真人騷
告別 11年大台主播 體育王子伍家謙：再唔走怕後悔！
去年 11月，伍家謙離開穩守 11年的體育主播崗位，轉職成為自由工作者。
由於走的時候佔中正佔得如火如荼、大台疑似自我審察，此舉被很多人視為棄暗投明，他再三解釋：「絕對冇政治因素在內，一個地方做咗十一年，都想轉下環境、多啲嘗試，我怕第時屋企有小朋友就更加唔敢走，我更怕自己廿年後變咗嗰啲人，一味淨係識講：若果當年咁咁咁，我今時今日一早點點點……」
35歲已經是觀眾習慣的老面孔、已經是跑前線的首席記者，再留下去，然後呢？
同一個問題，三個月前我訪問過的另一位離職主播方健儀亦如是問自己，然後做了同一個決定。
「我開口埋口鍾意話伍生教落，太多嘢受恩師伍晃榮先生影響，我冇問佢喺一個崗位做足 23年係咩心態，但係佢入職嘅年紀唔同我，事實上，現實狀況亦都同當年好大分別……我冇預計過，離開後外界反應會咁大。」
反應大這件事我可以理解，作為觀眾，我亦是自私的一群：最怕改變，最喜歡和習慣舊面孔、舊聲線，最好每個主播都像伍晃榮一樣報到退休，最好每天六點半定時定刻一成不變，叮噹永遠都係林保全把聲。
可惜地球會轉，世事會變，青春可否不要老？簡直就是痴人說夢話。
離職想做非主流報導
轉職自由工作者忙緊乜？
會喺香港設計中心做公關同市場，同東方足球隊合作中、寫緊書，寫我咁多年嘅體育記者經驗，仲有專欄開始緊，有報紙有雜誌，同埋司儀，我亦搵緊其他網上平台，希望做番以前嗰樣，報導體育。
咁鍾意呢份工作點解要走？
同一個地方留咗十一年，始終想轉下其他嘢，不過轉完又發覺自己都係鍾意嗰樣嘢。過去十一年儲落好多人脈同知識，好難真係走，有人都話點解最後一日報體育我冇同觀眾講再見，其實我係離開咗一個機構，唔係離開呢個行業。
離職需要幾多時間決定？
離職時間係敏感嘅，但係呢個決定我一早就有，做記者嘅腦永遠都係咁樣轉：亞運後想做埋奧運、奧運後想做多屆世界盃，今年初喺做完冬季奧運出現咗一個新工作機會，諗諗下，六月世界盃不如做埋先……冇諗過直到世界盃後，個機會仲喺度等我。
主播個位，邊部份最令你留戀？又有邊部份，促使你離開？
咁多年嚟，呢個工作崗位有冇咩事發生令我想離開？真係冇。今次離開主要原因都係因為做得耐，假設屋企將來有更大負擔、可能有小朋友，相信到嗰陣時，我連走嘅勇氣同機會都唔會再有。每次做完一個大型賽事，我都會問自己，仲有咩可以再突破？我真係好怕自己係嗰啲人，廿年之後喺度話：如果廿年前我點點點，今時今日就咁咁咁……我同好多香港運動員一齊成長，近年唔知點解，有大賽先至叫體育，內裡其實有好多嘢，其實除咗攞獎嗰班，香港仲有好多運動員值得尊重，故事值得得到關注，呢樣嘢係我最想繼續留喺體育圈子嘅原因。我喺其他平台，少受時間限制，就可以做多啲所謂非主流嘅報導。
比如話呢？有咩唔係一線運動員故事值得分享？
我曾經做過一個報導，好出色嘅足球員因為收入唔穩定轉行去做消防員，最終佢都係離唔開足球，再放棄消防員工作返回足球圈。呢個故事係關於追求夢想，體育界太多呢啲故事值得分享。
離開兩個月，有咩過去例牌嘅工作體會你會懷念？新工作又有咩新衝擊令你覺得興奮？
比較懷念係，以前一至五一定車埋同一班住附近嘅同事一齊走，說說笑笑、食吓嘢，好規律好安穩。𠵱家最新鮮係，我以前訪問人，𠵱家掉番轉個新聞，俾人問番轉頭，感覺幾得意。工作經歷，我最感動係東亞運動會香港足球攞冠軍，你唔好理呢個比賽其他國家係派咩人嚟踢，咁睇，中日韓投放喺足球嘅資源比香港多幾多先？一向積弱嘅球隊攞到獎牌，我真係好激動，因為好多球員都識，睇住佢哋入行，全日都忙住做直播做訪問，最後靜落嚟執嘢，真係流咗兩滴眼淚。仲有李慧詩喺倫敦攞銅牌，作為一個體育記者，仲有咩好遺憾？
連打呔都係伍生教落
