娛頭
獨家通電 爆阿媽又打又× 留言想跳樓 梁齊昕：我都咁大個，唔住屋企
被踢爆受家庭壓力、被迫和中產男友分手的特首女梁齊昕，本週二晨早在 FB爆被龍蝦媽推埋牆、掌摑，兼爆粗鬧死蠢×、周街被人×、同人上床吖嘛、去做雞呀！
家暴升級，梁齊昕頂唔順，決定要離家出走兼跳樓，更一度在禮賓府露台倒抽一口涼氣，神情落寞。本刊當日早上致電梁齊昕，她親認要離家出走：「我都咁大個，我唔住屋企」
同日下午，特首梁振英罕有地召開記者會，承認女兒有情緒病，「我哋喺英國、香港都不斷陪佢睇醫生，佢受到好專業嘅照顧，希望佢能夠繼續聽醫生囑咐，早日康復。」但另一邊廂，齊昕卻在 Twitter爆料：「佢哋同我注射啲嘢，我希望係鎮靜劑。」
禮賓府發呆
有𠝹手自殘前科的梁齊昕，本週二繼續上演大龍鳳，不停在 FB更新狀況，自爆：「唔喺禮賓府即跳！」之後殘爆在禮賓府露台閒逛，引嚟大批記者守候，警察及救護車亦奉召到場戒備。搞出自殺風雲，梁齊昕表示由十四、十五歲已經開始同家人「打仗」，覺得若要有更好的生活及幸福，必須離家出走。
齊昕對屋企的怨恨有增無減，連環在 FB貼文發功，爆被阿媽腳踢，因而跌倒背脊撞向書枱角，更說母親表裡不一，甚至指自己不能像正常市民一樣報警及使用公立醫院服務，唯一出路就是逃離家園，她寫道：「 Never coming back.」
本刊星期二早上致電齊昕，問她現況如何？「我 OK呀。（真係會離開屋企？）係呀。（發生乜事？）咁我都大個啦，我唔住喺屋企嘞。」
問到屋企人會否擔心時，她便叫記者找公關鄭紹康，記者想再追問下去，她便以接另一電話為由掛線。記者再致電齊昕，問她會搬去邊？她焦急說：「我真係唔講得。（你阿媽對你做過咩？）唔好意思，你問 Francis，我唔方便講太多，真係唔好意思。」問她會否出來交代？齊昕索性掛斷電話，而 FB文章出街後，齊昕的戶口亦一度「被消失」，記者致電 Francis，他說：「我今日未同佢聯絡，晏啲會打俾佢。」
迷足幾日
其實自上週六（三月十四日）齊昕出席愛滋病研究基金會活動時，行為已經出現怪異，黐着布景板而行，挺胸、拗腰兼使出迷幻眼神影相。入到場內，她亦頻頻集郵，分別和 Paris Hilton、劉嘉玲及薛芷倫等人合照。當晚大會設有拍賣環節，其中一個項目是可以同荷李活巨星里安納度．狄卡比奧共進晚餐，齊昕不停舉手競投，但直至公關提醒她拍賣以美金計算，分分鐘要千萬港幣埋單，齊昕才無癮收手。
到週日（十五日）禮賓府舉行開放日，忽然閃出來的齊昕再被市民圍住狂影，要警員扶她返入屋。齊昕詭異行為，最終搞到特首老豆要出來解畫：「佢住禮賓府，禮賓府公務活動多，唔係好有利佢休息，導致佢有情緒起伏……為咗保護自己個女，我哋一直冇公開，甚至朋友度都冇討論佢個人情況，我懇求大家俾多啲空間同時間，俾佢早日康復。」他同時否認曾對女兒動粗，「我返去同佢有傾偈，佢情緒逐漸平復落嚟；只有子女說父母的不是，沒有說子女不是的父母。」
每週傑作
身為特首女兒，梁齊昕唔賣矜持，鋪鋪舉動驚人，由去年在臉書為政治立場跟網友及杜汶澤隔空開拖後，齊昕走紅至今。之後癲喪巨作近乎月事，鑊鑊新鮮，橫掃港聞娛樂頭條，冇人夠佢勁。
14年 6月割手自殘
仍在英國留學的她在臉書放割手自殘流血相，之後特首父母拿拿臨補鑊，飛到英國影「幸福照」，相中齊昕同龍蝦媽玩交換鞋著。
7月鬧爆老母
呢頭跟龍蝦媽扮 friend，轉過頭在臉書公開轟母：「勇氣和忠誠均是我最重視的美德，我母親卻體現了這兩種美德的反面。」夠爆！
8月又嗌自殺
每月出事的她，又在社交網站寫上：「跳樓吧！」及「死，驚什麼！」，坊間盛傳她患上抑鬱。
12月做專訪笑龍蝦
恨見報的她，接受報章專訪承認自己想做 model，又話自己性格反叛。對於母親被嘲似蝦龍，佢忍唔住話：「幾好笑！」激死阿媽！
15年 1月爆家醜
踏入新一年，齊昕喪爆行為更進一步，接受有線專訪，爆父母干預交友，暗踩老豆思想落後兼專制。結果訪問出街後，齊昕突然「人間蒸發」，社交網站被接管，報稱暫時離開香港。
2月復活重擊 689
呢頭俾人滅聲，轉頭齊昕在中環蒲頭復活，吹佢唔脹！並重掌帳戶大權，留言：「 Be yourself」，同老豆玩對抗的她形象大翻身，由網民圍插變成圍撐。
2月接拍三級片
唔爆唔做嘅佢，處女作竟然係接拍三級片導演劉俊輝執導，李逸朗男主角，曹查理、陳惠敏有份主演嘅《男極探射燈》。不過簽晒片約，收埋片酬嘅佢玩 no show，之後失蹤唔覆機，搞到電影胎死腹中，導演公開炮轟。
|
鍾意就快D Share啦！
|
|
|