靚抽王
鋒菲復合的重要性
自從 9月以來，大家最關注嘅當然係雨傘運動嘅發展啦，例如係：幾時清場、行動幾時升級、警察打人、藝人發聲、王晶/低智森抽水、 689廢 up……每次聽到 689廢 up就等於開始一個新嘅循環，代表一切從頭嚟過，因為佢一出聲必然重燃火頭，萬試萬靈……於是第二日又再討論幾時清場、行動幾時升級……喺呢一片風頭火勢之中，唯一一個標題可以蓋過運動聲浪嘅，竟然唔係外星人入侵，而係：鋒菲復合！
明明謝霆鋒同王菲唔係各位嘅近親，點解佢哋復合/一同出行等等嘅新聞每一次都仲係咁矚目？今次「狂熱治療」就同大家研究一下呢個咁深刻嘅文化課題
想證明世上仲有真愛
一對情侶分完手，分別同其他人結婚生埋仔女，離完婚然後再喺番埋一齊，成件事嘅可能性就好似一隻馬騮喺個電腦面前亂咁打字，竟然打咗一篇《聖經》章節出嚟咁！呢啲咁罕見嘅現象，我哋一般稱之為奇蹟，或者稱為真愛，都得。
關心兩人的幸福
謝霆鋒唔識你，但係你真係由細睇住謝霆鋒大，甚即係，你睇住謝霆鋒大。你第一次見佢係喺 1984年嘅歡樂今宵（當時佢仲係小朋友），轉個頭佢已經唱緊〈壞習慣〉， chok住溝緊趙學而，再轉個頭佢同王菲一齊，然後分開，再同栢芝結婚，再離婚……總之如果俾「拆天星碼頭個鐘樓」同「拆謝霆鋒」你揀，你都會希望保留謝霆鋒多過天星碼頭鐘樓所以你點會唔緊張佢，希望佢得到幸福？
至於王菲呢個容易受傷的女人，唔好話我聽你睇到佢歷經竇唯、李亞鵬呢兩次失敗婚姻之後，唔希望佢得到幸福啩？佢首〈容易受傷的女人〉你有冇聽過吖？
關心兩人子女的幸福
「細路仔係無辜嘅」——唔知點解，呢個 point竟然成為好多人反對「鋒菲復合」嘅理由。我娛文樂就唔係好明，家陣唔係佢哋復合所以先搞到兩孖人離婚嘛！而係佢哋無論復合與否，都已經係離咗婚。所以我認為應該支持番佢哋喺埋一齊。道理好簡單，如果佢哋兩個都仲係獨身，一定好孤單，孤單又點會開心？唔開心嘅父母對住仔女又點會有好影響？所以我相信佢哋復合一定令雙方都生活得開心啲，而一個開心啲嘅父/母點都好啲嘅！
關心栢芝的幸福
係，鋒菲復合對於鋒菲嚟講，係好開心嘅事，不過張栢芝都喺熒光幕陪咗大家咁多年，大家又何嘗唔想佢得到幸福吖？唉，好難成個宇宙嘅人都咁開心嘅，睇世界盃都係得一隊贏咋，睇開啲
狂熱治療
每期為你分析香港人嘅狂熱症狀，並提供可能嘅治療方法。
|
鍾意就快D Share啦！
|
|
|
