真人騷
49歲天然呆 「方敏」楊羚：從來冇諗過做花旦！
神劇之所以是神劇，因為韋家輝總知道怎樣拍才會讓觀眾乸住乸住揼晒心。
所以《馬場大亨》尹揚明四個女，唔係死一個，一死就要死晒四個；所以《大時代》裡被人強姦染性病的，唔係藍潔瑛同李麗珍，一定要係最 true最 pure的楊羚。
是的，一想起廿年前活躍緊的楊羚，我就想到廿年後才通用的形容詞：
又 true又 pure。
見到楊羚，雖然已經 49歲，又已是一仔一女之母，但何謂 true何謂 pure，竟然仲係活靈活現：
說到復出拍照，佢扁晒嘴：「有時貪方便自己化妝，咪化到鬼咁肥囉，個個打嚟問我係唔係日日食同瞓！」講到天然呆如何防備偷呃拐騙，佢嗰套似足初中生：「又唔識你，做咩同我講咁多嘢？我實掉頭走㗎！」
形容自己記憶短暫似條金魚，佢會好似小女生一樣，伸直手指拱在兩邊嘴角扮小喇叭：
「我啲朋友都話我似條空心菜，中間乜都冇，開心唔開心都好快唔記得！」
第二個做極都係妹妹仔實一肚怨氣，係佢樂於永遠大唔透：「呢個世界冇一樣嘢可以揸一世，所以爭嚟做乜？我從來冇諗過做花旦，開心就做，唔開心就走。」
我覺得最離奇，唔係呢啲小動作放喺 49歲楊羚身上依然協調真心 cute，而係明明身處於同一個年代，楊羚口中嘅大台冇鬥爭冇黑幕個個係好人，而一個星期前訪問嘅邵仲衡則試過俾記者玩、被某君撬牆腳、被大台嫌唔聽話，呢啲係唔係叫平行時空？
只能嘆一句：你的記性如何，你的世界也必如何。
做阿妹多啲人錫
《大時代》咁 hit，有冇因此接咗新工作？
梗係冇！日日都做訪問，忙到九彩呀！雖然我以前都忙，但我以前係忙啲細路哥嘛！
其實你又唔志在又唔喺呢行，點解搞到自己咁辛苦？
我唔識拒絕人吖！人哋盛意拳拳打到嚟，又肯就我時間地點……咁做得呢間就唔好意思拒絕第二間㗎
性格咁唔識拒絕人，做呢行會唔會好蝕底？
ok㗎，我喺 TVB八年，從來都冇人蝦過我，再講我份人好冇記性，唔開心嘅嘢好快唔記得，開心嘅嘢都好快唔記得，只係記得咁多年都 ok吖。
話就話你係演藝世家（外公係劉克宣、舅父係劉志榮）出身，其實入行關唔關演藝世家事？
梗係唔關！我唔得朝九晚六㗎，想試下拍戲，試下啫，試下無妨，唔得咪走囉！
49歲個樣都咁 cute都幾好，但係做電視台長唔大嘅妹妹樣應該唔係好過癮？
細個嗰陣時真係咁諗，點解嘅？點解永遠都做學生妹嘅？《公私三文治》，我年紀大過曾華倩、梅小惠，又係做細妹……我拍戲連拖都冇拍過。我嗰陣時好瘦，但興又係興豐滿嗰隻，葉玉卿、李美鳳嗰啲，個個都話：「阿妹，乜你未發育㗎！」
明明大個女，個個叫你阿妹，咪好唔開心？
有咩唔開心？多啲人叫阿妹，咪多啲人錫我囉！我從來都冇諗過要做花旦，開心就做，唔開心就走，我真係好隨住自己嘅心。我記得當年入 TVB拍到第三、四套劇，我試過做得唔開心想要走。
點解嘅？
失戀囉！失戀大過天㗎啦，我已經開咗一日古裝，第二日就唔返工。公司打嚟我都照喊：「我失戀吖！我𠵱家淨係識得喊，乜戲都做唔到㗎！」成個電視台都知，我係喊包嚟㗎嘛！
雖然好唔負責任，但都冇人嬲得你落？
所以我好感恩囉，真係好多人錫我。咁啱身體又唔舒服，遞咗醫生紙，我一攞就攞咗半年假。之後醫番好，同男朋友又好番，我就冇晒事。
