鮑姐轟王征亂嚟：估唔到亞視敗喺佢手
【ATV告急之痛心疾首】沒有亞視，沒有金像影后鮑姐鮑起靜，雖然她大前年已離開娘家，但她也絕對飲水思源，對亞視一直情永在。昨日她獲悉亞視投資者王征在內地《財新網》訪問中，指亞視本月底死期到，鮑姐欲哭無淚，王征不肯賤賣亞視讓它重生，鮑姐力斥他此舉是玉石俱焚，揶揄王征是敗國者，對他十分不滿。
>一直處於弱勢的亞視，去年還因為財困，拖欠員工薪金，過去幾個月糧期不準，令員工藝人的經濟和生活大受影響，早於1979年加入麗的，及至大前年才離開的「亞視之寶」鮑起靜，獲悉亞視投資者王征在內地《財新網》訪問，指亞視本月底執笠消息，鮑姐昨日非常不滿，但她仍希望在月底「死期」前可以鬧醒王征。
■「亞視之寶」鮑起靜雖已離巢，但昨受訪得知娘家面臨執笠，十分痛心。攝影：陳志嵐
■每次提到娘家亞視，鮑姐都情緒激動。資料圖片
■演技精湛的鮑姐（右）和葉德嫻曾合演亞視劇《義無反顧》。劇照
「冇可能玉石俱焚」
王征接受內地《財新網》訪問時表示，亞視很可能將於本月底關閉，更爆出最後一名「白武士」上周六正式拒絕出資拯救亞視，他也決定放棄亞視，暗示擁有五十八年歷史的亞視將於本月底關閉。鮑姐早前為亞視員工遭拖糧事件已哭訴鬧爆王征，力斥他行為騎呢。王征變本加厲拒賤賣亞視，寧願執笠不讓亞視有一線生機，鮑姐昨在電話痛心說：「我真係唔敢相信，冇可能用玉石俱焚去執咗佢，真係唔知王生（王征）點諗，估唔到亞視就敗喺佢手，變成歷史敗國者。」
鮑姐回想五年前認識剛入主亞視的王征，當時對他印象不錯：「當時我覺得佢好有朝氣，有啲意氣風發，笑容又多，好識講嘢，我覺得佢好有正能量，以為佢畀到亞視好開始，當年我畀佢有九十分，但隨着呢幾年佢嘅表現，𠵱家只係剩十分，我直情對佢十分……唔滿意。」鮑姐指出王征根本不懂經營電視台，變相就是行外人做行內人的事：「佢一直有意將亞視打造成CNN咁，根本同香港呢個巿場唔啱，邊可能一間電視台係冇自己製作，佢完全唔了解香港嘅巿場，做嘅嘢係格格不入。」王征的失策等於倒水，面臨財缺就閂水喉，完全沒有顧慮旗下員工的生計，鮑姐說：「七百幾名員工一下子冇咗份工，咁係好徬徨，雖然稍後有新電視台開番，員工會搵到新工，但過渡期又點算，大家留守力撐呢幾個月，一直期望有轉機，𠵱家結局竟然搞到咁。」有指亞視短訊員工要封嘴避談倒閉傳聞，鮑姐卻精靈說：「係咩，但我唔係員工喎。」
■鮑姐昨指對王征的印象分由九十跌到僅餘十分。資料圖片
方平：佢唔識用人才
對於王征不屑買家只出兩、三億洽購亞視，鮑姐揶揄他歪理多多：「佢經營緊一間賠錢嘅電視台，點可能賺錢賣咗佢離場，咁對下一個投資者都好唔公平，我好認同盛品儒所講，點解股東之間唔可以放低爭拗，為大局着想。」視亞視為娘家的鮑姐當然不捨亞視畫上句號，她說：「雖然世上所有事情，有開始總有結束，但亞視咁樣冇咗就好無辜，佢收視係低，即使只有一點，都證明係有六萬幾觀眾支持。」
鮑姐的老公方平都婦唱夫隨，他指鮑姐對亞視有情有義，即使有人重金禮聘過檔，但鮑姐都不心動，希望留守娘家，方平昨在電話訪問中，直指亞視落到今日下場，王征是罪魁禍首：「最大問題係喺佢身上，佢唔識用人才，唔識計劃，佢口口聲聲話用晒啲錢，咁到底用咗去邊，係咪掉咗落鹹水海？」
採訪：比華利
場地：富臨飯店
■鮑姐和老公方平鬧爆王征令亞視滅亡。資料圖片
|
鍾意就快D Share啦！
|
|
|