熱爆娛樂: [壹週刊 - 1291] 求婚片　片段流出　錢國偉做老襯靠 Big Four 錢國偉,M1,

2014年12月4日星期四

[壹週刊 - 1291] 求婚片　片段流出　錢國偉做老襯靠 Big Four 錢國偉,M1,

探熱針

求婚片　片段流出　錢國偉做老襯靠 Big Four

「天使」領隊錢國偉（ Wilson），為不少𡃁模製造財路，亦近水樓台，將「味之天使」中的「雜果賓治」陳宛蔚（ Calinda）私有化。拍拖六年，今年六月， Wilson跟 Big Four到美國做騷，同時部署向同行女友送驚喜求婚。為幫肥 Wil促成好事，張衞健拍片兼做總指揮，要男主角跪地送花送三卡鑽戒，終於搞掂，錢國偉可以老襯娶老婆。

張衞健做指揮

求婚片段中，只見錢國偉攞住一束鮮花，一步一步走向女友陳宛蔚身邊， Big Four跟在場一班工作人員即起哄拍掌，之後擔任總指揮的張衞健喝令 Wilson：「跪低」唔知發生咩事的陳宛蔚則一味嗌「好驚」， Wilson隨即攞出婚戒說：「我等咗好耐唔知講乜，本來諗住放煙花時講，因為要做嘢，等放完先可以講。」

被男友跪地求婚，陳宛蔚不知所措，總指揮張衞健全程用手機「隊」住準 Wil嫂，笑住問：「佢（錢國偉）不過想問妳今晚埋單得唔得啫？（完騷後的飯局）」好兄弟幫手搞氣氛， Wilson亦唔怕醜，在眾人前剖白心聲：「我以後唔會因為工作令妳擔心同驚，妳可唔可以排除萬難嫁俾我？」機不可失，張衞健即示意揸住攝影機的工作人員，對準陳宛蔚「 take close up」。又驚又喜，陳宛蔚只有不停拍打男友。 Wilson亦搞笑說：「我都好驚，驚妳講唔嫁。」之後陳宛蔚點頭答好，在場的許志安大叫：「嘴啖先」。

求婚逐格睇

Wilson跪低送 3卡戒指

張衞健指揮跪低

蘇康開心賀阿嫂

陳宛蔚應承求婚後， Wilson即興奮攬安仔。

梁漢文教路

Big Four幫拖， Wilson求婚成功，隨即攞出三卡婚戒為女友戴上，過來人梁漢文教路：「男左女右呀，戴中指！」準錢太戴上戒指後，全場歡呼， Wilson亦興奮得逐個兄弟攬。許志安同準新郎一樣興奮：「我哋等咗好耐，唔敢講。」蘇永康再加多句：「我哋過嚟做騷都係為咗呢件事（求婚）。」

據了解， Wilson打算明年擺酒正式娶女友過門，由於圈中朋友多，預計四、五十圍酒席唔少得，加上一對新人有意到歐洲影婚紗相，籌備婚禮時間十分緊逼。

「 Wilson要幫周星馳拍《美人魚》，所有嘢搞掂已經出年嘅事，跟住仲有戲要開，要左攝右攝唧啲時間搞婚禮。」知情者說。