探熱針
有手尾 發水腫 D變 G Barbie扮美人魚出事
以 35D big爆上圍出位，有寸嘴 Barbie之稱的夏尉喻，年初拍完星爺執導的二○一六年賀歲電影《美人魚》後，不單上圍由 35D升級到 36G，因為扮美人魚埋位浸水一個月，身體開始出現毛病；脹爆 Barbie近日出席宣傳活動時展現象腿壯手臂，接近一百三十磅的她，愈來愈大咪。
重磅大兩碼
上週二（三月十日），大了兩個碼的寸嘴 Barbie素顏出現將軍澳南豐廣場睇中醫，呆坐近一粒鐘，終於到她，了解完病情，醫師隨即開方，並在她耳仔幾個穴位上貼上膠布。
Barbie忽然向橫發展，早前出席電影《台北夜蒲團團轉》宣傳活動時，除有張 pizza面，雙腳粗似象腿，手臂肌肉更呈現凹凸狀，但 36G巨胸始終撼贏同場的雞排妹。
去唔到水
「拍《美人魚》嗰個月幾乎場場戲都係浸喺水入面，就算拍完一 take上水，但未乾晒身又要落返去再拍，長時間濕住身，加上幾年前做過心臟手術，新陳代謝變得比一般人慢，血氣唔好，身體去唔到水，所以成個人咪愈來愈腫， Barbie本來著六碼衫，而家著十碼先掂，大咗兩個碼。」身邊友人說。
睇完醫生，抽住大包藥走的 Barbie接受訪問時表示：「醫生話我啲荷爾蒙好亂，影響肝臟排毒功能，好易水腫。而家做咗耳穴同針灸，放咗兩粒藥同埋將啲好細嘅針放咗喺耳仔入面，要等幾日先可以攞番出嚟，加埋飲藥，內外夾攻調理。」
一發不可收拾
女藝人要顧住副搵食架生，經常冇啖好食，加上工作壓力，稍一不慎，好易搞到分泌失調，手尾長。
苟芸慧
樣靚身材好的苟芸慧本來係網友女神，可惜去年因壓力爆煲，導致內分泌失調嚴重水腫，高峰期體重達至 150磅，索爆華姐慘被冠以「肥苟」稱號，至今仍未回復當年勇。
王君馨
大台處女之一的王君馨， 09年主持飲食節目遭網民狠批表現浮誇，一度被公司雪藏。受唔住打擊，情緒抑鬱的她選擇狂食減壓，結果演變成暴食症，一晚可食六個人份，令身形暴脹。情緒回復正常後，身形亦打回原形，好好彩。
|
鍾意就快D Share啦！
|
|
|