高鈞賢與媽咪首次穿上埃及民族服裝，不亦樂乎。
娛樂喧
賠騷錢谷到喊 高均賢︰對阿媽好內疚
明星 sell親情節目向來收得，今年 4月有線節目《帶阿媽去旅行》大玩母子情，頭炮是剛離開大台 3個月的高鈞賢。據知高鈞賢今次酬勞不俗，有五位數字，加上同阿媽去旅行，令他感慨良多。
原來高鈞賢入了大台後，事業一直低沉，收入只僅夠自己餬口， 9年以來今勻第一次帶阿媽去旅行，都是因為做節目。對此他感觸說︰「我對阿媽好內疚。」
由於今次拍攝節目的地點是埃及、近約旦等伊斯蘭國險地，據知出發前高鈞賢父親曾大力反對，猶幸母親力撐，堅決要同囝囝踏上征途。
高鈞賢透過電話訪問，暢談拍此節目的點滴：「呢個唔係舒服嘅旅行。朝早開零六，夜晚收十點，又有沙塵同風暴。由香港去埃及，中途經約旦轉機，等足三個鐘，全程十八小時。去到埃及關卡，個個人揸搶，又要查袋。當地人冇笑容㗎，見到我哋中國人眼望望，氣氛好嚴肅，真係難為了媽咪。」
談到第一次拖住媽咪的手出遊，高鈞賢不無感慨。「以前唔係冇諗過同阿媽去旅行，但每次都諗住遲啲先有時間都留番嚟等機會啦，有時又冇心情。其實我對屋企人好內疚，尤其係對阿媽，佢係屋企入面最義無反顧支持我嗰個。由我賣咗加拿大架車返香港追尋夢想開始，到今次決定離開大台，媽咪一直同我講：『阿仔，你想做就去做』我講嘢唔多，但佢都明白我諗乜，就好似係我靈魂咁。」
為阿媽搏一鋪
「離開大台，百分之八十嘅人都唔贊成，話依家小生已經唔多，留番喺度會有機會。甚至連我爸爸都係咁講，話大台有穩定收入，出去由零開始，好冒險！但我唔想到三十幾歲依然庸庸碌碌。有媽咪嘅支持，我至決定全力一搏。」
高鈞賢 21歲時參選《香港先生》，之後同大台簽約，一簽便是八年。他一直只演路人甲，直到第五年，大台又要求他凍薪加簽一年。後來臨約滿前，大台再要他凍薪加簽兩年。當時他已 29歲，深知不能再等。
賠騷錢谷到喊
「每次簽約，公司都話會俾機會我，但等到第八年，我決定唔再續約。有時見到與我同齡嘅人，已經有事業基礎、有家庭有小朋友，但我乜都冇。自己養自己勉強夠，但咁大個人乜都俾唔到屋企，好內疚。有次打籃球傷咗入醫院出唔到騷，欠大台騷錢三萬幾，我忍唔住喺醫院喊咗出嚟。嗰陣我喺事業上好失落，惟有靠籃球場上嘅歡呼聲搵番自己。阿媽見我咁，問我攞本存摺，想入錢落我戶口，我真係再忍唔到……」
婚後住近父母
高鈞賢指希望三年後（ 33歲）結婚，住近父母，可以時時刻刻照顧他們。「我依家喺內地拍劇搵到少少錢，想話買嘢送俾兩老，佢哋都唔要。我想第日結咗婚住近佢哋，呢份係送俾兩老最好嘅禮物。」
高鈞賢離開大台三個月，已拍完一個內地古裝劇《山海經》、一部全國播映的消防宣傳片。另接了湖南衞視《愛的婦產科》、港台的《監管有道》及深圳衞視綜藝節目《男左女右》，工作浪接浪，終於捱出頭。「我會當自己係新人，努力一步步行落去。」三十歲發力，有心唔怕遲。
賣親情搶收視
近年來中港兩地都掀起親子節目熱潮，因為 sell親情容易入屋，收視有一定保證，不少電視台都爭相製作。
|
鍾意就快D Share啦！
|
|
|
