軒仔鬼咁有緣「同居」當friend
歌手張敬軒音樂天分甚高兼擁有一把靚歌喉，原來軒仔自小對靈異世界有獨特的「感應能力」，前晚他與英皇一眾歌手容祖兒、蔡卓妍（阿Sa）及鍾欣潼（阿嬌）在飯局大講古怪經歷，祖兒被嚇得依嘩鬼叫，她更自稱額夠高，有三把火鎮住。
軒仔前晚出席完《勁歌金曲》節目後趕往會合自封「龍虎豹」的祖兒、阿Sa、阿嬌出席英皇晚宴「撐枱腳」，四位大忙人難得聚首一堂，當然無所不談，天南地北都講一餐，講到不少藝人遇過靈異事件時，原來自小就對靈體有「特異感應」的軒仔，自爆不時能感覺到身邊的詭異氣場！
「朋友」情緒化
懶理靚女會否怕聽鬼古分享親身體驗的軒仔，一於「鬼話連篇」，他笑言過往曾居住過一間屋，屋內住了一個「朋友」，不過，這個「朋友」比較特別，亦好情緒化，當「他」心情唔靚時，花園的玫瑰花很快便會凋謝，但當「他」心情靚爆時，全屋都充滿正能量！對於這位「朋友」的存在，軒仔「膽生毛」毫不驚怕，還可以相安無事和睦共處，軒仔笑道：「我唔驚，由細到大都習慣晒，成日都感應到佢哋。」更指這些「朋友」其實好善良，不會騷擾他。
軒仔愈說愈開心，繼續說：「試過工作太攰返到屋企，我就向屋內嘅『朋友』高呼：『我好攰，唔好騷擾我！』呢個『朋友』都相當合作，真係冇打擾我休息。」
「嘩鬼」三把火
在場聽到軒仔詭異經歷的祖兒、阿Sa和阿嬌，卻聽得毛管戙依嘩大叫，對於軒仔有特異感應，祖兒當然不敢恭維，笑言：「我哋三個（阿Sa和阿嬌）咪係嘩鬼囉，我就感受唔到佢感應嗰啲嘢嘞！（有冇見過？）啋，冇見過可能我額夠高，有三把火鎮住啦。」
不過，當提到祖兒被指榮升樓神身家逾四億，軒仔笑說：「我成日都覺得入英皇會發達，你睇謝霆鋒、祖兒、古巨基，我都係因為咁先簽。祖兒喺樂壇打拚咁耐，有呢個數字唔出奇，應該有更多添！」他有意待樓價回落置業：「我初時嚟香港，屯門一間四、五百呎嘅屋只係幾十萬，當年買咗就發達咯。」
文：音樂組
|
鍾意就快D Share啦！
|
|
|
