五花大綁
在蕉林拍通宵，美棋 BB被五花大綁，又遭女鬼 Uny斧頭劈，認真慘情。
娛樂喧
直擊被綁•食泥•嘔蟲 美棋 BB連環被虐
黃美棋憑標致五官，成為高登女神。雖然近日有傳她睇唔起明星二代靠父蔭，因而與黃日華愛女黃芷晴及秦沛女兒姜麗文傳不和，但仍無損她在宅男心中的地位。
4歲入行做童星嘅美棋 BB，拍過唔少劇集，一直備受呵護。不過早前拍有線單元劇《大凶捕》，卻慘被連環糟質，除了通宵拍攝，被五花大綁三粒鐘外，更要扮嘔泥兼玩埋屍蟲上身。
最慘就是一雙美腿，被蚊、蟻咬到腫晒。不過美棋 BB原來唔係咁柔弱，仲死撐話︰「雖然係辛苦，但我有『自虐狂』，頂得住！」咁都得？
美棋 BB重投娛圈後，先簽香港電視，拍了三套港視劇，新劇未有得睇，已被網民封為女神，極速上位。不過她早前拍有線靈異單元劇《大凶捕》時，卻被連環糟質，睇怕周六（ 13日）播出時，一定睇到成班宅男好心痛。
在《大凶捕》的單元《蕉屍夢想》中，劇情講美棋 BB被厲鬼趙哲妤（ Uny）纏身，接二連三發生一連串恐怖事件。早前一連四天，劇組日以繼夜在出名猛鬼的元朗蕉林取景。
護身符傍身
自認膽小的美棋 BB隨身帶住護身符防「污糟嘢」，她說︰「劇組話蕉林比較惹鬼，所以我帶住個護身符。有次出門口唔記得帶，最後都係驚到折返屋企拎番。我仲要求劇組盡快拜神，提早俾利是我，因為劇入面我要死，點都要利利是是！」
食真蟲嚇到喊
本來有場戲要美棋嘔屍蟲，導演搵咗啲生勾勾的麥皮蟲來拍，但美棋一聽到話要將啲真蟲擺入口，嚇到眼濕濕，試過幾次都擺唔落口。導演最後都憐香惜玉，改為嘔泥，然後用鏡頭遷就，將啲蟲放在她的口及頸，營造嘔蟲效果。雖然「假泥」由朱古力及麥皮製成，但由於擺足大半晚，「假泥」鋪滿了沙塵，都幾核突，但美棋 BB照樣頂硬上。
由下午 3時，拍到翌日清晨才拍完，美棋疲態盡現。談到拍攝過程，她猶有餘悸︰「嗰幾場戲，先要食粥、再嘔泥，又要俾人質啲麵落口，仲有嗰啲蟲，真係搞到我依家都有啲反胃。你知我幾細膽㗎」
早前有指美棋 BB見高拜，見低扮大牌。不過當日所見，她與同劇演員 Uny及工作人員相處融洽，有講有笑。面對挑戰，美棋 BB雖然受盡折磨，難得佢仍然笑得出，仲死頂話：「雖然係有啲辛苦，但我有『自虐狂』，頂得住！」
而與美棋 BB拍對手戲的 Uny亦說︰「今次大家喺精神同體力上都付出咗好多，自己要特登練單槓拍吊頸戲，美棋同我都係嬌滴滴嘅女仔，要拍啲咁激嘅戲份，真係好大挑戰。（覺唔覺得美棋大牌？）有聽過佢喺港視人緣一般，但呢幾日相處，我哋有講有笑仲互相交換零食，我覺得佢人品唔錯呀！」
|
鍾意就快D Share啦！
|
|
|
