李彩華戀新五虎 團年見家長
【大坑→銅鑼灣】
李彩華（Rain）轉戰內地拍劇短短數年吸金八千萬，現年三十一歲的她榮升圈中小富婆，身邊不乏裙下之臣，據知Rain跟過氣「新五虎」何遠恒秘撻兩年，當年何遠恒在無綫捧極都唔紅，結果敗走內地轉行做生意，更成功將富婆Rain追到手，前日買埋蛋糕和禮物送上門，由Rain接載返女方父母屋企提早團年，閉門一家親。
圈中女筍盤李彩華雖然在香港發展平平，惟轉戰內地後憑劇集《回家的誘惑》急速彈起，短短數年已坐擁八千萬身家，雖然不乏裙下之臣，但感情卻多波多折，舊愛王傲山背她劈腿、潘啟翀欠巨債問她借錢，去年跟某品牌高層Thomas Lee傳緋聞收八十萬勞力士鑽錶，當時揚言已經三十歲要找結婚對象的Rain，還以為跟Thomas打得火熱，怎知卻殺出二號追求者何遠恒，前日Rain帶男友返父母家提早團年，似乎認定了他才是真命天子。
【前晚7:15pm厚禮侍候】
■剛拍完劇回港的李彩華，即約同真命天子何遠恒回娘家，男方更帶齊蛋糕與禮物而來。
【有傾有講】
■身形高大的何遠恒與李彩華邊行邊雞啄唔斷。
【黐實上樓】
■兩人默契十足，一個開門一個殿後。
■李彩華的微博前年貼出的家庭大合照時已見何遠恒。
買禮送上門
前晚約七時十五分，本報發現Rain駕駛mini cooper停泊在大坑浣紗街停車場，約五分鐘後攞住Zoe蛋糕、一盒禮物的何遠恒就出現，當年跟古天樂、古巨基、劉愷威、吳家樂被無綫捧為「新五虎」的他，雖然外形高大但演技平平，捧極唔紅極速於娛樂圈消失，轉戰內地搞冷氣工程和瓷磚生意，現年屆三十九歲的他發福不少，面圓圓頸粗粗不復當年靚仔。
當何遠恒坐上車後，由Rain做柴可夫接載駛往南華會，Rain將座駕泊在停車場後，何遠恒再做阿四負責攞住一抽二拎的蛋糕和禮物，跟隨Rain到對面的嘉蘭閣寓所，據知該處是Rain於三年前以一千二百萬購入送給父母的單位，似乎何遠恒是特登返港跟女友父母提早拜年，繼去年底孖女友陪兩老到杜拜旅行後，前晚更登堂入室實行採外父外母政策碼實女友。
【晒情侶裝】
■李彩華與何遠恒大方將貼頭合照放上網。
【昨日5:00pm】
■李彩華約女友人嘆茶，更與朋友的BB玩唔停。
自爆多人追
昨午約五時許，Rain就撇甩男友約女友人在大坑high tea，母性大發的她幫友人𠱁囝囝，抱着小男孩坐大髀玩自拍，跟他goodbye kiss後才駕車返大坑名門香閨。記者致電Rain問是否跟何遠恒拍拖？她例牌否認：「唔係呀，因為細佬生日，咁佢嚟屋企食飯，叫佢買埋蛋糕，佢同我屋企人好熟，互相屋企人都識，好多朋友成日都去我屋企，媽咪識晒我啲朋友，媽咪煮嘢好味，成日都喺屋企聚會，噚晚都好多人。」父母是否認定何遠恒是女婿？她說：「嘩！未咁快呀，做朋友都要時間睇係咪真心朋友，講到咁遠。」
何遠恒是否符合她的擇偶條件？Rain笑說：「睇下啦，我不嬲咁多人追，都要睇下嘛，𠵱家有幾個人追。」情人節跟誰慶祝？她說：「冇呀，敏感日子唔會約人，約咗咪畀佢以為有機會。」
採訪、攝影：畢紹基、吳耀輝、潘冠恩、小米
|
鍾意就快D Share啦！
|
|
|