有冇問過恩師伍晃榮，同一個崗位做到退休做到老係咩心態？點解你唔係？
我冇同佢傾過，但係我知道佢喺無綫 23年，入去做嘅時候已經四十多歲，佢嘅心態應該唔同我。但係真嘅，我離開嘅時候，外界反應比我預計有些大。仲有週刊狗仔隊跟我添。
第一次俾狗仔隊拍係？
05年，伍晃榮退休。又係同女朋友食完嘢，喺條街度食煙，同今次一樣，又係食煙，又係嗰啲嘢囉……
又係你老婆？
唔係老婆，嗰陣時都仲未識我老婆。第一次幾驚㗎，又怕影響工作，唔明自己有咩好俾人講。
方健儀都試過俾上司鬧到喊，你有冇試過？
經常恩師伍晃榮最鍾意鬧人，試過一次，夜晚三點做到第二日十二點。十二點幾我寫完一份網球稿交俾佢審閱，佢一句：唔好！叫我寫過。再寫再唔得、再寫又唔得，前後重寫咗四、五次，一直做到下午四點。當年細個，一定唔明點解佢要咁做，下一更嘅同事都返晒嚟，我都未走得，算係點？六點至放我走，陣間又要返通宵。隔幾日，佢同我講，係想我親自領略點為之好。
會唔會爆粗？
佢嚴謹係真，源於佢自己對呢份工作嘅認真。呢份工要 hea做好簡單， 1比零、 2比零，報下賽果容乜易？但係自己鍾意嘅嘢，我唔會咁樣 hea對佢。
伍晃榮影響你幾多嘢？
佢有惡嘅時候，但亦有輕鬆嘅時候，鍾意同你講笑，試過有一次我做錯嘢，好似報錯賽果咁上下。當時啱啱入行，已經好驚：死喇，唔知會唔會俾人炒……佢話：攞你爸爸電話嚟，我要同佢商量下你未來事業點走！……我真係好驚，隔一陣，我爸爸真係打俾我話：你老闆真係好好。原來伍晃榮先生知我好驚，打俾我爸爸話：你叫個仔唔使驚，我請得佢返嚟，一定會睇住佢！好得意，佢姓伍，我又姓伍，唔好話啱啱入行，𠵱家都仲有人以為我係伍晃榮嘅仔，我哋真係好有緣，佢話佢兩個仔都係叫「伍家 X」，真係咁蹺，其實我阿爺都係叫「伍晃 X」。佢太多嘢影響我，細到係打條呔，佢話我打呔打到似中學生，唔似大人。人總有年少氣盛時，當年會覺得佢樣樣都話我，𠵱家諗番起，我開口埋口都係「伍生教落」，就算係打條呔，每次我打呔又會諗起佢。
我要教個仔學識輸
係唔係真係開始計劃生小朋友？
其實未，但總有呢一天。舊年 12月至結婚，𠵱家結咗婚先得一年一個月。太太𠵱家讀緊 MBA進修緊，大家都諗住兩年後佢畢業就開始計劃生小朋友，所以把握住呢兩年。
拍咗拖幾多年？
拍咗拖六年，佢係空姐，但係我唔係搭飛機識佢，都係朋友介紹。好自然由飲嘢、到食飯，當時我單身，啱傾好自然想多約佢。慢慢發現大家真係好啱傾，最吸引我就係大家嘅共通處。佢讀中文讀中史，我哋睇好多一樣嘅書，睇衞斯理、睇金庸，大家多咗好多話題，我哋呢一輩，可以講小說角色溝通到，唔係咁多。佢又成熟過我，我好多決定佢都俾咗唔少意見我。
你會係一個點樣嘅爸爸呢？
我會帶我嘅仔睇波，同埋帶佢去玩運動，因為我要佢學識輸。因為人生的過程，正常來說，輸嘅次數一定多過贏，點樣面對失敗係人生最大課題。
你屋企得你一個仔？
係喇，縱壞晒，我爹哋曾經係股票經紀，媽咪做文職，作為屋企獨仔，由細到大得到關注的確比人多。
你有冇真正輸過？去年醉駕停牌係唔係最大挫折？
我諗我相對事業幾平順，幾感恩。停牌件事，點講都係我唔啱，做錯咗就要承擔責任，汲取教訓，下次唔好再犯。作為一個公眾人物，嗰次我係做咗個好唔好嘅榜樣。咁多年真係好大挫折係冇，但係難過我試過。 08年嫲嫲走咗，我喺醫院陪佢走，跟住又要返工。細個爹哋媽咪要返工，我好多時間都係同嫲嫲一齊度過。但係入到廠就自然要進入狀態，我係一個新聞從業員，唔應該俾私人情緒影響。
所以淚的小花黃紫盈唔算專業，因為俾新聞部前輩蝦，喊住報新聞？
咁每個人表達方式都唔同，嫲嫲走嗰日，我做完嘢都會入洗手間抹眼淚啦……但係你話辦公室政治嘅嘢，我哋體育部就自己做自己嘢，始終人數唔係太多、成組感情都好好。
|
鍾意就快D Share啦！
|
|
|