34歲的黃寶龍， 19歲已經做人老竇，與前女友育有一名 16歲大的兒子。
娛樂喧
《大時代》童星起底 揭黃寶龍棄熟女嗒嫩口妹
最近深夜重播的《大時代》成為熱話更封為神劇，劇中主要演員受關注不在話下，就連小演員亦成為目標。
劇中飾演童年方展博的黃寶龍，話喊就喊好有演技，今日他已經 34歲，眼大大好上鏡，但他選擇繼承祖業經營二手書店。本刊收到讀者爆料，指黃寶龍未成年已搭上當年在大台為他 casting的大姐姐，兩人其後更加連仔都生埋，囝囝今年已 16歲。但黃寶龍一直不肯與年長 10年的女友結婚， 3年前認識嫩口新歡後，更結束這段長達十多年的姊弟戀。睇嚟童年方展博，冇成年方展博劉青雲咁專一囉！
早前在《大時代》其中一幕戲肉，方進新（劉松仁飾）被丁蟹（鄭少秋飾）打死，演童年方展博的黃寶龍目睹父親被打死，哭得七情上面，令觀眾看得心酸。
瞞屋企人交往
當年是童星的黃寶龍在現實中，亦有段不為人知的往事。讀者爆料指他早年發展姊弟戀，「黃寶龍當年去大台試鏡時識咗大佢成 10年嘅 Connie，到 17歲就同 Connie拍拖，之後仲一齊喺尖沙嘴利時商場搞韓國時裝生意。呢段姊弟戀冇人睇好，時裝店嘅 sales都笑佢哋係老婦配嫩夫，後來佢哋仲生咗個仔叫黃琮瑋。不過兩人一直都冇註冊結婚，連屋企人都瞞住，到個仔一歲時喺街俾親戚撞到先穿煲。時裝店嘅生意好好，高峰期開咗四間分店。幾年前黃寶龍識咗新歡，個仔就跟阿媽生活，時裝店生意一直下滑，依家執剩一間，黃寶龍冇再理喇，話返去幫阿爸手搞書店喎！」原來其感情生活亦如此戲劇性。
擔心兒子反叛
《大時代》掀起一股熱潮，劇中人物再被起底。上周四（ 30日），本刊記者前往西環的精神書局，成功捕獲黃寶龍。對於育有一子，他坦承確有其事：「係！我係有個仔，佢就嚟 16歲生日喇！我同前女友冇註冊結婚，亦喺 3年前分開咗，大家性格不合……個仔就由佢照顧，我同個仔過時過節都會見面同食飯。我唔後悔生仔，只係依家（分開咗）對小朋友有影響，因為小朋友正處於反叛期。」言談間黃寶龍對兒子有一絲愧疚。據知十年前黃寶龍曾帶同只有六歲的兒子參加模特兒表演，當時他還表示兒子很有表演慾，有望做他的接班人。
認定嫩口女友
現時黃寶龍已有新戀情，他不時在 facebook大晒與長髮嫩口女友的恩愛合照，更坦言對方是終身伴侶的人選。
不過原來他對同樣是童星出身的唐寧一直有好感。黃寶龍表示二人除於《大時代》合作外，更曾於電影《四個 32A和一個香蕉少年》演情侶，當時還獻出人生初吻，可惜二人識於微時不過電，「當時真係蠢，冇追過佢。見佢愈大愈靚，諗番真係走寶喇！」
離開娛樂圈已 19年的黃寶龍，現時投身父親經營的二手書店，每日他都會到書局打點。近年租金暴升，他表示書店生存空間愈來愈狹窄。咁有冇諗過重返娛樂圈呢？他說：「我都有興趣做番幕前，如果有劇拍我都想接。」
書局第三代傳人
「精神書局」前名「精神雜誌社」（下圖），是黃寶龍阿爺留下的心血，至今已傳到第三代，分別在北角及西環設有分店。但由於租金暴升，二手書市場狹窄，黃表示現時已做盡所有，希望業主手下留情，租金不要加幅太大，書局才能繼續經營。
|
鍾意就快D Share啦！
|
|
|
