靚抽王
藝人似來似去清單
近日又有一堆藝人俾人話似另一堆藝人，我哋嘗試同大家分析吓，到底有乜似，有乜可以用嚟區分兩者嘅不同，等大家想尋仇都唔好點錯相吖嘛？
蔡思貝似木村拓哉
（發現者：杜汶澤）
阿澤呢名多口仔無啦啦睇大台話見到蔡思貝好熟口面，跟住喺臉書出文話佢似木村，佢都算好帶挈喇，蔡思貝即刻多咗見報機會！此外亦有網民指出，蔡思貝仲有啲似陳芷菁㖭！
有乜似：隻眼大，短頭髮，皮膚少少黑，臉尖，唇厚
有乜唔似：點講呢，木村一啲都唔似網上打機達人達哥，但係蔡小姐呢……網民話有啲似喎！（好似係）
盧巧音似何韻詩
（發現者：網民）
強國網民唔鍾意香港人成日話要民主，所以當正爭真普選嘅藝人係眼中釘。不過呢種咁易煽動嘅人通常都冇乜判斷力嘅，所以佢哋近日就將盧巧音當做何韻詩，正式點錯相……
有乜似：兩者都愛作中性打扮及老牛式低音唱腔，好少女歌手係咁嘅。
有乜唔似：正如有網民指出，何小姐今時今日返到大陸先講啦，點去中山演唱呀？冇知識都要有常識吖。
藝人相似清單
列表者：高登天后鄭列瓊（發現者：網民）
高登勁人瓊姐見到又有藝人似藝人事件出現，當然出嚟抽吓水，仲整理咗會令人搞錯嘅藝人清單。唔好問我，點解 OK仔同彭健新會咁似，亦唔好問我發脾氣嘅究竟係許志安定係杜德偉，更加唔好問我明道同阮經天係唔係同一個阿媽生，因為喺呢個咁似嘅情況下，我哋亂講都真係會有人信的。
人有相似
入得娛樂圈做藝人，最緊要有個性，如果有人話你似邊個邊個，通常都唔係乜嘢好事。不過凡事必有因，又唔見有人話劉華似曾志偉？
|
鍾意就快D Share啦！
|
|
|
