12/3
獲准保釋的吳綺莉外出返家時一頭濕髮，見記者表現緊張，並用手掩面衝入屋。
探熱針
戒唔甩 吳綺莉失戀失 job失常 卓林求助社工一年
上週三（三月十一日），涉嫌虐兒、並在寓所內搜出疑似大麻的吳綺莉，被捕後雖然獲准保釋，但截至本週二（十七日），親生女卓林，依然拒絕見阿媽。
九九年意外懷有「龍種」，兩母女原本打算長居上海重過新生活，但早年吳綺莉與母親反目，被迫帶卓林回流香港，而同一時間有指成龍停止支付母女生活費，吳綺莉馬死落地行，四出𢱑撈，可惜無份工做得長，經濟壓力爆煲，加上一二年結識立法會議員石禮謙，一心以為搵到長期飯票，結果食詐糊。
失戀失 job，多重打擊令吳綺莉情緒崩潰，更染上壞習慣，面對母親失常，同樣飽受精神虐待的卓林，原來一年前已向社工求助，可惜情況依然持續加劇，令母女關係面臨決裂。
社工跟進事件
據知卓林不止一次向老師求助，指母親酗酒，兩杯到肚後更向她「動手」，校方在過去一年一直關注事件，直至卓林萌生自殺念頭，老師覺得事態嚴重，於是報警。
「其實卓林大半年前已經同老師講過媽咪情緒有問題，成日打佢，老師有安排佢哋母女見社工，又同吳綺莉傾過，但情況一直冇改善，卓林嘅情緒亦漸漸大起大落，點知上個禮拜卓林話想自殺，老師怕搞出人命，所以幫佢報警。」知情者說。
根據警方資料顯示，上週三（十一日）下午五時十七分，接獲教職員報案，指卓林疑被母親襲擊，事後卓林被送到大埔那打素醫院留醫，吳綺莉則獲准保釋候查，其間警方在兩人的大埔寓所內發現小量疑似大麻。
教女手口並用
現身在醫院留醫的卓林，事發當日雖然並無表面傷痕，但情緒激動，拒絕與母親見面，吳綺莉亦承認卓林拒接電話及回覆短訊，為免雙方關係進一步惡化，卓林暫時交由社會福利處接管。
卓林入院翌日下午，外籍老師帶同食物及蛋糕到醫院探望，更在病房外不斷四處張望，警覺性甚高，直到探病時間完結，老師亦未見離開。
自認嚴母的吳綺莉，曾在訪問中直認會體罰卓林：「我係會體罰，試過用皮帶打佢屁股，又試過罰佢頭頂《辭海》企三個鐘。」吳綺莉教女，以「惡」行先，但對於已經十五歲、進入反叛期的卓林，只會帶來反效果，令母女關係日漸疏離。
「卓林一向比較男仔頭，愈大愈自我，唔係咁聽人講嘢，可能家庭背景比較複雜，喺學校唔多朋友，又唔會主動同人傾偈，成績一向麻麻，又成日交唔齊功課。」
吳綺莉性格火爆，早年因為與母親鬧翻，才孤身帶卓林回流香港生活。有指當時成龍要求兩母女離開香港，因吳綺莉違反承諾，故拒絕向兩母女支付每月十萬元的生活費，要自食其力，吳綺莉只好四出𢱑撈，試過加盟無綫拍劇，到過商台開咪，可惜無份工做得長，收入有限，但同時要供樓供車，又要支付卓林學費，一闊三大，經濟壓力爆煲。
「佢加入數碼電台，開頭同劉美娟、龐愛蘭做節目，一星期做足五日，有成四萬蚊一個月，但有一次做做吓節目，佢走咗入廁所，之後有人見到廁格冒煙、傳出怪味，於是同公司投訴，卒之吳綺莉俾人『燉』咗去做錄音節目，月入得番幾千蚊。」知情者透露。
一二年，吳綺莉在飯局中結交了財力雄厚的立法會議員石禮謙，即使對方已有穩定女友，吳綺莉依然積極埋身，更試過半夜三更登門造訪。
「佢明知人哋有女朋友，仲不停咁打電話，一日之內 send過百個短訊俾人，見對方唔覆，竟然三更半夜去人哋屋企拍門，嚇到石禮謙即刻斬纜。」知情者說。
發爛渣
面對連串打擊，令吳綺莉情緒崩潰，要靠酒精麻醉，終被卓林揭發報警。事發翌日，獲准保釋候查的吳綺莉外出後返歸，冇化妝、一頭濕髮的她，見到記者大為緊張，用手掩面急急腳衝入屋，並否認涉藏毒及虐女，「冇咁嘅事， OK？你哋唔好用啲無中生有嘅嘢夾硬咁話我……小朋友有時都會曳，曳就會做錯事，大人就會去處理。」
直至事件通天，吳綺莉才承認有酗酒、打女惡習，兩母女日後能否重修舊好，還看吳綺莉是否能戒掉女兒眼中的「壞習慣」。
成龍冇得卸責
一般虐兒個案會根據案件的嚴重性，決定受害兒童是否須要交由社會福利署接管，施虐者有可能觸犯《侵害人身罪條例》被判監禁。伍家賢律師表示：「社會福利署係有機制去決定點樣看管個小朋友，如果去到社署看管，通常涉及到比較嚴重嘅個案，要睇小朋友意願，如果佢唔想見家長，同時又有證據指向個家長有虐兒，呢個情況下，家長好難會見到個小朋友，如果要見，就要同法庭申請。社署可能會聯絡佢嘅親人或者近親，睇吓往後日子點樣安排，以小朋友最佳嘅福利為依歸。媽媽虐兒，可能爸爸冇虐兒㗎嘛，呢啲警方會去調查。父親唔能夠話唔照顧就唔照顧，佢有責任㗎，最終都係由個法官去決定個小朋友將來點樣安置。」
|
鍾意就快D Share啦！
|
|
|