阿佘絕對是目前大台裡面最適合演呂后這個角色，同樣夠晒霸氣。
探熱針
貨不對辦 怕接錯膠劇 霸氣阿佘拒拍《呂后》
去年一套《使徒行者》，成功令佘詩曼再做雙料視后，榮升大台鎮台之寶，今年開拍重頭劇《呂后傳奇》，屬意再由阿佘孭重飛做女主角，希望可以仿效范冰冰的《武媚娘傳奇》成為話題之作。
但臨開拍前唔夠兩個月，阿佘突然辭演，理由是頸傷未完全康復，唔可以長時間戴重量十足的古裝頭飾。因病辭演，但據知阿佘知道劇本由原來的宮廷鬥爭變成講呂后愛情悶史，為免拍膠劇打爛視后招牌，阿佘企硬唔接，而其他花旦亦無人肯執手尾，最終令《呂后傳奇》胎死腹中。
詐病推劇
上年十月大台在《 2015節目巡禮》中向廣告商大事張揚，今年將會推出古裝重頭劇《呂后傳奇》，當日女主角阿佘更以全副古裝出現，氹客戶落廣告。
一切準備就緒，《呂》劇原定四月埋位開工，但臨開拍前阿佘突然同公司講，因為頸受傷未完全康復，唔想戴住十幾磅古裝頭飾，加重頸椎舊患傷勢，決定臨時辭演，就算大台出動到高層曾勵珍多番游說，阿佘照樣企硬。
健康雖然無價，但阿佘推劇其實另有原因。眼見國產劇《甄嬛傳》、《武媚娘傳奇》套套大收，出名是是但但的大台，於是照辦煮碗複製以女性歷史人物的宮鬥戲，再搵一直想開拍呂后故事題材的李添勝（添哥）做監製。
宮鬥變談情
宮中明爭暗鬥一向有市場，但原來添哥心目中只想拍呂后一生愛情故事，加上他較早前作品《神探高倫布》、《宦海奇官》收視、口碑全仆，就連《巾幗梟雄 3》亦因為劇情膠味太重，搞到播出無期，因此大台要縮減製作成本，有氣勢大場面 cut得就 cut，變成古裝文藝愛情片，隨時又變成一套膠劇。
「阿佘原本對部劇好有期望，成套戲都以佢為主，覺得好有發揮，點知收到風知道內容變晒樣，知道出嚟實瀨嘢，梗係推都推唔切啦，以阿佘今時今日嘅地位，佢喺公司有權 say no，班高層都無佢符。」一名幕後工作人員說。
急 call周麗淇
阿佘唔拍，大台即刻搵花旦補位，原本首選胡杏兒，但她即將約滿走人，寧願爭取時間拍拖好過拍劇；到楊怡接三攤，可惜同另一部劇撞期接唔成，最後添哥退而求其次，搵未夠班的周麗淇幫手，點知因為臨時臨急，已有另外工作在身。
阿佘臨時甩底一鑊蹺起，最終《呂》劇要胎死腹中，短期內無法開拍，而阿佘同原本《呂》劇男主角黃浩然，四月將接拍另一部由徐正康監製的時裝愛情喜劇，填補原有檔期。
|
鍾意就快D Share啦！
|
|
|