慧敏哥一身 bra top嘅運動裝束好有睇頭， 22吋纖腰仲好養眼，「小腰精」個朵果然名不虛傳！
真面目
人比人《巨聲》辛酸 阿嫲接濟 陳慧敏：唔出街食都唔夠用
大台又《巨聲》又《星夢》，年年有唔少新面孔誕生，行起運上嚟唔係歌唱比賽出身，只要簽咗大台星夢唱片嘅，一樣金曲金都照攞！攝石人易做，但更多人選擇一步一路，靠自己捱出另一片天空。
好似《巨聲》出身嘅陳慧敏（ Vivian）冇簽星夢，反而投靠 Paco的太陽娛樂，頒獎禮冇佢份，但人人都知佢唱得。唱得都要練，有「小腰精」 22吋腰的慧敏哥，一直 keep住裝備，講到辛酸，莫如要 70多歲嫲嫲接濟自己。「覺得好辛苦，但決定咗行呢條路！」慧敏哥，加油！
澳門長大的 25歲陳慧敏，憑住參加《超級巨聲 2》而入行，去年被金牌經理人黃柏高羅致其下，正式成為歌手。成功泊到大碼頭，陳慧敏雖然仍未闖出名氣，不過就時刻保持作戰狀態，一有時間就落街跑步，練到氣又順便修埋身，一雞兩味。
「唔會畀自己超過 90磅！」
陳慧敏身形細細粒，不過對保養好有心得，說：「每日飲 2公升水，去水腫又可以保養聲線，一起身就會灌 2大杯水！」
本月初，本刊撞見慧敏哥去到觀塘海濱長廊練跑，一開波就先做拉筋動作，之後索性除埋外套繼續拉， 22吋纖腰表露無遺。本刊再致電慧敏哥，她說：「準備出 EP，想地獄式訓練自己。（身形好 fit喎？）𠵱家體重 88磅，條腰 22吋，呢個磅數上鏡好睇啲。雖然鍾意食嘢，但絕對唔會畀自己超過 90磅！」
阿嫲 2萬蚊救急
入行 3年時間，原來慧敏哥都儲落唔少辛酸史，其中家人更令她感觸最深，她說：「自己喺上年問過屋企人借錢，因為喺香港嘅住宿同使費都好大，就算唔出街食都唔夠用，又唔想借銀行就惟有問屋企人，知道佢哋會擔心，自己個心都好唔舒服！（最難過係邊件事？）我嫲嫲已經七十幾歲，佢舊年畀咗 2萬蚊我媽咪，話係畀我，當時聽完自己一個人就匿喺屋企濠哭，覺得嫲嫲都七十幾歲都仲要照顧我、擔心我！自己覺得好辛苦，但我又決定咗行呢條路，呢啲位就好難取捨。」
慧敏哥講《巨聲》
|
鍾意就快D Share啦！
|
|
|