路芙憶述被斬當日，話兇徒原想劏肚攞佢命。
探熱針
上過 A1頭條 DJ路芙遭尋仇捱三刀
近日在《老表，你好 hea》飾演針灸中醫師「 Peter仔」的 DJ路芙，成功入屋兼亮相娛樂頭條，但原來在廿多年前，因被陀地尋仇身中三刀，曾登上 A1頭版主角。俾人劈都冇事，命硬路芙近年更發現三分一腸道壞死，惡病纏身今日依然行得走得，四十六歲路芙果然硬淨！
與陀地交涉惹禍
有指原名曾潔芳的路芙，未做 DJ前，於九一年任職製作公司期間曾招來殺身橫禍。當年八月，她在彩虹邨附近舉辦一元拍賣展銷會，遇上幾名惡煞收陀地，只有二十三歲，工作經驗尚淺的路芙，因身為主辦單位職員，頂硬上跟惡人交涉，據悉她講了一句：「等我返去問吓老細先！」結果觸怒勒索不果的惡煞，數日後，路芙便在公司後樓梯洗手間遇襲，身中三刀。
本刊翻查九一年八月的新聞，發現路芙被斬案件。據報導指，案發地點是曾潔芳（路芙原名）位於山林道的公司，下午她獨自到洗手間，一名年約二十五歲、戴眼鏡男子突然撲出，手持軍刀向她狂斬。路芙情急下用手一擋，令右手掌心至手腕位置被刀劏開，左大腿及上唇亦各捱一刀。血如泉湧的她負傷拼命呼喊，驚動公司職員，兇徒才收手棄刀逃走。
大腸腐爛
捱三刀大難不死，命硬路芙原來一直多災多難，不只一次走過鬼門關。「佢因為被人斬，上過報紙 A1。你咪睇佢好精靈，佢十七歲就患上糖尿病，一路靠藥物控制住。三年前又驗出因為細個患過肺癆醫唔清，肺癆菌入咗腸，搞到而家有三分一嘅大腸出現腐爛。以為要入院切腸，點知又俾佢食藥控制到，唔使開刀。佢見自己一次又一次大難不死，結果信咗主，仲好虔誠，手腳都紋晒經文同十字架。」知情者說。
本週一（十一月三日），記者到新城電台向路芙求證，並出示她被劈的 A1報導，路芙承認當年因陀地費問題遇襲，兇徒仲想攞佢命。「我去完廁所洗手，個兇徒從後箍我頸，另一隻手就準備插把刀落我肚，我自然反應一手推開，把刀順勢斬咗落我左邊大腿。佢再嚟一刀，我右手再擋就俾佢劏開。慶幸當時我戴住隻鋼錶，條鋼帶幫我卸咗力，仲保護到手腕條大動脈，否則凶多吉少。加上我把聲夠大，一嗌救命驚動晒成層樓嘅職員，嚇到兇徒即走，不過佢臨走前都响我上唇劈多一下。」
右掌被定殘廢
由於手筋及靜脈被斬斷，醫生斷定路芙的右手掌會永久殘廢，但唔服輸的她，花了一年時間日日捱痛做物理治療，監生扯開逐漸萎縮的手掌，結果手掌的活動能力奇跡地回復八成功能。「當日醫生話就算駁番啲筋，生番出嚟嘅肉，會黐到啲筋，令我右手掌撐唔開，失去大半功能。我唔忿氣，咪日日捱住劇痛扯開自己隻手掌，又不停練寫字，而家起碼可以右手揸咪搵食，唯一障礙係單手扣唔到鈕。」
至於兇徒最終有冇落網，她說：「警方根據大廈閉路電視拍到兇徒樣貌，好快拉咗人，但我以為認人好似睇戲場面咁，隔住玻璃。點知原來係面對面，搞到我好驚。加上被斬時我係從洗手盆塊境望咗佢一眼，唔係好深印象，所以當日無辦法確認邊個至係兇徒。呢件事之後我出現驚恐症，唔敢一個人去洗手間。之後仲離開香港，喺美國同加拿大住咗兩年先好番。」
返社團教會
經歷奇特的路芙，連所屬嘅教會「得勝團契」都爆過人，專收悔改歸正途的社團大佬。她的教友有曾叱咤風雲的 348Disco揸 fit人 Teddy哥（洪漢義），及盲亨詹昌盛。而傳道人劉冬青是昔日江湖人物，《老表 2》中的小籠包，正是以他作藍本。
|
鍾意就快D Share啦！
|
|
|
