早前「小龍女」吳卓林經歷過報警、兩次離家出走，令媽咪吳綺莉不知所措，好在佢哋喺過程中，重新建立好關係，令母女感情更加深厚，今日有周刊表示，「小龍女」吳卓林(Etta)上周六去完瑞士遊學返港，兩母女就一齊返咗屋企，過咗兩日後，吳卓林接受周刊訪問指，首次開口講成龍，只係講同成龍係有血緣關係嘅父親，不過喺自己嘅成長過程中，佢並唔係佢嘅「爸爸」，認為養你嗰個先係重要。
問及有傳媒指自己想見生父成龍，卓林就話媽咪好尊重自己嘅意見，佢自己都冇諗想唔想見，但佢對呢個「話題」冇咩興趣，自己亦唔介意人哋叫佢「小龍女」，認為身邊朋友同老師都會叫佢「Etta」，其他人點叫唔會傷害到佢。講到早前報警一事，卓林話自有反省，不過冇後悔，承認喺事件上有疏忽，不過就令佢同媽咪嘅關係有新嘅開始，大家都改變咗，多咗溝通，唔會得個講字。
吳卓林喺訪問中，講到自己嘅童年，佢坦言有傷心嘅時候，細個見到其他同學有爸爸接佢放學，當時自己喜歡釣魚同踩單車，聽到啲同學口中講呢啲爸爸都會陪佢做，當時卓林都覺得傷心，不過佢自己冇嬲對方，亦都唔想見對方，對「爸爸」亦冇感覺，目前已經習慣咗冇爸爸嘅生活，佢覺得人係唔能夠選擇自己嘅父母，佢只慶幸有一個身兼父職嘅媽咪，畀佢雙倍嘅愛，佢都問過媽咪點解佢冇爸爸，聽完媽咪講之後，佢自己都覺得有媽咪就夠，冇需要爸爸，因為從小就冇爸爸，卓林亦好少同吳綺莉「I love you」，只會講「I care about you」卓林認為，「care」比「love」更加深層，希望媽咪生活得開心。
卓林在訪問時直言，當年因為「小龍女」嘅身份，曾被同學欺凌，細個時卓林試過有個朋友初時對佢好熱情，後嚟忽然恐嚇卓林身邊嘅朋友，叫同學唔好睬卓林，又偷卓林嘅嘢，拋卓林啲功課落地下，又試過踢同揼卓林，搞到卓林唔鍾意返學，試過同媽咪吳綺莉講呢件事，當時吳綺莉都叫卓林堅強啲。
據報道表示，童年受傷害嘅卓林變得性格內向，交朋友都特別小心，唔想太多人知道自己諗咩，覺得三個好友已經足夠，保持一個小圈子，未知係唔係活喺「小龍女」呢個陰影下，卓林本來大學想讀film production都要「打退堂鼓」，怕大家會亂諗，卓林稱由細到大，佢都鍾意電影，但又驚人哋講老竇同阿媽都係演員，覺得佢係靠人事關係，呢啲其實係個人興趣，對於鍾意電影嘅卓林，被問有冇睇過老竇嘅戲，佢就話唔識佢，唔會批評佢，因為自己嘅生命中冇呢個人，喺電視見到佢只係個陌生人，唔會講「我老竇呀」，只會講Jackie Chan係一個演員。
|
鍾意就快D Share啦！
|
|
|
