[壹週刊 - 1289] 告別豪宅 約滿慳住使 側田貝沙灣搬唐樓 M1,

探熱針

告別豪宅　約滿慳住使　側田貝沙灣搬唐樓

一一年側田大鑼大鼓由香港樂壇北移搵食，但在北京撈極唔起，翌年又打道回港投林建岳旗下東亞，事業始終冇起色；愈撈愈霉，責任全歸咎公司冇力捧，側田明年約滿離巢。有出冇入靠食老本，唯有慳住使，最近側田告別貝沙灣溝女私竇，搬去鴨脷洲唐樓，大降格！

翻𢱑Paco

去年開完個唱後，工作數得出的側田，怪東亞幫唔到手，明年約滿，將隨公司旗下藝人衞蘭、周麗淇及李治廷等，另謀出路。

「 Justin（側田）成日覺得自己懷才不遇，埋怨公司唔捧佢，但佢冇反省自己其實得罪人多，所以東亞到而家都冇好積極咁同佢傾續約； Justin都有周圍放風搵路；不過個市唔好，佢得唱歌一瓣，拍戲又唔得，叫價能力相對低，所以佢主力翻𢱑Paco。 Paco過太陽娛樂都想拉埋佢一齊過， Justin口頭應承咗，但轉頭又搵契姐楊千嬅搭路入東亞，而家 Paco肯再同佢傾，都算好幫手。」知情者說。

新碼頭未有着落，側田唔敢大花筒，要睇住荷包做人，唯有由貝沙灣豪宅搬去鴨脷洲唐樓。

「幾年前風光住大坑、半山愛都大廈、貝沙灣，到而家要住唐樓，愈住愈平民化。始終未知將來點，所以要慳啲，最初搬去唐樓住佢都話唔慣，要去番貝沙灣超市買嘢，而家習慣咗，落街幫襯街坊鋪頭，又同樓下車房啲人一齊燒嘢食。」

搬入平民區後，側田平易近人起來，日前過九龍錄音，去食飯時同街坊有講有笑。

晚飯後，慳家側田去小店買外賣，非常好胃口。

側田的鴨脷洲新竇是翻新唐樓，級數同貝沙灣舊居有距離。

睇餸食飯

生活方面能屈能伸，溝女同荷包掛鈎，一樣要「睇餸食飯」。同韓國女友分手多時的側田，最近睇中 C AllStar師妹 Sim C， WhatsApp狂攻，但對方狂派檸檬。

「 Justin勁冧 Sim C，讚佢清純有啲似佢以前個韓國女友；不過 Sim C知佢個底花，表明態度冇興趣。冇固定女友， Justin話出去玩好 free。而家住唐樓，個竇當然同以前貝沙灣差好遠，但佢都有照帶女返屋企。」側田身邊人說。

返貝沙灣買餸

雖已搬離貝沙灣，但側田仍山長水遠返回貝沙灣超市買餸，認真「長情」。

側田是貝沙灣超市熟客，揀生果不忘同店員吹水。

側田曾經住過紅磡服務式住宅，但最後都搬返港島，事關方便去蒲，日前他又出征中環。

追新女

側田力追的 Sim C是 C AllStar師妹，她在荷蘭長大，特別返港圓歌星夢。

Sim C跟 C AllStar同台，騷長腿自彈自唱，難怪側田嗒糖。

同韓國女友分手後，側田暫未有固定女友，但喜愛夜蒲的他不愁寂寞。

逃離東亞

劉浩龍在女友容祖兒搭路下，剛以二百萬簽約三年，由東亞過檔太陽娛樂。

周麗淇跟東亞旗下的「大岳娛樂有限公司」尚未約滿，但已有大陸製作公司招手，有傳她打算全力北上吸金。

衞蘭決定不續約林建岳旗下的 Amusic，正與多間唱片公司斟洽中，她打算放幾個月假外遊，其間慢慢揀。

鍾意就快D Share啦！

下一篇 》