魏駿傑傳離婚 叫嫩妻檢點
不少男藝人愛娶內地嫩妻，但未必人人婚姻如意，繼吳啟華跟嫩妻去年離婚後，47歲的魏駿傑跟年輕20載的內地太太張利華，傳出因為前港隊單車手鄧宏業介入而令婚姻亮紅燈，兩公婆日前還被拍得在街上吵大鑊，正醞釀離婚。昨日魏駿傑在西貢湊女逛街，手上不見戴上婚戒，承認婚姻有問題，魏駿傑坦言已叫嫩妻檢點，並笑謂：「香港狗仔隊神通廣大，你開房死梗㗎！」
近年主力接內地商演的魏駿傑，2008年跟年輕20載的重慶嫩妻張利華閃婚後，誕下囡囡Jessica，一家三口經常被拍得逛街享天倫，好不溫馨。不過，早前張利華被傳媒發現撇低老公囡囡跟前港隊單車手鄧宏業食飯約會，男方為張利華又挽手袋又攬腰，態度親暱，魏駿傑與太太婚姻因而被傳亮起紅燈。日前更有雜誌拍得魏駿傑與張利華街上手指指嗌交，二人鬧足10分鐘，懷疑因為鄧宏業事件引起，而報道更指魏駿傑因為火遮眼而嚷着要跟老婆離婚。
【孤獨抱女】
■盛傳跟嫩妻張利華離婚的魏駿傑，昨日在西貢抱囡囡逛街，太太未有同行。
「要注意行為舉止」
記者昨日致電魏駿傑了解，對於嗌交及感情出現問題，他說：「嗌交兩公婆個個都有，好正常，邊個冇嗌霎？問題係兩個都應該顧及家庭，個女咁細個，個女最重要，基於呢個大前提之下，有乜都可以解決，其實又唔係去到離婚，大家都好錫個女，感情事可能真係老生常談7年之癢，我哋啱啱過咗7年，但問題係維繫方面，唔係乜嘢第三者。」是否因為太太跟鄧宏業傳緋聞而令感情有變？魏駿傑說：「唔係，睇番啲相，其實又冇乜特別，如果有發生嗰啲事，都俾人影到香港狗仔隊神通廣大，你開房死梗㗎！我選擇相信太太，可能會同佢講，要知道你丈夫喺香港雖然冇拍嘢，都係知名人士，你出到去好多人都知，要注意番自己行為舉止。」
問甚麼原因導致感情出問題？魏駿傑說：「大家太錫個女，個focus擺咗喺個女度，我少做咗浪漫嘅嘢，雖然我都幾浪漫，但我都會檢討，兩公婆一路話對方唔啱，大家咪越行越遠？其實我有做，每年2月14日（情人節）我會喺屋企煮心形牛排，朝早去攞玫瑰花，我諗可能仲未夠，兩間屋都係寫佢名，作為男人我應該檢討吓自己，再畀多啲。」魏駿傑否認要跟太太離婚，強調太太也想維繫婚姻。
【慈父上身】
■Jessica要買毛毛公仔，愛女如命的魏駿傑又豈會拒絕？
【冇戴婚戒】
■魏駿傑左手沒有戴上婚戒，未知是身形發福戴不下還是另有內情。
【婚姻危機】
■魏駿傑昨直認跟年輕20載的重慶嫩妻張利華現感情問題。
資料圖片
左手未見戴婚戒
魏駿傑昨日下午時分，偕5歲大的囡囡跟男友人到西貢茶敍，左手未見戴婚戒，他與囡囡逗留了一會後便離開逛街，買了個毛毛公仔𠱁女。記者上前問及其太太時，他指太太在家，再問手指指跟太太鬧交是否與鄧宏業有關？魏駿傑說：「唔係，其實我講嘢習慣同佢唔係好好，兩個都指手劃腳，動作特別多。」有否跟太太了解件事？魏駿傑說：「了解過，開始我都有個疑問，但我太太話佢手袋裝啲嘢太重，對方咪幫手攞，呢個解釋我都接受到。」太太會否避嫌減少跟對方見面？魏駿傑說：「應該有，嗰位男士應該有個拍咗拖半年嘅女朋友，大家都要避嫌啦，我太太因為我都變咗知名人士，日日都要避忌少少囉。」
採訪、攝影：魯吉、徐錦池、潘冠恩
【疑似小三】
■前港隊單車手鄧宏業近日被傳介入魏駿傑與張利華婚姻。
資料圖片
|
鍾意就快D Share啦！
|
|
|