最羡慕人哋有爸爸
辭演係因為咩病？
醫生發現我生咗個纖維瘤，要割又食咗好耐藥。
廿零歲已經生瘤病成年，咁都唔算挫折？
有得醫又唔係惡性，我真係唔記得……唔係咁樣講一講醒起，我仲以為我當年係失戀所以辭拍。
所以你一世都冇遇過壞人？
都有嘅，但係我知佢壞就唔會群埋去啦嘛！有幾壞？邊個咁壞？……我唔記得喇！真係唔記得喇！我𠵱家人生回顧，真係冇一件事有咩咁嬲，過咗咁多年諗番轉頭，其實有咩咁大不了？我唔會話呢個行業真係好好，但佢又確實對我唔差，我啲朋友話出街試過俾觀眾鬧，連呢啲我都未試過……最多咪話我肥！
最大挫折係 6歲爸爸過身？
我自己都醒唔起喇，你又會幫我諗到嘅？我爸爸好肥，好多病，係突然間有一日心臟病爆血管死。我阿媽又後生，明明應該 call白車先，佢係打俾佢爸爸先……等到我阿公嚟到，乜都遲自此以後我就好羨慕啲有爸爸嘅人，揀朋友仔都要揀啲爸爸媽媽恩恩愛愛嘅，每個星期喺個朋友仔屋企起碼過三、四晚夜。
有關爸爸，你仲記得啲咩？
爸爸瘦過秦煌啲啲，成日抱我喺佢嘅肚腩度跳。以前爸爸喺廟街同人夾份開酒樓，我好記得佢會俾我騎膊馬，俾我高高在上咁行過成條廟街……爸爸死咗之後，我再冇得騎膊馬。爸爸又成日買雞脾俾我，三個阿哥淨係有得睇住我食。所以到阿爸瓜咗，我就知味道喇，佢哋成日蝦我搞我。爸爸好恨女，我雖然得三個阿哥，但我正式排第八，有啲流產有啲養唔大，爸爸追極都係想追個女，所以錫我錫得好出面。我太細個經歷呢啲，所以自我保護意識好強，最怕就係自己喺一個人身上投放太多，然後有一日會失去。
嬲咗阿媽十幾年
直到你遇到老公？
遇到老公都唔係投放晒所有嘢，到生咗仔女對仔女就會喇。我老公係朋友介紹我識，打麻雀打到熟，我哋打台灣牌，我仲記得我人生最大一鋪奇牌就係食我老公……但係幾多錢食咗乜嘢又唔記得喎。
有乜理由奇牌都唔記得？你呢啲係咪叫金魚記性？
係吖！啲人問我拍《大時代》有咩趣事，我連我仔女啲嘢都唔記得清楚，邊記得廿年前嘅事？我啲好朋友都話我係條通心菜，中間乜都冇。
自細爸爸去世，對你嘅影響係一世？
絕對係，我會知道一個齊齊整整嘅家並唔容易，同先生、同小朋友，我會盡能力維繫體諒做得更好。所有嘢，我都唔會強求，人個腦始終有一日會退化，再美好嘅嘢都有一日會唔記得，呢個世界冇一樣嘢你可以揸一世……呢一刻我有家庭，有兩個小朋友，好幸福，難保下一秒兩個小朋友會唔喺度……一啲都唔出奇，好彩佢哋𠵱家健健康康我會珍惜，但神要早一步接佢哋返天家，我都要接受。我喺呢個世界都係暫時咋嘛！
所以連帶事業，你都唔會爭、唔會強求？
羨慕邊個邊個好靚，我又冇喎！邊個邊個揸架跑車好勁？我又冇喎……我都想我塊面唔係咁圓，我都想我有個尖下巴，我都有嘢想，但唔代表我想就會得到，得唔到都唔使唔開心㗎？冇都冇相干，都可以開心囉！
既然你個人咁易話為，點解由六歲嬲媽咪一直嬲到出嚟做嘢？
細個唔識諗囉……爸爸走咗，剩番媽咪，我想佢俾晒我所有，但佢再拍拖，我接受唔到囉，成日頂心杉一樣，佢一去拍拖，我就會黑口黑面。出嚟做嘢後我先至明，媽咪都好慘、媽咪都需要一個人陪佢行埋人生下半條路。我都係大個之後，先至知道媽咪一個人湊大四個，真係為我哋付出好多。
|
鍾意就快D Share啦！
|
|
|
