組超齡Twins 千嬅Sammi攬走積怨
一抱泯恩仇，楊千嬅演唱會是最好的印證。繼日前十年爭獎死敵容祖兒擔任嘉賓後，前晚在紅館舉行第四場個唱，終於，另一位天后鄭秀文（Sammi）現身了。傳言二人積怨從華星年代種下，千嬅出道時被公司塑造為翻版鄭秀文，此舉令Sammi大為不滿，交惡傳足十幾年，所以當Sammi踏足千嬅的紅館舞台一刻，千嬅的確是眼泛淚光。
中性打扮的Sammi唱出《終身美麗》，二人手牽手合唱後擁抱，千嬅感動得熱淚盈眶，Sammi率領全場大叫「楊千嬅你最索」，千嬅即叫觀眾大嗌「Sammi你最索」，Sammi笑說：「唔使講啦，我知呀！」千嬅坦言對Sammi答應做嘉賓感到再無遺憾，她說：「大家會覺得好奇點解我會請Sammi，因為我出道時，好多人都將我哋成為話題！」Sammi即與千嬅頭貼頭說：「真係似咩？不如我哋組成Twins長做長有，不過我哋有啲超齡！」隨後她倆不斷互笠高帽，千嬅說：「我好幸福，似到一個咁堅、咁威、咁靚嘅人，仲唔係亮點？」Sammi回敬：「你請我分享你嘅成功，分享你嘅快樂，見證你努力嘅成果，好開心，多謝千嬅咁多年後畀咗呢個機會我。」
■盛傳交惡十多年的楊千嬅（左）和鄭秀文，今次可謂一抱泯恩仇。
■鄭秀文（左）在台上為千嬅打氣，千嬅坦言毛管戙並感激每位朋友的支持。
■（左起）鄭秀文、陳慧琳、梁詠琪和千嬅當年因為頒獎禮而傳出是非。
資料圖片
自爆曾被錯認Sammi
千嬅自爆曾在內地工作時被錯認是Sammi，她笑言：「我認咗呀，我怕解釋仲核突，因為我國語唔係咁堅。」Sammi即搞笑地說：「我冇俾人嗌錯做丁太，你當我隔籬嗰個流嘅咩！」Sammi離開舞台前，認真地為千嬅打氣，千嬅在台上感性地說：「我自己都毛管戙，好開心，夢想變成真！我好感激每位嚟嘅朋友，令我好溫暖。」
千嬅獻唱期間，高踭鞋的斗零踭攝入舞台機關空隙，她索性除去高踭鞋，赤腳在台上又唱又跳。
此外，千嬅新片《五個小孩的校長》戲中五位小演員開騷前，亦拉隊到後台探班，合唱生日歌和送生日卡預祝千嬅下星期生日。
撰文：麥萍萍
■曾與千嬅合作拍電影的五位小孩，開騷前專登往後台為她提早慶祝生日。
|
鍾意就快D Share啦！
|
|
|