爆壹爆
勝和高層避風頭
警方對付黑幫，最常用方法係派出臥底（針）潛伏大佬身邊搜集證據。聽聞每個幫派入邊，都最少有幾個臥底，真係梗有一個在身邊。
和勝和其中一名坐館子騰，兩個禮拜前就中咗「針」，被埋伏身邊超過一年，扮古惑仔嘅臥底探員「篤背脊」，指證佢從事黑社會活動。
話說兩個禮拜前， O記採取大規模反黑行動掃勝和，子騰唔知係咪收到風，行動開始前一刻，突然決定漏夜離港，但搜捕名單早已傳達，子騰經落馬洲出境時被捕。而佢三名頭馬「雞髀」、「細飛」及「歐銘」，之後亦陸續被拘捕。警方並搗破勝和三個武器庫、一個製毒工場及賭檔等。
爆哥又收到風，子騰被捕消息傳開後，一眾勝和高層都好緊張，雖然知道今次差人目標人物係子騰，但同一個社團，都驚會燒到埋身，捉返去問話係常識，仲分分鐘要逼佢哋爆料就大劑。
正所謂古惑仔有着數就聚，冇着數就散。為免麻煩，多名勝和大佬輩人物，事發幾日後匆匆離港，相約去東南亞避一避，順便當遊埠。而同子騰關係密切，當初掟錢捧子騰做坐館嘅「勝和太上皇」囝囝，有傳話佢事發後失蹤，差佬都搵緊佢。
捉臥底
另方面，臥底行動收網後，部分勝和古惑仔嘅 WhatsApp群組，近日開始玩「誰是真兇」遊戲，大家都在調查誰最有可能係臥底。呢兩日就流傳一張疑似臥底嘅生活照，大家都肯定係呢個人，仲話一行動後佢就消失，爆哥都見過疑似臥底張相，係個金毛，加個都敏俊髮型，望落都非常 MK。
講開勝和都有一個「魔咒」，就係每逢做過坐館，下一站就係坐監。好似前坐館「上水皇帝」白頭仔、「崩嘴崩」及陳安等都係咁下場。所謂槍打出頭鳥，警察無非想借成功拘控坐館來打壓黑幫氣焰啫！勝和現任話事人，除咗子騰外，仲有沙田 me、肥堅同埋 band仔光，佢哋都會喺出年三月卸任，相信會逐個被差人問話。
針無兩頭利，雖然話做得坐館預埋坐監，但個名響了朵，就唔愁冇老闆關照。所以而家勝和好多古惑仔吼住坐館呢個位，不斷狂擦幫內老叔父對鞋，搏佢哋舉手投自己一票喎，正所謂富貴險中求，出得嚟行，預咗要還。
洗米華送法拉利俾男人
上週澳門政府宣布，委任洗米華（周焯華）為澳門文化產業委員會委員，嘩！洗米華已經係政協委員，今次仲進入埋澳門官方機構任職委員，佢呢期真係紅到爆燈。爆哥十幾年前行江湖嗰陣，洗米華仲係喺回力賭場撈疊碼仔，十年人事幾番新，依家成日上封面，仲入埋政府做貴人，真係唔講個服字都唔得。
洗米華仲有段古，話說除咗對女朋友豪爽，對男性朋友一樣出手闊綽。幾個月前，洗米華就送咗部白色法拉利俾個老死。此人是誰？原來係新義安尖沙咀話事人細 B。
一個係澳門賭業猛人，一個係香港古惑仔，兩人究竟有咩關係，洗米華仲要送靚車咁大手筆？等我爆哥又爆料啦。原來洗米華同細 B識咗十幾年，當年洗米華未過澳門撈疊碼時，係喺佐敦嗰間 348 Disco搵食，而細 B又經常帶班兄弟去 348蒲，兩人因而認識。由於當時洗米華未彈起，手下唔多，每遇上麻煩事，細 B都會毫不猶豫幫手，出錢又出力，兩人因而成為好朋友。就算洗米華後來去咗澳門搵食，做埋賭廳老細發咗達，都仍然同細 B有聯絡，可謂有情有義。所以話，富貴冇深交，落難先見真情呀。
港女潮飲威士忌
爆咗兩單黑幫秘聞，講番少少輕鬆嘢。呢排威士忌熱潮愈炒愈熱，搞到連日本機場，都決定唔再賣本土威士忌，留番高年份嘅酒俾本國嘅人，費事俾外國人搶晒啲貨喎，就可見群情洶湧啦。
四周缺貨唔緊要，爆哥朋友多，近排頻頻獲邀請，出席咗唔少試酒會。最開心係上週二，爆哥又去咗一個試酒會，仲識咗保利香港拍賣嘅靚女品酒專家鄭昀㬢（ Xixi），同靚女摸住酒杯底，特別醒神，大家仲分享咗唔少飲威士忌心得。
Xixi話依家真係多咗好多港女轉飲日威，事關港女搵銀能力高，錢多自然咩都試吓，「我好喜歡食雪茄飲威士忌，啲男士見到，會話 so cool。」不過 Xixi話好多人未必識酒，吓吓都一開口就講價錢，「識飲酒嘅人，唔會睇價錢，只會睇鍾唔鍾意飲呢支酒，呢個係咩 style。講價錢係最簡單，但亦係最易出賣咗你識唔識飲酒嘅標準。」
為免在人前出醜， Xixi仲話，唔好一開始就追 17年或 21年高年份，應該由 12年入手，慢慢培養興趣先。而且佢建議多去高級餐廳，喺人哋個餐牌度偷吓師，就知道邊啲系列係最多人飲。其次當然就係買多啲、飲多啲啦。對呢點爆哥當然舉腳贊成，冇咩事多啲約出來飲杯呀，交流交流嘛，呵呵。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|