偽娘風在港吹得熾熱，披上女裝的妖男，擺出嫵媚的甫士，拍下大量相片，在網上發布，陶醉在網民的 like與讚美之間。
壹號專題
絕世妖男自白
「偽娘」出自日本動漫界，意即一班毒男扮女自娛。
男人穿起短裙、黑絲襪、高跟鞋，戴上長曲假髮，塗抹濃厚化妝品，由雄赳赳之輩，變身成嫵媚婀娜的女兒家。
從前，偽娘是小眾玩意，他們只會躲於暗處，自我陶醉，近年因網絡發達，人人都心癢癢，將自己放上網公諸於世，用 like來量度自身價值。
他們愈來愈出位，性別身份也變得撲朔迷離，享受女兒身，但又沉迷男性興奮。
連日本駐華首席公使和田充廣也好此道，今年二月大使館內舉辦的員工聯誼會，公然穿上女裝，打扮成人氣少女組合 AKB48的模樣，結果被日本傳媒揭發，即被召回日本，提早結束任期。
其他人沒有身份顧忌，則大踏步走入主流社會，係呀，我就係鍾意扮女人。
香港偽娘相繼走出小眾暗角，他們把扮女人的相片瘋狂放上網，並提出以偽娘之貌接私影工作，滿足曝光慾同時又能賺快錢，一舉兩得。
網上一出，熱論隨即四起，有網民嗌晒救命，鬧爆偽娘︰「男人唔做，去做人妖。」
亦有人表示百般欣賞，支持偽娘做自己，不用理會別人目光。
披上女裝的妖男，毀譽參半，為解構這股風潮，本刊追訪了五名本地偽娘，在谷奶晒腿背後，他們內心究竟存在着什麼渴望？是男是女，還是雙性同體，由他/她們自行揭開。
偽娘們都不介意接受訪問，但全部都堅持，只能以女兒身裝扮亮相，因為願意在人前表現的，都是貪靚的偽娘身份，化妝品遮掩下的男性本尊，並不重要。
在網上私影群組中，最火紅的一定是僅穿性感黑色胸圍加內褲，趴在床上高翹臀部的 Christina Babie，獲得二百多個 like之餘，更有網民留言指「每看一次都想入非非」，甚至是「想問龍友攝影師幫你影嗰時，有冇忍唔住搞你？」
連串熱血沸騰的留言下，細心一看，原來 Christina講明自己是偽娘，更自詡「有波，有腰，有線條，歡迎約拍」。
雌雄同體
記者相約見面， Christina在電話中開門見山講明，收費一千元影六小時，可拍短裙及性感內衣照，不過就要半個月後先影得， Christina揚言你估我好得閒呀。「好多人搵我私影嘛，多個週末都約滿爆棚喇。」
輪籌至上月尾，記者終於得見 Christina廬山真面目。
在佐敦的一間化妝學校內，記者見到早已穿上白色恤衫、黑色短裙的 Christina，坐在一排化妝燈前，紮起頭髮，任由化妝師在其面上塗脂抹粉。
突然，場內傳出一把老牛聲︰「唔使夾眼睫毛啦，我嗰啲咁長。」記者感到一陣突兀，定一定神，才想起男人聲由 Christina喉嚨發出，當真雌雄難分。
變妝完畢，身形瘦削、束起及肩黑髮的 Christina，驟眼看上去，與普通少女無異。
Christina帶記者去到紅磡海濱長廊拍攝，搔首弄姿後，他舉腳轉換坐姿，竟春光乍洩，一陣冷風揚來，不幸露出了孖煙囱內褲，風吹起其短裙時，還見那大腿上剃不清的黑色腳毛，掩掩揚揚。
記者看清楚，女裝底下，仍是不折不扣的男兒身。
戴胸圍自瀆
今年二十一歲的 Christina，多番強調自己「唔係女只係扮女」，他真心愛女人，超級鍾意𥄫女，並且十分鹹濕。
「中學時期，個個男同學都睇四仔，咁我都睇埋一份啦，睇完就會攞阿媽啲胸圍嚟戴，仲會塞啲襪和底褲落個杯罩，然後幻想自己係女人，搓胸自瀆。」
愈說愈興奮，他更自爆為了完美易裝，取得最高的性滿足感，可以去得好盡，「四仔啲女主角無體毛，所以我都學佢哋咁，將全身體毛剃掉，撫摸到自己啲皮膚好滑好白，我就有性興奮。」記者問他是否某某精神病例中的自戀傾向，即自己裝扮成理想中最完美少女形象來達到自我滿足和高潮之類，他說咁深奧又沒有仔細想過。
其實與一般宅男一樣， Christina喜歡看色情片之餘，亦熱衷玩線上遊戲，十七歲時，更曾譜出過一段網上情緣，「上網打機追過女仔，大家好好傾，又會約埋時間一齊打機，最後終於鼓起勇氣，喺個 game度打字話鍾意佢，想同佢一齊，點知被佢一口拒絕，真係超樣衰。」
