熱爆娛樂: [忽然1周 - 1018] 拍 MV與導演開火　詹瑞文寸爆︰同我做嘢梗有壓力詹瑞文,MW,

2015年1月30日星期五

[忽然1周 - 1018] 拍 MV與導演開火　詹瑞文寸爆︰同我做嘢梗有壓力詹瑞文,MW,

詹 Sir刻意模仿〈江南 Style〉，但講 timing，似乎 out了很多。

娛樂喧

拍 MV與導演開火　詹瑞文寸爆︰同我做嘢梗有壓力

一向活躍舞台界的詹瑞文（詹 Sir）去年加盟英皇後，上周終於派出其第一首主打歌〈舞大舞細〉，詹 Sir今次踩過界闖樂壇，更升級玩原創。處男作梗係緊張，據知他拍攝此 MV時，與 MV導演（馮寶寶兒子招啟宗）拗撬多多，導演曾向幕後人員呻爆詹 Sir麻煩兼朝令夕改。

求證招啟宗，他直認兩人有意見分歧，更暗寸詹瑞文「藝術家性格」，詹 Sir反擊話︰「同我做嘢梗有壓力。」不過，今次由詹 Sir揸弗的新歌面世後，外間反應未如理想，更有網民直指 MV抄韓國大叔 PSY的〈江南 Style〉，但遲咗足足兩年。

〈江南 Style〉曾經創出 2億點擊率，不少人都爭相模仿。

詹瑞文加盟英皇第一擊，是踩過界勇闖樂壇，其第一首主打歌〈舞大舞細〉，玩廣東話諧音、電子音樂加香港通俗文化。詹 Sir對新歌胸有成竹，並找來伍樂城為專輯擔任作曲及監製、 High King排舞，班底不弱。

呻爆朝令夕改

不過幕後人員透露︰「詹 Sir一開始已經話要做〈江南 Style〉嘅感覺，仲指定要玩電子音樂，本來有人俾意見佢話感覺會 out，但佢一意孤行。除咗曲風抄足， MV嘅概念同舞步都好似。製作過程佢仲意見多多，朝令夕改，搞到大家都好大壓力，導演阿宗（招啟宗）就頂佢唔順，成日同人呻佢麻煩！」

就此事向招啟宗求證，他無奈說︰「呀，佢經常俾好多意見，好緊張自己第一次做 MV！同我要緊密溝通，話有好多新諗法， keep住溝通……」

問到與詹 Sir合作如何？他愈講愈激動︰「又唔會話係麻煩嘅，始終佢有啲藝術家嘅性格啦，追求完美。咁你知我哋做製作要 meet個 deadline㗎！係啦……時間係一個關鍵，未必可以做到十全十美，只係盡量做到最好！」

詹 Sir上周三與女友 Amanda一齊返公司，為第二輯 MV開會。問到拍 MV的是非，佢笑笑口暗寸對方：「我冇撬佢喎！」

馮寶寶愛兒招啟宗新一次拍 MV就遇到詹 Sir，真係唔好彩。

〈舞大舞細〉跟〈江南 Style〉有 9成似，大部分網友插爆佢 out。最慘連啲舞步都熟口熟面，詹 Sir今次老貓燒鬚。不過亦有網友叫好。

傾到半夜三更

問到兩人最大的拗撬時，招啟宗即打圓場：「拗撬梗係冇啦，大家都係合作做 MV啫，討論就有嘅，有時去到凌晨時份都會打電話溝通囉。」

對於被指麻煩及有拗撬，詹 Sir笑笑口暗寸︰「我冇撬佢哋喎！一定有壓力，因為第一次合作吖嘛，加上以前都係我話事！同我做嘢嘅人點都會有壓力，佢哋嘅怨言係『同阿詹 Sir做嘢原來係咁嘅！』」

戲劇大師詹 Sir，舞台劇的聲勢下滑，現在轉型做鬼馬歌手卻出師不利，認真濕滯。