Comma Party共有二十三間主題房間，假日訂房經常爆滿，但閒日卻有五成空置率，令阿釗（左）大感頭痛。
壹盤生意
2間變 23間 Party Room開得多賺得少
「俾人抄等於表揚我做得好，其實都有滿足感！」廿七歲的周志釗（阿釗）一臉滿足又無奈地說。這位八十後，於三年前在觀塘工廈租了一個私竇與朋友玩樂，後來他將其中兩間房分租出去開 Party。就這樣 hea住成立「 Comma Party」，兼且 hea住月賺四萬。
三年後的今日， Comma Party由當日兩間房，變成今日租下十個工廈單位、間成廿三間有不同主題 party房的巨無霸﹗但打開盤數，營業額雖比昔日激增五倍，扣除開支，盈利總共只有五萬元，平均每間房月賺二千一百元﹗開得愈多、賺得愈少，背後原來是個「騎虎難下」的故事。更諷刺是，當日本來諗住 hea住搵錢，今日卻做到有氣無定抖，老闆阿釗坦言疲累：「週末經常要凌晨四五點才收工﹗」
阿釗和拍檔阿健，兩年前曾接受本刊訪問，他們當時把租來自己玩樂的工廈單位、其中兩間房布置成主題房分租出去：擺部電視、放張梳化，間中招呼吓客人，每月就賺三萬八千元。不過這類生意入場門檻甚低，很快便被人抄襲。當時阿釗心想，既然每到假期總是爆場，那肥水不流別人田，不如自己開得幾多得幾多。當時阿釗除了用盡公司現金流，還利用信用卡透支五萬元，投資共十多萬在同區再租多一個單位，現時想起他亦覺冒險：「當時諗住搏一鋪，覺得每月 keep住還到錢就無問題，好彩最後成功咗！」
記者數過，近一、兩年，不計 Comma Party，單是觀塘區的 Party房已經達二、三十間。為搶佔市場佔有率，阿釗不斷擴張，房間數由兩間變四間、四間變八間，去年底開了第廿三間主題房，暫時成為觀塘區 Party Room一哥。但原來「好睇唔好食」，要顧及的問題多的是，有苦只有自己知﹗
辛酸一：揼本裝修無錢落袋
記者參觀過 Comma Party的房間，發現阿釗在房間主題及裝潢方面確花了不少心思，例如「警局」房間，設有七八十年代的監倉，配上警棍及盾牌，讓客人參與角色扮演遊戲，曾吸引廉署租用房間拍攝廣告。其餘主題包括三隻小豬、小矮人與白雪公主、及近期勾起不少港人回憶的叮噹主題房等等。阿釗表示，「每次諗新主題同裝修其實好辛苦，要不停睇好多嘢搵靈感。」阿釗熱情地帶記者到最新一間八百呎的房間，設計似古老歐洲車站，棕色的磚牆上有一塊寫着「 23 Platform」的牌匾，標誌着這是 Comma Party第二十三間房間，房間角落有個小小的木製 Bar枱，對面有兩個精緻的大酒桶，充滿古典味。阿釗表示，一間房裝修最平要七萬元，這間新房更斥資三十萬，記者咋舌，這個價錢已可裝修一個幾百呎的公屋。他說：「三年前開第一間，我同拍檔阿健自己裝修及買傢俬，只用咗一萬元，但依家無呢支歌仔唱」事關競爭激烈，揼本裝修變得迫不得已。
記者到過其他 Party Room觀察，發現大家在裝修上鬥得火紅火綠。如由藝人薛凱琪助手投資的 Hide n' Seek，比 Comma Party裝修得更華麗，有更多精緻的家具擺設。 PartyHut布置雖比 Comma Party簡單，但卻有不同種類的遊戲設施如美式桌球、乒乓球、氣墊球，還有投影機大熒幕用作打機，更能吸引男生幫襯。阿釗要與對手鬥，過去賺到的錢，都花在巨額裝修上，實際落袋的不多。他還有另一憂慮，「業主見你用咁多錢裝修，到時有可能會大幅加租。」
