掃呢頁CODE去手機

2015年5月20日 星期三

韓劇男神揀邊個? [FACE - 417] MF,



全知言

韓劇男神揀邊個?

睇咗男神金秀賢新劇《製作人》未呀?未知今次能否延續《星星》熱潮,不過韓劇男神點只得一個金秀賢呢?全知言今期就問咗一班藝人朋友,究竟大家嘅韓劇男神係邊個?答案各有不同,港產男神王宗堯就話會以鄭雨盛為目標,希望可以做到佢咁有男人味喎!

趙頌茹 愛妻車勝元

電視畫面

我都係一個煲劇嘅大媽,自己會鐘意比較成熟穩重,所以會揀《最佳愛情》嘅男主角車勝元。佢最大魅力就係對老婆好好, 18歲同老婆結婚,細個到𠵱家都仲係咁恩愛,生咗個小朋友,對個女又好好,好欣賞呢啲愛家又愛老婆嘅男人!

利嘉兒 成熟蘇志燮

我會鐘意成熟型,好似《主君的太陽》嘅蘇志燮,劇入面佢好 cool之外,有時候會好 cool叫你「躝開」,嘩,有型到呢!跟住就好低能咁上網 search佢啲資料,發覺佢原來對朋友都好好。佢以前有一個韓星朋友,後來過咗身,雖然當時好傷心,不過都有幫手處理身後事,我覺得除咗做戲好、有型、把聲磁性外,原來蘇志燮都係鐵漢柔情嘅男人。

電視畫面

連詩雅 得意都敏俊

我最鐘意係《來自星星的你》嘅都敏俊,因為覺得佢性格好 cool,但笑嘅時候就會好得意, cool cool哋嘅男仔會比較容易 draw到我 attention!至於自己揀男朋友就一半一半,太 cool會冇話題,如果真係要揀伴侶, cool啲外型嘅人可能會令我有興趣多啲!

王馨平 好戲金秀賢

我心目中嘅韓劇男神都係金秀賢。因為除咗有睇《星星》,之前喺《 3個特攻美少年》已經注意到佢,覺得佢做得好好,好老實、好天真嘅樣,但又做到間諜陰暗嘅一面,覺得可愛外表都有演技。佢嘅外形佔咗好大嘅優勢,笑起來會令到人嘅心溶化!

王宗堯 最 Man鄭雨盛

韓劇盛產男神,我最鐘意鄭雨盛。由佢同孫藝珍做嘅《我腦海中的橡皮擦》同《武士》已經好鐘意佢,記得有一年喺上海參加頒獎典禮,當時同佢一班機,我仲好似 fans咁埋去影相添!喺我心目中佢有小小類似韓國版嘅劉青雲,無論佢造型有幾咁「躝癱」,變番靚仔就會變得好 charm!好多韓國男星都係比較精緻,不過佢就相對有男人味,自己都希望可以做到咁!

街坊:趙寅成眼神好吸引

人人對男神嘅標準都唔同,一班街坊亦唔例外,有人就揀咗《沒關係,是愛情啊!》嘅趙寅成,原來男人嘅眼神,真係好重要㗎!

Monie

我最鐘意趙寅成,因為喺《那年冬天風在吹》同《沒關係,是愛情啊!》真係好吸引我!佢嘅眼神、高度好吸引我,拍埋女主角好好睇,畫面都好靚。

Look

我會揀金秀賢,因為佢啲戲做得好好,喊又喊得好逼真,男神要有感情呢樣嘢好緊要!自己就睇過《來自星星的你》同一套做北韓間諜嘅電影,佢個樣真係好 cute!

Rox

我會揀李鍾碩做男神,因為覺得佢好 cute,態度好認真。睇過佢嘅《 Pinocchio》,劇中佢同女主角朴信惠有衝突場面,最後佢仲揀咗同朴信惠一齊面對。

知無不言 言無不盡 我係全知言

鍾意就快D Share啦!