Mao Ting（右）係李顯龍幼子李浩毅（左）拖友。（ The Unseen Singapore圖片）
中環人語
李光耀喪禮 神秘女子現身
新加坡國父李光耀嘅成功在於有危機感；呢份危機感亦成為李家第三代嘅感情障礙。李光耀喪禮上出現咗一位神秘女子，成為坡人談論對象。此女子企喺總理李顯龍老婆何晶旁邊，長髮披面，遮遮掩掩。
經網友大起底，原來佢係華人，叫 Mao Ting，係李顯龍幼子李浩毅嘅拖友。呢位 Mao Ting，英文名係用普通話拼音，而非當地華人會用嘅福建拼音。咁就弊當地人而家最擔心嘅，係佢是否來自大陸？從而推論出，新加坡嘅國家機密，會否因此洩露埋俾中國呢？仲有人懷疑佢係咪毛澤東後代！ Mao Ting曾經讀過 MIT，而家擔任商業顧問；但幾叻女都好，出身始終過唔到一般坡人嗰關。嘿，咁都好符合當地畏共嘅國情嘅！
啤梨唔見一籮穀
前商交所主席張震遠 Barry，已行到山窮水盡，既被人告破產，又因欠薪單官司可能要洗定個 pat pat，佢仲有面見街坊咩？由是佢住開嘅淺水灣道 115號亦要退租。啤梨張住咗嗰度四年幾，三千呎地方，無敵海灘景；本來交開十七萬租，商交所出事後，話搬又唔搬，用十六萬續租，不過改用老婆名囉。兩星期前佢終於執拾細軟搬離豪宅，據現場目擊嘅八卦公講，佢用咗兩架大貨 van搬嘢，搬出來嘅都係大大件傢具。仲要拎晒去棄置，真正大屋搬細屋，唔見一籮穀。啤梨張仲同人講，雖然只係租，都用咗百幾萬裝修，好鬼唔捨得！但小宗都係嗰句，早知如此，何必當初？
中環寸嘴
工廈大王楊耀松長子，是各大有名食肆之 VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。
楊少開鮑魚餐
嘩，見到「家傳七福」喺報紙賣廣告，有半價鮑魚同燕窩食。哈，舊年見佢同滙豐咭做八折優惠，已望佢會做七折同福臨門迎戰，卒之俾我望到，不過我楊少都跌眼鏡，估唔到佢做五折喎，睇嚟個市都幾唔掂；唔好理，仲唔叫埋親朋戚友嚟食平價鮑魚。
七福今次做特價鮑魚雖然係出自日本岩手縣，即係福島對上，不過我收到料，呢批特價鮑魚係七福嘅七哥，同福臨門五哥分家後，分得嘅「資產」，肯定係舊貨、 3.11之前嘅。你估我蠢㗎！擦得鮑魚，梗係無蝕底食埋佢特價燕窩啦，有杏汁同椰汁俾你自己溝，鍾意濃啲就加多啲椰汁，鍾意清啲就加杏汁，我就鍾意兩溝。臨尾點咗籠麻蓉包外賣，鬼叫佢平咩，等我啲祖先都嘗吓七福嘅甜品嘛。
個部長又幾識做，開住電視俾我邊食邊睇，家陣唔睇亞視遲啲冇得睇，播緊《世紀之戰》，睇得我幾入神，有秋官、劉青雲；講股票大鱷交鋒，唔好話我唔醒你啲讀者，恒指剷到上兩萬五千幾點啦，小心有丁蟹效應！
埋單時，個部長話叫我多啲來撐吓佢喎！唓，撐佢，你估我同佢有一腿咩！抵食咪撐囉！我唔會同錢作對嘅。
高官師傅的遺憾
曾是多名高官師傅的前行政立法官守議員何鴻鑾，上月廿五日在英國 Norfolk的護老院病逝，享年八十七歲。呢位貴為賭王何鴻燊堂弟又係全港第八位政務官曾說過：「能為香港服務很榮幸，最遺憾是未能留錢給下一代。」在他眼中，退休公務員等同退役軍人，退休後不再問政事，更遑論加入私人機構當什麼顧問、董事，沒錢留給下一代才顯得貴格。只不過，佢膝下門徒除了任關佩英、陳方安生；還有曾獲他讚賞「勤力搏殺」嘅當奴，以及「交際手腕強」嘅肥龍許仕仁；呢兩件前高官，相信比起何鴻鑾未能留錢給下一代，可能更遺憾。
金牙大狀講嘢 假平等之名而搞歧視
小肥張•張建宗話打算按不同場所嘅男女使用比例，增加女廁數量以促進婦女權益同兩性平等云云。此議贏得女士歡心，自不待言。各位，唔好理做唔做得成，民望就係咁搶番嚟㗎啦。
唔少商場嘅設計，原先都係男女廁所數目各佔一半，以男女人口比例嚟睇，堪稱絕對平等。弊係弊在冇照顧到男女使用廁所嘅時間有別，以致不時令到女廁大排長龍。家吓小肥張假平等之名，主張重整男女廁所比例，唔好理咁做法幫唔幫到啲女士們，男廁數目肯定會相對少咗，咁又係唔係性別歧視呢？
按男女人口比例起廁所，唔夠平權、平等，要按使用廁所嘅時間長短至算平等。但幾時至會人有三急，係個生理需要，而非由性別決定；男廁少咗，對要去但去唔到嘅男士，又公唔公平呢？平等、平等，多少人因汝之名而被歧視！
中環人語迷你版
＂抽水抽到石，砸親自己隻腳。＂
估中邊個中環人講呢句說話，送你 Jwatch J-33藍寶石鏡面限定版手錶一隻有意參加者，請於四月八日（星期三）下午一時後，將答案、姓名及聯絡電話電郵至centralman@nextmedia.com小宗只接受電郵，郵寄免問。
本刊員工及直系親屬不得參加。
為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於下期本欄揭曉。
廣告時間
你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp:6829 5929
|
鍾意就快D Share啦！
|
|
|