探熱針
撐港視 益商台 無綫算賬陰乾阮兆祥
阮兆祥在自己主場的棟篤笑開口撐港視開台，隨口噏有手尾，被飛出《歡樂滿東華》；加上跟商台合作搞棟篤笑進賬二百萬，搵錢唔預無綫，更加罪不可恕！殺一儆百，罪人祥仔在新劇《性在有情》戲份被大幅刪減外，在大台的工作量會逐漸遞減至零，慢慢將阮兆祥陰乾！
白色恐怖
阮兆祥跟商台合作做棟篤笑，四場全爆，二百萬落袋，但此舉卻惹來無綫不滿，阮兆祥女友 Crystal近日亦在 fb暗示男友遭受白色恐怖。
「祥仔喺棟篤笑明撐王維基開台固然辣㷫無綫，除咗呢樣，余詠珊唔妥陳志雲都係原因，之前無綫唔俾黎芷珊過商台做節目，祥仔可以開咪，已經算係特別優待，但佢再同商台做埋棟篤笑，余詠珊就好唔順氣，因為佢覺得無綫藝人喺商台做任何嘢，都係益咗陳志雲。」知情者說。
秋後算賬
女友踢爆已遭到大台處分，阮兆祥未有直接承認。
「祥仔做咗咁多年，就算俾人祭旗都唔會出聲。幾日前仲將新劇造型相鋪微博，照幫公司做宣傳；其實佢心裡有數，新劇《性在有情》個劇本未出晒，佢預咗會俾人減戲。祥仔幫商台做棟篤笑賺到錢， TVB覺得佢有嘢唔益公司，一定秋後算賬。」一名無綫人說。
加上有傳阮兆祥明年約滿後不再續約，大台雖然未有即時將他飛出新劇，但有指高層已下令，減少阮兆祥曝光機會，直至全面隱形。
冇手軟
撐港視，益商台，罪大惡極，無綫嚴懲阮兆祥外，對唔續約的林峯、未落實續約的胡杏兒，同樣施以懲戒，小器到呢！
林峯
林峯決定離巢後，被無綫指忘本，孭飛演出的《使徒行者》，宣傳焦點集中女主角佘詩曼身上，更有內部指令，林峯要過兩年冷河，才可重現大台。
|
鍾意就快D Share啦！
|
|
|