辛酸二：租金、人工創新高
地理位置是否方便，是客人其中一個考慮幫襯的因素。要贏人，一定要揀靚位。 Comma Party在觀塘區有二十多間房，分布在十個廠廈單位。大部分位置，距離觀塘及牛頭角港鐵站少於十分鐘路程，位置相對就腳，可說是不錯。不過今時今日的香港，靚位租金自然貴。三年前一個單位，月租五千，今日他的十個單位，每月共要承擔十萬元租金，平均每個單位要一萬元。他擔心觀塘租金會愈來愈貴，他說：「單係上年，觀塘區的租金升了兩成，呎租由十蚊升到十二蚊，暫時靠租金平嘅舊房嚟賺多啲錢，彌補新房間賺得少嘅不足。」
同時，阿釗為了保持服務質素，做到一個員工睇三間房，現時他要聘請五名全職及十五名兼職員工。而為免有經驗和服務態度良好的員工流失，他又要出高人工：長工薪金由一萬元起，最高萬五，比文員更高！每月出糧花去十萬元，計埋租金，已佔收入六成多。阿釗指無辦法唔養住一班兼職：「一個員工可以睇到連埋一齊嘅三間房，但如果三個客 book三間距離遠嘅房，就變咗要用三個員工。一人只睇一間，效率較低。」為了增加員工歸屬感，減低流失率，他要花心血搞 Team Building，「聖誕前我哋食咗餐『上路飯』，嚟緊二月會去打 war game！」客人開 Party求開心，看到員工死氣沉沉，興致會大減。
辛酸三：服務可以加收費不能加
阿釗承認被對手分薄了部分生意，他唯有走大眾化路線，收費幾乎是全城最低。下午收費五十八元三小時，晚上收七十八元三小時，較其他競爭者便宜約二十元，「其實咁耐以嚟我都只係加咗一次價，只係十蚊。」記者走進 Comma Party的「希臘小屋」主題房，一班大學生正玩獎門人遊戲，張同學對記者表示：「喺 Facebook見到 Comma Party有房租，呢度近學校，價錢又唔貴，所以咪選呢間玩。」這正道出阿釗未能大幅加價的無奈。另一方面，阿釗指出要透過細節及服務質素取勝，例如他會提供即用即棄拖鞋，免費提供七款飲品及煮食用具給予客人，「對手提供廚房煮食嘅都收好貴，但我免費包埋，等客人可以上嚟打邊爐或炒個餸都得。」
出路
Comma Party的房間，假日總是爆滿， booking甚至已經訂到二月底；然而，一至四閒日的空置率則有五成。記者曾致電觀塘區數個派對房間查詢，發現大家都有同樣的問題，部分服務、裝修及位置較輸蝕的，連假日都仍有空房，可見這類 Party Room未能開拓更大客源。阿釗亦知道問題所在，決定今年暫停擴充房間數目，目前希望為公司訂立統一的服務指引準則，讓自己不用再落場照顧客人，抽空多作管理及宣傳：「平日要吸引多啲以拍攝及拍片為主嘅客人，例如隔籬房盡量唔接 booking，讓他們收音效果較好。之後放佢哋嘅相上 Facebook，間接宣傳。」雖然生意難做，但阿釗並沒有打算放棄，「呢盤生意已經唔屬於我一個人，我要養住好多人，而且我相信只要做到第一，就一定有生存空間！」
營業資料(01/15)
營業額：$300,000#
人工：$100,000*
租金：$100,000
雜費：$40,000
廣告：$10,000
盈利：$50,000
#包括十個廠廈單位
*五名員工、兩名老闆、十多名兼職
擴充資料(12/14*)
租金：$30,000#
裝修：$70,000
雜費：$3,000
總投資：$103,000
*一間主題房
#兩按一上
|
鍾意就快D Share啦！
|
|
|