打頭陣
踢爆做小三 世界級港女杜如風 姣撬上位導演郭子健
網上維基百科中將「港女」一詞定義為過分自我中心、拜金主義、有公主病的香港女性。港女本應是人見人憎，不過最近主持旅遊節目《流行首爾》的杜如風（ Helen），竟被插是世界級港女而走紅。
杜如風旋即成為網民抨擊對象，更有消息人士向本刊爆料，踢爆杜如風發仔寒兼發姣，不惜做小三。據悉與「 figure王」 Eric So拍拖多年的杜如風，前年遭王菀之介入而分手。受情傷的她看來未受影響，火速睇中已有女友的上位導演郭子健，不時主動出擊。看來她不單止性格癲喪，對於感情事亦相當進取。
1月 5日起大台播放由杜如風主持兼製作的《流行首爾》，播出第一集，即成為網民熱話。她於節目中經常晒命，揚言家中有過千對高踭鞋，又自稱收藏的名牌手袋比當地的博物館更多。負評指她欠缺主持技巧，只懂吹噓自己，食相更為難睇，直斥她是「世界級港女」。
面對四面圍攻，杜如風接受訪問時繼續我行我素：「我唔會理，尤其係人身攻擊，好多評論已經唔關我節目事。話我甲組腳，我都笑咗出嚟。人哋點講都好，我咪做好自己。」 EQ甚高的她，對自己信心十足。
網上自揭戀情
節目中的杜如風癲喪敢言，私底下感情生活亦相當進取。 07年她曾與黃又南拍拖，雖然戀情只維持了一年，但分手後仍不時主動約對方出街，又曾在節目中自爆跟黃又南撐枱腳。
本刊最近收到消息，指杜如風睇中執導《打擂台》而成名的上位導演郭子健。兩人於去年 3月一個 filmart活動後開始聯絡，杜如風還經常約會郭子健單獨見面。「 Helen（杜如風）一識咗郭子健，就成日約人哋出嚟，話有好多靚景可以用作拍戲外景。佢成日上載導演為佢影嘅相上各大社交平台，寫明照片係郭子健嘅作品，真係好主動。佢仲寫到明『一直很愛我的郭子健大導演』，好友徐濠縈見到都留言鼓勵佢去馬。」
郭子健知道杜如風的偶像是梁朝偉，上月聖誕節還送了一個梁朝偉一代宗師嘅首辦模型給杜如風，杜更興奮到上載微博，寫道：「好有愛的聖誕禮物！多謝靖哥哥！」據知該張相本身係由郭子健微博 copy，背景是郭曾執導嘅《救火英雄》海報，不過上載一個鐘即被刪走，郭亦即時刪除呢張微博相。知情者續說：「明知人哋有個拍拖多年嘅助手女友嚴小曼，咁高調，擺明想激走個正印。郭子健就同人講係 Helen一廂情願唔關佢事，但佢最近開嘅新戲《全力扣殺》，就預咗個小角色俾 Helen，行內人都知佢哋搭上咗。」
郭子健：有提議角色俾佢
就杜如風主動姣溝，本刊記者周二（ 13日）致電郭子健，他聽後異常鎮定，更否認曾經送過 figure公仔給杜如風，但就間接承認推薦杜如風拍自己執導的新片。
記：有人爆料話杜如風介入你同女友嘅感情。
郭：我同佢喺之前電視台個訪問識嘅，擺呢啲嘢上去真係好無厘頭。呢單嘢當笑話咁聽。
記：喺啱啱個聖誕節，你送咗個梁朝偉一代宗師嘅 figure俾 Helen？
郭：冇，梗係唔係我送
記：咁新戲《全力扣殺》係咪預咗個角色俾 Helen？
郭： Helen係有份客串，我只係提議個角色可以搵咩人客串，但最後都係由何超儀（女主角兼投資者）決定。
記： Helen最近個節目俾網民抨擊，你有冇聯絡佢安慰吓？
郭：冇呀！好耐冇聯絡喇！
男主角郭子健矢口否認，杜如風就至截稿前都未有回應。記者亦嘗試聯絡郭的正印女友嚴小曼，惟對方一直沒有回覆。
被王菀之奪舊愛
早年杜如風與港版「 figure王」 Eric So蘇卓航拍拖，有指前年因王菀之介入分手收場。不過據知情人士爆料，分手原因是杜如風的港女性格嚇窒男友：「其實 Eric都頂唔順 Helen， Helen出名係購物狂勁鍾意買嘢，拍拖嗰陣成日叫男友買呢樣買嗰樣，又黐身到爆，男友去邊都要死跟。 Helen仲成日喺男友班 friend面前指指點點，又當面窒男友。男人最要面， Eric梗係唔開心。之後王菀之出現咗，佢小鳥依人，演唱會又搵 Eric幫手設計 product，俾足面男友，呢啲女友咪識做囉！」
就此本刊記者周一（ 12日）到 Eric So位於觀塘的辦公室向他求證。 Eric一聽到杜如風的名字已面色一沉。聽罷提問後，更加耍手兼擰頭拒絕回應，看來前度女友真的令他怕怕。而王菀之在翌日接受訪問時則暗寸：「我哋唔會傾前男友前女友嘅問題。（有指 Eric係因為 Helen嘅港女性格而分手。）唔知喎，不過我唔會要男友俾錢買嘢。（咁你會唔會好黐身？）我咁忙都冇時間黐身」
其實杜如風的港女真面目早於 2011年日本 311大地震後已表露無遺，當時她在微博留言：「今次返到嚟東京，全程好似坐緊遊艇咁，搖呀搖……搖呀搖……快啲搖到青馬大橋！（好彩有帶白花油？！）」隨即被網民指她態度輕佻，在別人傷口上灑鹽，借地震一事抽水，博見報。事後她於微博用粗口反擊：「我要不要臉關你甚麼事！日本大地震，天災這麼恐怖，你還有心情鬧人！你係唔係人嚟㗎！ X你」反客為主鬧爆網民。
杜如風港女性格有人唔 buy，但亦有網民撐她真性情。明年便踏入 40歲的她，難道想繼續瘋癲下去，做世界級中女？
港女遊韓掀兩極反應
《流行首爾》上周一（ 5日）播出首日即被網民圍攻，有評論指杜如風過分 show off教壞人，以及主持節目時癲癲喪喪，食相好難頂等。不過主持旅遊節目多年的她仍有不少粉絲支持，有網民大讚其風格獨特不覺反感。杜如風一於笑罵由人，表示「向來都係咁做節目！」貫徹其個人作風。
靠老竇入行
杜如風父親杜惠東曾為雜誌翻譯日本娛樂資訊多年，受父影響鍾情日本文化的杜如風，於加拿大讀大學時參加日語演講比賽，獲日本駐加大使夫人賞識，推薦她去日本進修獲得大學文憑回港後，杜從事電影幕後工作， 05年加入有線電視擔任《活得很滋味》的資料撰稿員。因為精通日本識玩識食， 07年獲邀為大台收費電視主持《流行東京》，始為人熟悉。 09年她轉投 now收費電視一腳踢製作《風行全世界》，又出版旅遊書，雙線發展。
最愛偉仔
杜如風自小出入片場與明星打交道，其圈中好友大部分都是潮界朋友，如何超儀、余文樂、黃偉文、梁漢文及鄭融等，當中她與徐濠縈最深交。曾與黃又南、廣告導演 Jacky及 Eric So拍拖的杜如風，自爆最愛梁朝偉，更試過拎住偉仔的照片狂錫。
|
鍾意就快D Share啦！
|
|
|
