掃呢頁CODE去手機

2015年5月8日 星期五

幕後人員爆 荷蘭外景等鄭嘉穎收工 陳凱琳父女戀嚟真 [忽然1周 - 1032] 凱琳,鄭嘉穎,嘉穎,陳凱琳,MW,



打頭陣

幕後人員爆 荷蘭外景等鄭嘉穎收工 陳凱琳父女戀嚟真

45歲鄭嘉穎與 23歲卜卜脆港姐冠軍陳凱琳( Grace)拍劇火速撻着,早前有傳媒更拍到陳凱琳直上嘉穎住所短敍,「父女戀」紙包不住火。

4月中,《殭》劇到荷蘭取景,兩個星期冇傳媒追訪,兩人更毫無顧忌發展戀情。據幕後人員爆料,陳凱琳為了方便與男友幽會,寧願自費也要獨佔單人房,兩人日日互等收工,夜晚更試過齊齊失蹤,直至深宵才返酒店,看來兩人戀情一日千里。求證陳凱琳,她死撐嘉穎只是「朋友」,不過一提「信徒處女論」,她卻反應甚大︰「你咁問我好唔舒服!」








雖然鄭嘉穎與陳凱琳年齡相距 22年,但陳凱琳卻強調︰「談戀愛的話,年齡不是最重要,二人合得來就可以。」女方開綠燈,嘉穎在荷蘭期間當然開行 turbo。雖然情史甚多的鄭嘉穎是花旦殺手,但據幕後人員爆料,現場所見,鬼妹仔性格的陳凱琳其實極為主動。

禁區連體

陳凱琳和鄭嘉穎上周末由荷蘭回港,兩人分別在機場被 fans集郵時,一方就乖乖企喺旁邊等候,相當 sweet。

Fans集郵揭真相

只要鄭嘉穎開工,陳凱琳就算冇份拍,都會去等鄭嘉穎收工。有 fans分別同佢兩個合照,清楚見到鄭嘉穎着戲服,而陳凱琳就着 causal wear,明顯陳凱琳唔係開工。

片場互等收工

「 Grace同嘉穎唔係咁多戲份,就算冇 Grace份,嘉穎拍嘢佢都會出現,仲特登攞埋部相機幫佢影花絮相。試過有個工作人員見 Grace等到戇居居,走埋去問佢做乜唔走,佢竟然甜笑指一指嘉穎,示意等嘉穎收工,證明佢都唔介意俾人知佢哋拍拖。不過唔只 Grace等嘉穎嘅,嘉穎有日早收工,都會搵啲幕後吹吓水,然後等埋 Grace一齊走。

「其實成班《殭》嘅劇組,差唔多晚晚都會聚埋一齊食飯,但 Grace同嘉穎就好少出現,唔使問梗係玩二人世界。有個同事有晚撞到佢哋凌晨兩點幾至返酒店,仲刻意前後腳行㖭。」一班台前幕後不用拍劇時,會約埋一齊去旅遊景點逛逛,更撩 Grace一齊去,但她經常以返房睇劇本為由婉拒。但當眾人以為她躲在酒店房,就買埋外賣給她,卻又發現她已外出,原來是去片場會合嘉穎。

鄭嘉穎貴為視帝,當地華人都認識他,搞到拍外景時常被街坊圍住集郵。

靚女自然有人追,曾與陳凱琳在飲食節目合作的「大隻仔」溫家偉,亦試過追陳凱琳。

喪影男友

就算一齊開工,只要鄭嘉穎收遲啲,陳凱琳都一定企埋側邊等佢收工,仲會幫男友影花絮照片。

宣示主權

有工作人員問佢做乜唔走,陳凱琳就會笑笑口,然後指住遠處嘅鄭嘉穎,甜到漏兼宣示主權。

插圖:王紹堅

獨立房間方便私會

轉單人房方便私會

為了方便同鄭嘉穎私會,陳凱琳加錢自己住單人房。冇父母在身邊睇住,佢開心到大晒牀照。

可能因為身在異地關係,兩人的防線放鬆,就算嘉穎有 fans探班,陳凱琳亦不避嫌招呼男友 fans。幕後人員更爆陳凱琳為了方便與鄭嘉穎私會,寧願自費獨佔一個房間。

「所有演員都係兩個人一間房,就算演員單數,都會夾埋 PA(助導)或導演一齊住,不過 Grace就要求自己一間房,佢同人講就話唔慣與人同房,不過估佢係唔想俾人知佢行蹤,方便佢同嘉穎約會囉。」

經過大半個月的相處,「琳鄭戀」更打得火熱,癡纏程度恍如連體嬰。周日( 5月 3日)《殭》劇組返港,出閘時僅得鄭嘉穎與同劇的陸永為伴,鄭嘉穎見到記者即時黑面走人,卻不見女主角陳凱琳,原來她已從另一秘道離開。因為避傳媒與女友分道揚鑣,又難怪嘉穎冇癮黑面啦。

機場連體嬰

不過有網民就踢爆在荷蘭機場撞正鄭嘉穎,當時其他演員已經入晒閘,鄭嘉穎被空姐拉住合照,陳凱琳就全程做跟得女友乖乖企埋一邊等候,陳凱琳等到男友跟空姐拍完合照,才雙雙入閘。就兩人在荷蘭不避嫌拍拖求證陳凱琳,她強調嘉穎是「前輩」、「朋友」,但就死撐冇拍拖。

記︰去荷蘭期間,同嘉穎感情係咪突飛猛進?

陳︰都係一齊拍劇,佢係前輩,對個個都好照顧。

記︰你自費住一間房,係咪方便拍拖?

