咀一商業大廈租用兩層單位，一層為寫字樓，另一層做美容院，周潤發夫婦亦是常客。生意做到有聲有色的張兆輝，十年賺半億，手上物業除擁有市值近 700萬的翠擁華庭外， 11年更以 2,236萬進駐豪宅貝沙灣，稱得上為圈中隱形富豪。
|
鍾意就快D Share啦！
|
|
|
