張松枝奸仔原來係慈父？ [忽然1周 - 1034] 張松枝,MW,

媽咪姐

張松枝奸仔原來係慈父？

媽咪姐喺度又要再教大家一次人生道理嘞。人，真係唔可以睇表面㗎！呢日，媽咪姐去咗行又一城嘆吓冷氣，迎面見到以前喺大台做惡少做到出晒名、後尾過咗港視嘅張松枝，但你估吓佢喺度做乜？揀緊兒童英文書呀！轉個頭，又一支箭咁衝去超級市場買餸，完全係好爸爸 feel。

媽咪姐忍唔住行上去同佢傾咗幾句，佢話：「之前拍完一套大陸劇，依家都係做吓電影宣傳啫。見得閒咪落嚟買餸買書俾個仔囉！（囝囝幾大嘞？）讀緊 K3啫。佢好鍾意睇書，叻過我好多囉。（港視嗰邊點？）完約成年嘞！依家都係接大陸劇、香港電影，我自己都想拍番香港嘅電視劇。（返大台拍？）唔會嘞，佢哋唔需要我㗎！希望去其他台闖吓。」都啱嘅，做人最緊要有得揀，仔細老婆嫩，慈父加油呀！

張松枝喺新片《壹獄壹世界》同黃光亮、盧惠光等做「十二惡人」，現實中竟然係落超市買菜嘅住家男人喎！

張松枝喺 Page One揀咗好耐英文童書，後尾問番先知佢個囝囝攞過英詩朗誦冠軍，明晒！

去買牛扒，阿姐𥄫到張生實一實，慈父有 market呢。「我個仔好衰，淨係鍾意食貴價牛扒。」口就鬧，其實錫到燶呢。

張松枝同知名化妝師 Mae Von結婚多年，佢話好多謝太太一直支持自己。

鍾意就快D Share啦！

下一篇 》