再行差踏錯，失去未婚妻的吳浩康，本週二（三月三日）外出一臉憔悴，坦言傷害咗 Sherman，令佢萬分懊悔。
娛頭
登門死𦧲4粒鐘 鍾舒漫：情侶關係斷一斷 友誼波四年 有米小三倒貼霉浩康
吳浩康婚前偷食 35E富貴模 Yvette，傷透的鍾舒漫即時解除婚約！日前，吳浩康登門求情 4粒鐘，明顯心軟的她決定判男友緩刑，再觀察半年，俾多一次機會對方：「情侶關係暫時斷一斷！」
至於介入二人戀情的小三 Yvette，其實是吳浩康舊相好，維持友誼波已經四年。據了解，財來有方的 Yvette就算有內地武指和猛料男友打孖照顧，仍甘願倒貼長期冇工開的霉浩康。為自己謀福利，吳浩康同鍾舒漫拍拖兩年！瞞足兩年！
小三接濟
一大抽偷食往績的吳浩康，自戀上圈中「聖女」鍾舒漫後，曾戒煙戒蒲，又勤力到派傳單、教泰拳、組 Band出騷乜都做，甚至同女友去做婚前輔導，嘗試生性做人。
可惜有頭威冇尾陣，轉眼便打回原形。雖然仍屬英皇旗下藝人，卻長期冇工開，收入有限，幸好有舊相好 Yvette，倒貼接濟！
「阿 Deep同前女友 Hazel拍拖嗰陣已經搭上咗 Yvette，大家都各有另一半，但會定時見面短聚。 Yvette喺模界出名係散餐王，好鍾意揀啲有女友嘅男人埋手。佢入行以來 model job唔多，但周身名牌、揸 Benz，有層五百幾萬嘅樓，每個月又會坐商務去日本一、兩次，好有計！ Yvette之前有個富商男友，而家就同時有個大陸武指同個猛料男友，咁多年來佢都有補貼阿 Deep，又成日彈啲 job俾佢。可以又食又拎，阿 Deep點捨得斬纜！」知情人說。
本週一（三月二日）， Yvette在鑽石山寓所樓下的便利店，見到有雜誌報導自己，即買。怕被街坊認出的她，見到本刊記者再一聽「小三」兩個字，即刻驚到用手遮面，速逃！
交還鎖匙
至於吳浩康，為箍番鍾舒漫，週日（一日）晚十一點，夜訪女友家，求情四粒鐘；直到半夜三點，才一臉殘樣離開。
據悉，鍾舒漫決定和吳浩康回復普通朋友關係，並要求他交還屋企鎖匙，從今不能自出自入她的香閨。
「 Sherman一入行就識阿 Deep，拍拖前大家乜都 share，所以佢覺得阿 Deep對自己好坦白，應該唔會呃佢；就算明知阿 Deep係積犯（偷食），都堅持同佢一齊。 Sherman今次真係好傷心，頭幾日係傷到喊唔出嗰隻！阿 Deep亦好後悔，因為喺佢人生低谷時，只有 Sherman支持佢，百分百信佢，所以佢好希望可以追番 Sherman；亦承諾唔再同 Yvette來往，今次真係斬纜！」知情人說。
觀察半年
本週一，鍾舒漫向本刊直認，暫時同吳浩康分手。
壹：壹週刊鍾：鍾舒漫
壹：阿 Deep有冇講佢同 Yvette係舊相好？
鍾：佢同我講佢哋係朋友。
壹：覺唔覺得佢哋藕斷絲連？
鍾：我諗佢哋係朋友 keep contact囉。
壹：你講同阿 Deep係緩衝期，係咪指分手限期？
鍾：其實緩衝期係我哋情侶關係暫時斷一斷，但呢段時間我哋會 keep contact。
壹：點解會有咁嘅限期？
鍾：我諗大家都需要時間抖吓又好，了解吓又好。
壹：想觀察吓？
鍾：需要時間去諗。
壹：睇半年？
鍾：呢啲我哋自己 deal。
壹：你收番屋企鎖匙？
鍾：呢個唔講，唔使太 details。
壹：佢話好後悔冇咗個好老婆！
鍾：我唔知佢講過。
壹：你已經原諒佢？
鍾：原諒咗
恨錯難返
據悉，鍾舒漫解除婚約後，知衰的吳浩康曾向友人哭訴，因為偷食而失去一個好老婆，難以原諒 自己。
後悔太遲，本週二（三日）早上，謝晒的吳浩康外出工作，被問跟舊相好 Yvette偷食一事，吳浩康只說：「唔想探究曾經嘅事，因為佢都有佢嘅生活。」
全程頭耷耷的他，對偷食事件，不停重複說好傷害 Sherman。「做咗一件好錯好錯嘅事，連後悔都彌補唔到。」
問吳浩康覺得自己最錯是那一點？他說：「講大話，傷害咗佢（鍾舒漫）同佢嘅屋企人，同埋佢對我嘅信心冇咗就係冇咗。（有冇同女友父母交代？）遲啲我會搵 auntie同 uncle，交代番晒件事。」
過往有多次劈腿記錄的吳浩康，對於自己重複犯錯，嘆一口氣說：「係冇得原諒嘅事。（ Sherman話原諒咗你！）依家我只想承擔番自己做錯事嘅後果。」說罷，便匆匆跳上的士。
劈腿慣匪
出道多年，吳浩康事業一池死水，但溝女戰績彪炳，更鍾意拖一個、食一個，是圈中有名食家。
戀 Yumiko照溝女
出道時，吳浩康跟同公司的 Yumiko發展地下情，爛蒲的他仍不停溝女，最終被 Yumiko狠飛。
|
鍾意就快D Share啦！
|
|
|
