探熱針
裝修 300萬變 500萬 王祖藍新婚爛屋五大奇景
今年情人節準備同李亞男拉埋天窗的王祖藍，豪使千三萬，買下連花園的四千呎大埔雅景花園作新婚愛巢，再掟三百多萬豪裝冧老婆，點知所託非人，花十五個月施工，裝修費嚴重超支七成至五百萬埋單。
損失金錢，更重創是王祖藍信錯教友設計師，不單被當水魚生劏，一屋馬虎裝修，手工衰過搵大台木工搭建的道具屋，加上設計出問題，入住個多月便出現漏水，搞到水浸奇景，愛巢一鑊泡。
奇景 1 冷氣機安呢度
分體式冷氣安裝在抽油煙機上，業內人士 Winnie稱：「此設計漠視實質問題，機身會因長期油煙侵蝕好快壞。應該收喺假天花入面，或再花心機喺牆身走線放另一邊。」
奇景 4 帳篷擋唔到雨
設計師以近六萬蚊買下帳篷，事後祖藍發現一大幅根本承托力不足，搞到一落雨篷頂中間兜滿水墜下，要即時收起，帳篷只能做裝飾。 Winnie建議：「其實咁大範圍，係需要用兩三幅支撐，雨水先唔會集中聚喺中間。」
信錯教友
早前有報導指王祖藍花三百萬豪裝愛巢期間，因圖則改完又改要求天天新款，搞到嚴重超支，要五百萬埋單之餘，施工期亦延長至十五個月，但王祖藍收樓後卻拒付二百萬差額。
被指拖欠裝修費，忍冇可忍的王祖藍，由任職亞視高層的舅父冼偉智代出頭，展示一批入住只有兩個月的新居相片，相中清楚見到屋內裝修差劣，隨處爛牆爛磚，五百萬換來「化妝樓」貨色。
據知，前年王祖藍在一個教友聚會上認識室內設計師姚俊傑（ Joe），常以戒毒改過自身經歷四處做見證的他，亦打動了王祖藍，在未收集口碑意見，便將千萬愛巢的設計及裝修工程，交對方負責。
王祖藍對 Joe未有加以提防，即使對方要求施工十四個月亦冇異議。王祖藍舅父指當時對方拍心口，稱全屋裝修費一口價三百三十萬，但工程進行途中，卻四度加碼。
四度超支
裝修費不斷加，更倒欠二百萬尾數，冼偉智稱一切與事實不符。
「前年八月開始裝修，佢初時話三百三十萬可以做到好完善，但之後要求加到三百八十萬都仲未夠，再加到四百五十萬跟住五百萬；祖藍話呢個係最後底線，點知埋單竟然係五百六十萬。大家都係基督徒，祖藍好信佢，去到四百五十萬，仲現兜兜咁俾。」
每次王祖藍向設計師 Joe追問超支原因，要求控制成本時，對方的反應也是「唔加錢就做唔到設計效果！」洗濕個頭，唯有焗住俾。
「祖藍想大事化小，發現唔合理都選擇妥協。有人就蝦祖藍對裝修一無所知同信任，買任何嘢都冇俾個辦佢揀就入貨。裝修一年後我先插手幫祖藍跟進，發現其中多張更新清單裡面有好多後加施工，問佢點解就話計漏報漏。嘩！報漏你都要通知一聲，問番個客同唔同意，唔係自己加完先話你知。」
牧師代拆彈
「我要求對數，但次次都對唔成，因為佢根本攞唔出啲實據收費。祖藍同我冇怪班裝修師傅，我哋知道阿 Joe只係俾最後三個月時間班師傅起貨，之前成年只係做重整結構同防漏。但工程交俾佢嗰陣間屋係石屎籠，唔明點解搞咁耐。」冼偉智說。
王祖藍去年十二月入伙，入住後一個月，愛巢多處出現漏水，天花牆身有水漬，花一年時間做的防漏工程形同虛設，此外，分體式冷氣機安裝在抽油煙機上面，牆身凹凸不平、浴缸水龍頭安錯位等，全屋「奇景」！
唔想再做水魚，王祖藍要求對方清楚交代賬目，但交唔出單據的阿 Joe卻先發制人，收埋王祖藍車房鎖匙，直至知道王祖藍家人報警，他才改用軟功，提出私下和解，王祖藍一度找來對方的牧師居中調停。
「喺牧師面前阿 Joe應承搞清楚條數，但轉頭又唔同晒。」王祖藍唔再上當，決定找公正行介入，討回公道。
新屋多爛 gag
早有前科
替王祖藍愛巢做工程的設計師 Joe（姚俊傑），過往常以戒毒改邪歸正，發奮到英國苦修室內設計做分享見證，輕易在教友圈子搵食。在他公司網頁簡介上寫有：「設計靈感來自上帝創造萬物，觀察上帝的設計從不馬虎……」
講到天下無敵，其實唔只王祖藍中招，早在二○一二年，阿 Joe亦因工程合約糾纏捲入官司。
|
鍾意就快D Share啦！
|
|
|