陳︰唔係,我不嬲都要有私人空間,次次出 trip都係咁,方便啲。

記︰有 fans踢爆你冇工開都去片場等嘉穎收工。

陳︰都係因為嗰邊嘅車唔方便,所以我等埋大家啫!

記︰你同嘉穎依家係咩關係?

陳︰暫時仲係朋友,佢性格係唔錯。(不忘讚鄭)

記︰喺荷蘭有冇私下同佢約會?

陳︰冇!成日同大班人一齊食飯盒。

儘管陳凱琳唔認同嘉穎拍拖,但好姊妹陳嘉寶就不小心露口風。記者問陳家寶陳凱琳是否好少跟埋大隊食飯,她直認說︰「因為戲份嘅關係啫,同佢唔多戲。至於你問到佢有冇等嘉穎收工,可能係因為荷蘭嗰邊唔夠車,好似我拍完都要等,可能 Grace拍完未有車返酒店先留喺現場,特登等(嘉穎)我諗唔會啩!」

孖住合照

兩人一收工就二人世界,所以平日極少同其他人聚會。就算罕有地影大合照,鄭嘉穎都一樣要黐住陳凱琳,認真癡纏。

陳嘉寶、賴慰玲同陳凱琳係好姊妹,三人不時網上晒合照。

出發避忌

出發去荷蘭時,鄭嘉穎同陳凱琳要隔住黃又南同陳山聰至肯合照。又南看似搭住陳凱琳同陳山聰,不過佢只搭住陳山聰,其實冇掂到陳凱琳,應該係怕得罪鄭嘉穎。

黑面回港

回港時,為了避開傳媒,兩人前後腳出機場。冇女友陪,鄭嘉穎心情麻麻,面黑黑。

23歲的陳凱琳樣靚身材正,又是港姐及華姐冠軍,同視帝鄭嘉穎十分匹配。

潮流興騷肌,鄭嘉穎拍劇都唔例外。如果選圈中最好身材情侶,鄭嘉穎同陳凱琳冇得輸。

陳凱琳父母對乖女寸步不離,難怪陳凱琳一個去到荷蘭,至可以大解放。

姊妹解畫唔夾口供

最後問到 fans發現陳凱琳冇工開都幫嘉穎影花絮相,陳嘉寶即時幫好姊妹解畫︰「 Grace都有幫我影好多相呀,佢特登買咗部相機,好興奮周圍影!」

而另一女角賴慰玲亦幫陳凱琳狂兜,不過就同陳嘉寶唔夾口供。談到陳凱琳等鄭嘉穎收工,她說︰「佢都會等我哋收工,因為 Grace嘅戲份大部分同我哋,嘉穎就日日開工, Grace唔使開工多數同我哋一齊出去玩。(但陳嘉寶就話你哋唔多戲份,所以陳凱琳好少同你哋食飯喎!)哎……係有啲有……有啲無!如果我哋要開工,佢(陳凱琳)唔使開工,我哋唔會問佢去邊㗎嘛。」

陳凱琳人緣好,除了識冧姊妹,對男人更有一手。剛入行時,她已經十分有男人緣,加上她玩得又鬼妹性格,對人十分熱情,每每同男仔玩到攬頭攬頸兼大叫「老公」、「 Honey」,搞到唔少男人暈晒大浪。不過據知她自從與嘉穎發展戀情,便即時收斂熱情個性,與異性保持距離。難得玉女肯為一棵長青樹放棄成個森林,難怪情場老手鄭嘉穎都被她俘虜。

賴慰玲漏口風

另一同劇演員賴慰玲一直都直認陳凱琳係自己一間房。佢仲話:「 Grace好深閨,佢好鍾意返房!」

陳嘉寶幫隱瞞

問到同劇的陳嘉寶,為甚麼陳凱琳有單人房,她解釋話:「女仔嘅人數係單數,有人凸咗出來。」但又冇解釋點解係陳凱琳有單人房囉!

專愛嗲精

鄭嘉穎一向緋聞多籮籮,但回顧鄭嘉穎覓食歷史,一班女友都有一個共通點,就是嗲功了得。

周麗淇

周麗淇於 06年拍《天幕下的戀人》與鄭嘉穎撻着,兩人被發現於女友香閨過夜。一向嗲聲嗲氣的周麗淇,亦曾多次當眾大讚男友。

佘詩曼

08年,鄭嘉穎瞞住周麗淇,搭上一同拍《法證先鋒 II》的阿佘。姣佘放生電兼送上門,成功生擒鄭嘉穎,令周麗淇敗走。

徐靖雯

國產名模徐靖雯, 2010年曾摸上鄭嘉穎大坑寓所玩足 72小時。徐靖雯受訪時自認冧爆鄭嘉穎,當眾發放嗲功。

父女戀嫩妻話事

圈中不乏男大女二十歲以上的父女戀,為了令嫩妻放心,老公多數對妻子百般遷就。

梁繼璋 大 21年

99年與樹仁校花莊嬿藍結婚,並將財產大權給予妻子。在莊嬿藍建議下,兩人又開設「香港兒童演藝工作坊」,主打小朋友教育。

劉家良 大 30年

與前妻離婚後,劉家良 84年再娶翁靜晶。婚後兩人婦唱夫隨,後來劉家良患癌,翁靜晶更成為家庭支柱。

吳啟華 大 21年

07年,吳啟華與內地演員石洋子結婚,並育有一女。兩人去年離婚,為了取得女兒撫養權,吳啟華要付予石洋子一大筆分手費,但最近又傳復合。

鍾意就快D Share啦!