全城熱爆的娛樂八封新聞 & 時事趣聞 & 生活 + 趣聞
朱慧珊（右）同張家瑩（左）開完會，都係話做埋手上工作，等滿約再算。
黃 Sir喺《無間道》都係呃陳永仁 3年又 3年啫！但係亞視執行董事葉家寶次次出親嚟都係嗰句：「好多投資者對亞視有興趣。」媽咪姐聽到都識背喇！
葉家寶話好多投資者傾緊，已經講咗幾個月，呢日佢又話遺憾仲未簽約。佢仲話亞視玩到出年 4月 1日，仲有好多發展空間，或者用其他身份申請免費牌照再開台喎！
周三（ 6日），亞視喺大埔總台又開員工大會，葉家寶又係用無限 loop話有投資者傾緊收購， 4月嘅糧「如無意外」有得出，但又補充公司發展未明朗，員工自己決定去留。戴晒頭盔喎！作為鎮台之寶嘅朱慧珊開完會同媽咪姐講：「有人買係好事，但買唔買都要有個決定，再拖對員工同公司都唔公平，我想了解下新買家嘅方向，再諗自己想點。」連一向維穩嘅珊姐都開始有啲不滿喇！最慘都係班又俾人拖糧嘅亞視員工囉。
