8年前因為母親所帶來的壓力，陳秀茹選擇避走美國。周日（ 25日）她接受本刊訪問，回想當日，她表示：「我冇怪過佢。」
娛樂喧
母女決裂 避走 8年 陳秀茹秘密返港：我想見番佢
娛圈有如一盞走馬燈，每年有新人加入，亦有人淡出。
90年代曾參演《古惑仔》的性感女星陳秀茹，演藝事業雖然未見出色，負面新聞卻不斷。其中其母因拖欠巨額賭債及多次自殺，鬧出軒然大波，更令雙方關係破裂。陳秀茹一度聲言要脫離母女關係，最後她毅然離港，移居美國。
離港 8年，周日（ 25日）陳秀茹秘密回港，已搖身一變成為作家。談到母親，她表示已經放下恩怨，還直言：「我想見番佢！」
陳秀茹（ Suki） 95年參加亞洲小姐而入行，落選後曾拍攝寫真集，有「翻版鍾楚紅」之稱。 96年參演《古惑仔之人在江湖》飾演可恩一角成名， 99年再投考大台藝員訓練班。
母多次自殺
陳秀茹自出道已經是新聞女郎，除了有傳她得到前仁濟總理胡永權照顧，得以入住對方位於清水灣寓所外，陳秀茹母親吳玫瑰亦令陳十分困擾。當年陳秀茹參選亞姐時，其母已經向傳媒爆料，指女兒曾偷竊、做私鐘妹、帶男仔返家過夜、墮胎、自殺、騙父親簽名拍寫真後付過萬元給父親作「掩口費」等等，及後陳秀茹反擊指母親因為爛賭欠下貴利，才編造故事索取金錢。
胞妹隨父離世
01年陳秀茹父親因為食道癌病重，陳母再次向傳媒指摘女兒未有盡孝道。陳秀茹則聯同胞姊陳秀瓊表示母親因財失義才「亂講嘢」，已經準備脫離母女關係。據知陳秀茹 07年因忍受不了母親惡行，加上胞妹隨父離世，一度抑鬱，最後決定跟隨當時才結婚不久的外籍丈夫移民美國。
淡出娛圈離港 8年，陳秀茹在美國擔任過時裝顧問及私人廚師，最近更推出烹飪書。周日（ 25日）她返港，準備周四出席新書介紹活動。她在所住酒店跟本刊做訪問，提及昔日視母親如仇人，她向記者剖白：「當年因為媽咪曾經令我情緒低落，同老公、家姐、密友及 uncle商量之下寧願選擇避走美國。」之後她又承認是當時年紀輕，不懂處理家事：「當年爸爸同細妹過身，如果唔係因為佢（陳母）根本冇人知。其實都咁多年，我冇嬲佢，我唔係記仇嘅人，不過係以前細個，唔識面對呢啲問題，只係想逃避，我決定走嗰陣都冇同佢（媽媽）傾過，但係如果俾我揀多一次，我會睇得好開。」
「依家冇佢消息」
對於母親帶給的傷害，陳秀茹早已釋懷：「我最後一次見媽咪已經係離開香港之前，妹妹過身之後佢就冇再出現。事到如今我都想見番佢。我都有搵過佢，不過真係冇佢消息。就算我家姐一直喺香港，最易搵到媽咪，不過都係唔成功。我覺得呢啲係天意冇得強求，只可以隨緣，可能佢幾個月後會主動搵我呢！點都好，我都期望佢依家好好咁過佢嘅生活。」
外籍夫有來頭
對於過去一切，陳秀茹已經學識放下，能夠過着寫意的生活，全因有個體貼的老公。她的老公 Andrew Bromberg是世界著名建築師事務所的首席建築設計師，其中西九高鐵站他亦有份設計。不過由於其丈夫以香港做基地，大部分時間兩夫婦都要分隔異地，陳秀茹坦言對上一次見面，已是幾個月前：「我同佢一齊嗰陣，佢只係無業遊民，我好支持佢發展事業，鼓勵佢唔使理我，周圍飛做嘢。同樣我做咩佢都會 support，我依家出書，佢都周圍搵朋友幫手，仲話呢份係我今年嘅生日禮物。」
雖然陳秀茹昔日的家庭生活不甚如意，如今有一個錫自己的好老公，可以話上天係公平的。
首位香港藝人 美國出書
陳秀茹自小愛好烹飪， 07年淡出娛圈定居美國，令她有更多空餘時間鑽研煮食心得，最近她更決定出書分享食譜，成為首位在美國出書的香港藝人。「我為咗呢本書籌備咗成年，有別其他烹飪書，除咗食譜之外，我仲想分享愛呢個 message，入面仲有好多講我自己嘅心路歷程。呢本書 4月會喺美國開售，依家都計劃緊喺香港出版。」她除了推出飲食書以外，更透露正計劃寫一本小說，看來她不甘過安穩人妻生活，誓要做個女強人。
|
鍾意就快D Share啦！
|
|
|