Christina自認是溝唔到女的毒男，被拒絕後，令他對傳統的男女關係卻步，「我唔會再嘥時間，唔想再被人拒絕，自瀆同叫雞，先係王道。」
叫雞解決性需要
溝唔到女，又日日睇四仔，性慾自然旺盛，一直忍到十八歲， Christina決定送一份特別禮物獎勵自己的堅毅，「我好肯定自己係鍾意女人，為咗失身，我生日後兩個月去咗叫雞。
「我十八歲生日諗住終於可以開齋喇，咪落咗砵蘭街嘅一樓一叫雞，第一次係個身形豐滿，三十幾歲嘅阿姐，搞完先發現唔係我想要嘅感覺，我覺得啲女人唔夠完美。」
首次叫雞後，與預期的相差太遠，「啲雞完全唔符合我心目中靚嘅準則，我覺得自己扮女人，先夠靚夠完美，先滿足到我。見到靚女時，我會幻想自己變成佢個樣，然後自摸。」
說得一面陶醉， Christina顯得很滿意自創的解決性需要方法。最終，他發現還是留在家中暗處，偷戴阿媽胸圍，鏡前的他對住鏡內的她，哇，好興奮，性慾得以滿足。
父母無關心過我
Christina認為一直以來，扮女人是他宣洩性慾的不二法門，根本不用理會旁人目光，「我又無搞人，只係自娛之嘛，我唔會理人點睇囉，你理得我呀。」
兩年前畢業之後， Christina做過兩份工作，第一份是速遞員，搬貨太辛苦，不久便辭職，轉做辦公室助理送文件，月薪一萬元。工作沉悶，時間及錢都花在扮演偽娘及揸車周圍去，「呢啲都係我可以掌握到嘅事。」
工作沒滿足感，只有做偽娘時，他才會感到自豪，「每次我 post相上網，都好多人讚，嗰刻真係好開心，咁大個人都未試過覺得自己咁成功，尤其啲人讚我啲相性感時，我特別興奮。」
在偽娘同道中， Christina得到前所未有的認同，反觀家中父母，卻是他口中的壓力由來。
「我阿爸阿媽一早知我鍾意化妝著女人衫，仲試過搵個基督徒親戚輔導我，諗住用宗教改變我嘅行為，但佢哋根本唔明白我，夾硬逼我聽都無用㗎。
「有啲親戚每次見到我 Facebook有新相，就話俾我父母聽，佢哋聽一次，鬧一次，但從來無關心過我咩原因。」
他說做人要的是開心，不是要聽道理。
黑絲下的青筋
少年人迷惑，扮成偽娘滿足身心，今年二十九歲的晴晴的故事更奇特，雖已為人夫，即係有老婆，但仍享受以女裝示人，甚至收取五百元一次，做龍友的攝影對象，為的是滿足潛藏在基因中，想成為女生的渴望。
身高五呎九吋的晴晴，走性感女人路線，他穿著貼身短裙，腳踏三吋高跟鞋，臀部隨步伐左擺右擺，經過他身邊的人，無不投以注目禮，更有阿伯面容扭曲地回頭張望。
甫見面，他便刻意吊高聲線扮女人︰「你叫我晴晴啦，呢刻我嘅身份係女仔。」
隨後他又嘟起嘴問記者︰「你話著唔著黑絲襪好呢？」目光應聲轉到他的雙腳，粗壯的腳筋，一條條爬滿他的小腿，唔講以為做地盤出身。
眼見記者眼光呆望其腳上青筋，他承認為掩飾一雙男人腿，必須去公廁穿上黑絲襪。
一身女裝打扮的他，正打算推門入男廁之際，迎頭出來的阿伯即耍手擰頭大喝︰「喂！你老 X，呢到男廁嚟㗎！」
晴晴隨即後退幾步，左顧右盼，其實相當高興又不知如何是好，未幾才尷尬地步入殘廁變身。
唔俾得老婆知
記者問他可否展示男兒身，他即大為緊張地說︰「一定一定唔得，如果被老婆知道，離婚都似。」變成女人老婆就看不出？記者不相信，他解釋其實老婆不會去偽娘圈子看 post，所以不會知。自欺欺人，老婆不當面踢爆罷了？他不願回答，但堅持不以男兒身亮相，或是他對老婆最後的尊重。
他自言扮女人已有一年多，其間從未被老婆發現，「啲衫收埋晒喺櫃桶底，老婆唔會摷嘅，若果真係不幸摷到，咪話係買俾佢㗎囉。」
那些著到又霉又舊的黑絲襪高跟鞋，真能成功過骨？他說︰「到時先算啦。」
晴晴喜歡把女裝相 post上網，與同好 share，享受被讚扮得似女人的滿足感。他自言有兩個 Facebook賬戶，男女身份各一，「老婆唔係偽娘圈子，唔會接觸到，所以喪 post相，都唔會俾佢知。」
晴晴老婆日間上班，而他則是晚間酒吧調酒員，就靠這晝夜間的罅縫，讓他能在男女之間游走。
