溫碧霞擲千萬 買東京筍盤豪宅
近年在內地賺人仔賺到手軟的溫碧霞，原來投資磚頭都有一手，成為圈中隱形小富婆。眼光獨到的她近日更殺到日本，豪擲一千萬港元購入位於日本東京最高級豪宅區六本木的一間頂層複式單位，放租等賺！
英皇電影藝人溫碧霞（Irene）近年在內地非常吃香，更成為內地廣告商及商演的寵兒，人仔賺不停，近年吸金近億元，愛投資的Irene把辛苦賺來的人仔化為「磚頭」。投資經驗已有25年的Irene，與同公司的任達華均是投資物業專家，她更在約三年前衝出香港，於峇里島買地起屋。
買樓買上癮，Irene早前到東京旅遊時，也有順道了解當地的樓市情況，碰巧有朋友介紹她到位於東京最高級的豪宅區六本木，睇一個面積1,500呎、位於頂樓的雙層複式兩房兩廳Penthouse。本來只是順道「望吓」，怎料一去到該單位，Irene已愛不釋手，幾經考慮下，終於決定斥資1千萬港元買下。換言之，Irene三年內在峇里島、香港及日本，已豪花近5千萬港元置業。
每月放租5萬
本報記者透過長途電話聯絡身在外地的Irene，她開心認買到筍盤：「個樓盤本身要2千幾萬，大地震之後平咗好多，依家我1千萬買到，真係好抵。而且日圓依家咁低，都想趁低吸納。依家間屋暫時放租先，每個月都有成5萬租金收入。」
Irene直言睇中該地區夠安全、有升值潛力、風景好之餘環境又寧靜：「間屋風景好開揚，四面都係窗。」不過最麻煩是Irene未能於東京開戶口收租：「暫時會透過地產經紀收租，遲啲想去嗰邊學吓畫畫先考慮收番嚟自住。」除了亞洲區，她亦想邁向「國際磚頭」：「一直都有留意！只要質素高啱我心水，都唔排除會買歐美地方嘅物業。」愛子心切的她亦一心計劃將各地磚頭都留給囝囝。
3年接65廣告
憑經典劇集《火玫瑰》「海潮」一角深入民心的Irene，坦言因「海潮」帶挈，內地商演廣告未停過，賺到豬籠入水。加上近年內地電視逐漸開放，二、三線的細城市都頻頻重播《火玫瑰》，她的身價亦水漲船高，片酬加幅達50%之餘，3年內合共接了超過65個廣告，廣告價更由去年暴升至80萬人仔。除了被封廣告女王，她亦是商演女王。Irene平均每兩星期要飛兩次，商演價平均每次40萬。如此搶手，難怪近年收入逾億。Irene近年開始投資電影，以7位數字開拍《愛在深秋》，電影已進入後期製作階段，預計今年內上映。
文：專案組
|
鍾意就快D Share啦！
|
|
|