同發哥親熱嘴嘴，嘉玲話未夠喉，已經報定名，等下次合作。
探熱針
睇拍戲 三嘴周潤發 劉嘉玲嗌 Encore
相隔超過二十年，繼八七年的《江湖情》和九二年的《我愛扭紋柴》後，周潤發、劉嘉玲在賀歲片《賭城風雲 II》再度合演情侶，導演安排兩人在泰國芭堤雅三個靚景拍攝親熱場面，即使全程有發嫂監場，嘉玲都好 enjoy，還意猶未盡，報定名：「期待下一部戲再合作！」
搭船來回兩粒鐘
去年賀歲，《賭城風雲》後勁十足，內地票房收過五億人仔，電影公司立即拍板開續集；男主角周潤發膽拖張家輝、余文樂和女主角劉嘉玲，演員陣容十級跳。
配合劉嘉玲和周潤發這對鑽石級組合的親熱場面，外景隊分別在芭堤雅的派島海灘、真理寺和春武里三個靚景，實地進行拍攝。為求交足功課，《賭城Ⅱ》製作成本上調到億五人仔，再有機會同發哥合作的劉嘉玲，承認有壓力。
「套戲睇得出好認真同落本，導演王晶仲話要我拍一啲驚心動魄、激烈嘅親熱戲，原本都好緊張㗎，但嚟到拍攝現場，見到啲環境同天氣又好，個人即刻放鬆晒，非常享受咁就拍咗場戲。」劉嘉玲說。
劉嘉玲說，到派島開工，單是船程，每日來回最少兩粒鐘，她和發哥在島上有場水中激吻戲，監製劉偉強明知女主角喜歡香檳，特意準備了一支「堅嘢」做道具。
「發哥配合劇情飲咗一兩啖，其餘都俾嘉玲姐飲晒，冇嘥！」一名劇組人員說。
身邊好友得知劉嘉玲要去泰國和周潤發拍五日外景，紛紛提出隨團出發陪拍戲，不過卻被嘉玲一眼拆穿。
「發哥好 nice，同個個都影自拍，令到嚟探我班嘅朋友都好開心，佢哋口口聲聲話嚟陪我，實質係嚟探發哥。」嘉玲笑說。
人肉百科全書
事隔廿幾年再同發哥做情侶，嘉玲覺得彼此都成熟了不少。
「發哥會同我分享佢嘅人生觀，亦有多年嚟嘅閱歷同見聞，例如行山、食物、點樣注重健康等等，佢好似一本百科大全咁，有好豐富知識，有咩問題都可以問佢，喺佢身上學咗好多嘢！」
對今次的合作，發哥坦言：「係一個浪漫回憶，我幾鍾意。」至於嘉玲更講到明想 encore：「好似有啲未夠喉，好期待下一部戲再合作。」
開工五日，連拍三場親熱戲，即使發嫂全程在場，嘉玲都不覺尷尬。「唔會，做戲啫，呢啲戲反而唔可以同太熟嘅人做，好似我同梁生（梁朝偉），就做唔到，一定會好尷尬。」嘉玲說。
|
鍾意就快D Share啦！
|
|
|