黐祖兒升呢 劉浩龍轉新會囂屎 [忽然1周 - 1024] 祖兒,劉浩龍,浩龍,容祖兒,MW,

活動上，劉浩龍向傳媒表明當日踢記者鏡頭純屬誤會，並否認自己囂張，叫現場記者做自己的「品格證人」，七情上面。

娛樂喧

黐祖兒升呢　劉浩龍轉新會囂屎

霉足多年的劉浩龍，自成為天后容祖兒背後男人後逐步升呢，最近更成功以 300萬轉會為太陽娛樂旗下藝人。近日他被指一朝得志，語無倫次，與女友外遊大阪返港不甘被拍，扮唔小心踢記者鏡頭。

本刊收到消息，自我感覺良好的劉浩龍，甫入新公司，便事事要求與公司一哥許志安睇齊。至於早前有份拍《 12金鴨》的他，在片場撞見東亞舊同事王菀之竟視而不見，大鼻指數急升。

劉浩龍 97年入行以來，事業一池死水，感情生活卻多姿多彩。半紅不黑的他，兩年前撻着天后祖兒，事業身價亦立即起飛，除可以用女友飛行里數換商務機票陪外遊外，靠祖兒的人脈關係，去年尾更有幸拍吳君如的賀歲片《 12金鴨》。

祖兒眼見男友在東亞唱片發展不如意，即搵自己舊同學、現任太陽娛樂高層唐才智（ Alex）幫手，最後成功令男友獲 300萬轉會費過檔，為期 3年。朝中有人好辦事，以往屬二線尾三線頭歌手的劉浩龍，在上月的太陽娛樂簽約儀式中，得到揸 fit人黄柏高的高度重視。 Paco更明言會幫他在紅館開個唱，擺明力捧。

Paco新寵

霉足多年，劉浩龍上月終簽約 Paco旗下的太陽娛樂，轉會費 300萬 3年， plug新歌出碟之餘更有望在紅館開騷。

女友穿針引線

入行 17年，劉浩龍最大成就莫過於與天后容祖兒相戀。有指容為幫男友，親自出面向舊同學、太陽城娛樂行政總裁唐才智（ Alex）（小圖）力薦，成功幫男友轉會。

片場當人透明

劉浩龍去年尾拍《 12金鴨》時，因經常拍實主角吳君如，戲份頗重，自覺在片場高人一等，更對昔日的東亞舊同事視而不見。一工作人員透露：「佢對如姐（吳君如）、華哥（任達華）嗰啲梗係有講有笑，但對住東亞以前嘅舊同事，就當人透明囉。以往佢去頒獎禮，同 Ivana（王菀之）都會有傾有講，但拍《金鴨》嗰陣，佢見到 Ivana都直行直過，招呼都唔打。」

誓做壓軸

上周六（ 7日），劉浩龍出席公開活動。他到達現場後，見其他嘉賓未到，便一直留在保母車等（小圖），沒有下車與主辦單位的工作人員打招呼，直至所有嘉賓到齊，才施施然下車。

唔騷王菀之

拍《 12金鴨》時，劉浩龍對東亞舊同事甚至昔日好友王菀之都不瞅不睬，連日拍攝都視對方如陌路人。

與安仔睇齊

甫入新公司，劉浩龍便希望與昔日波友、現為太陽娛樂一哥許志安睇齊。而以往每逢周三與明星足球隊踢波的他，近日亦甚少蒲頭。

扮外國巨星

除了對眼忽然向上生，據知，近日有傳媒約劉浩龍做訪問，他亦學足外國一線巨星規格，要對方事先 set定問題讓他過目。知情人透露：「就算一線到 Sammi、祖兒，做訪問都唔使要預先睇問題啦。講真佢呢個動作，都係驚人問佢同祖兒嘅嘢啫。」

拍拖高調

劉浩龍和容祖兒拍拖兩年，愈來愈高調，除結伴祖兒坐商務機位外遊，更孖實出席朋友聚會。祖兒更開口講希望兩、三年後生 B，足見二人感情穩定。

唱得少詐型

據知太陽娛樂的確有意力捧劉浩龍，更籌劃一年後讓他在紅館開騷。公司近日安排劉擔任下月初吳國敬作品展的演唱會嘉賓，試試水溫，但有人卻嫌唱得少扭計。「阿敬個騷除咗搵師兄（劉浩龍），仲有安仔同 Sammi，佢哋當晚會唱三首歌，至於其他歌手就會唱一至兩首。師兄本來唱兩首，但佢早排就同公司詐型話要唱三首歌，可能佢想同安仔睇齊啩？依家唔夠一個月開騷，如果臨時轉 rundown會好煩，但阿敬就講明唔想得失任何一個 friend，所以呢排佢都好頭痕。」

上周六（ 7日）劉浩龍到東涌出席活動，被問到用腳踢記者鏡頭時，他誓神劈願說純屬誤會，又呼籲記者做其「品格證人」。對於被指態度變得囂張，他堅決否認說：「我唔會咁低能咁蠢，因為受傷害嘅最終都係自己。」

身家三級跳

事業一直平平的劉浩龍，自從黐到容祖兒這個大碼頭之後，身家馬上三級跳，由 500呎舊居搬到跑馬地千呎新居之外，出入都揸祖兒的百萬波子。

高調揸女友波子

這架 JY字頭車牌的百萬波子（車牌是 01年祖兒老闆楊受成所送），轉眼便成了劉浩龍出入的座駕，且長期泊在他寓所的停車場。

跳出舊居

與天后拍拖沒多久，劉浩龍便由位於大坑的舊居，搬到月租要三萬六的跑馬地雲地利道新居（圖），租金足足貴一倍。

鍾意就快D Share啦！

下一篇 》