「每次我離開屋企，都係男人身份，所有女裝衫同化妝品，就帶晒出街，去殘廁先換，返屋企之前，我一定會先變番晒做男人。不過有時老婆唔喺屋企，我都會搏懵喺屋企變裝做女人，過吓癮。」
不時以女妝打扮到酒吧飲酒作樂，晴晴自言曾接受男同性戀者追求，二人會撐枱腳食飯，又會電話傳情，互相關心，「聽到佢對我噓寒問暖，好冧㗎，不過一諗到男男性行為，就接受唔到，我同老婆嘅性生活，好正常㗎。」
坐在公園長椅上，晴晴煙不離手，他透露是家中獨生子，從小到大，都被灌輸男人要有承擔的觀念，「做男人好辛苦好大壓力！成日都話讓吓啲女仔，樣樣嘢都話女仔唔使做，男人要承擔乜乜乜咁，點解一定係咁啫？我都想做吓弱者，俾人保護吓。」
偽娘界女神
受訪者中，扮得最似女人的，一定是偽娘界女神 Angela，當然，他亦是一個貨真價實的男人。
Angela與好「姊妹」 Suki及 Richal，每月總會一聚，扮得靚靚，相約外出互影。
今次他們去到深水埗南昌公園，穿上華麗的 Lolita宮廷服，擺出嬌柔的姿態，啪啪啪影個夠。
當日同行還有兩名男龍友，每影一張相，都笑意淫淫地望着相機，顯得十分滿意。
網上有不少偽娘，把少女私影潛規則，直接套在自身上，每當獲約私影，都會問︰「你影完係咪想同我咩咩（不道德交易）？」
今年二十六歲的 Angela，是今年私影界的焦點，隨便放一張偽娘打扮的相片上網，都有近三百個 like，可見群情洶湧。
身高五呎十一吋，擁有纖幼長腿、瓜子面形，配以鬈曲長髮及娃娃大眼可愛妝容，動作溫婉細膩，難怪網民甚至形容他為「公主」。
Richal及 Suki亦悉心打扮，前者穿上女僕服，加滿頭髮夾和特濃眼睫毛；後者著上藍色水手裙，戴上誇張的啡色假髮，躺在草地上擺出各種可愛甫士，任影唔嬲。
我有女朋友
Angela自言一年前開始打扮成偽娘，瘋狂影相放上網，「我本身鍾意攝影，都有約過 model出來私影，但啲女仔無氣質、港女又 MK，唔合我心意。我見到網上好多偽娘 group，覺得幾得意，咪試吓學人扮到女仔咁，反過鏡頭影自己，就咁就走上偽娘之路喇。」他自認氣質比一般女人更高，影相出來靚過唔少女人，每次睇相都好有滿足感，十分自戀。這點記者認同，不講真以為她是靚女。
Angela多次強調，他百分之二百鍾意女人，更拿出手機展示他與女友的合照。
問可否刊登情侶合照，他說打死不能︰「女朋友同父母都知我影呢啲相，父母更加會笑笑口叫我拎條裙俾佢哋著吓，但我唔想暴露男仔樣，費事俾人覺得太出風頭，始終唔係人人都接受到我有呢種興趣。」
體諒並不代表完全接受，記者提出訪問其父母女友， Angela一口拒絕，怕他們被人訕笑。
拍照期間，有途人耳聰目明，聽到他們男聲女裝，大罵變態。 Angela和 Suki均表示不以為意，直言早已習慣受歧視，「世人活在框架內生活和思想，唔接受有另類興趣，呢啲只係凡人，而我哋只係比其他人出位，或勇於嘗試新事物的一群。」
解構偽娘
又到理論時間，香港大學精神科教授吳敏倫指，若要從女性內衣褲或女裝衣服等異於傳統服飾的行為，無論男人著女裝，抑或女人著男裝，都可界定為易服癖，以下是他對受訪偽娘的分析︰
戀物癖易裝 Christina
吳敏倫︰有啲似戀物癖，呢類人只係鍾意女人衫和內衣褲，正如睇三級片一樣，但佢哋要著上身先過癮，因為全身都可以觸摸，甚至自己著上身先有性興奮，感覺上好似自己係一個完整女人。
心因性易裝 晴晴
吳敏倫︰呢種人係由細到大因外來壓力、接觸的事物或成長因素，導致佢唔想做男人，萌生起逃避身份的現象，所以用易裝扮女人來卸退壓力。晴晴希望從扮女人的過程中，得到被人照顧、被體諒的感覺。
原發性易裝 Angela、 Suki、 Richal
吳敏倫︰他們喜歡穿女裝，覺得女裝比較好看，或者覺得自己穿得比女人更好看。
吳敏倫補充：「還有兩種偏門個案，例如天生有同性戀傾向而易服，或未確定自己生殖器官是男或女身份的雙性人。」
|
鍾意就快D Share啦！
|
|
|