未婚夫偷食報導出街當日，眼濕濕回應嘅朱慧敏事隔三日態度大逆轉，表示對 Eddie依然信任。
封面
偷食長腿 G.E.M. Eddie發誓戒蒲戒酒 朱慧敏受氹：除非捉姦在床
人類總要重覆犯錯，尤其是男人。
偷食唔出奇，奇就奇在女人話咁易就氹得番？繼周慧敏、李心潔、鍾舒漫後，最新「愛是原諒和寬恕」嘅有朱慧敏。
拍拖三年，夜蒲攬女唔係第一次，今次買晒金器揀埋裙褂，臨結婚先嚟偷會「長腿 G.E.M.」，殊不知斷正唔夠一個星期， 34歲朱慧敏又忽然心軟：「夜蒲不等於出軌，除非給我捉奸（姦）在床，否則我對他依然信任！」睇個勢今次唔只「袋住先」。有個咁好嘅女朋友，向住本刊鏡頭發埋誓戒酒戒蒲嘅 Eddie，好心以後真係要生性喇！
港女盲撐到底可以去得幾盡？二月至宣布向朱慧敏求婚成功， 36歲 Eddie三個月唔夠就被發現掉低未婚妻，夜蒲完仲有下文，拖實戰鬥格索女。又拖又攬上埋樓，種種疑點下，朱慧敏第一個反應最合理，帶住淚光話要延遲婚期。不過心腸硬唔夠一星期，週一（ 18日）再回應《 FACE》，態度已經 180度軟化，點解？
口技了得
拍拖三年未戒過蒲，攬女坐大髀都被人影過幾次，次次拆得掂都係靠把口，今次亦不例外。報導出街當日， Eddie表面對外發出道歉聲明，死撐無偷食之餘，句句都係向女友隔空發功：「姑勿論每次報導是否完全是事實全部，我實在忽略了從她角度出發，忽略了要保護她的部分。」
對外認完衰，對內 Eddie連日啟動短訊道歉模式，三兩日已經成功扭轉局勢。 Eddie把口有幾叻，知情人士引述實例，話說二人籌備婚事揀裙褂， Queenie試上身第一套， Eddie已經話收貨， Queenie嫌 Eddie求其，有人即兜：「你以為我鍾意套衫？我係鍾意你個人，無論你着乜都好，我淨係想即刻娶你返屋企咋！」咁講，係女都冧
WhatsApp回覆： Eddie是一個好人，相信他！
連續三日被 Eddie短訊加人肉求情後，朱慧敏再次心軟，回覆本刊透露心聲。
做生意多女埋身
不過， Eddie都有為婚事努力，心知經濟能力未夠，在演藝事業又未有突破，拉埋女友投資華星冰室，只可惜做生意，令 Eddie有更多藉口應酬，又真係多咗女性埋身。
真的好假的好，最嬲係每次「出事」， Queenie都變監護人對外拆招，相反當女朋友有需要時，男方就次次唔見人。
據悉，偷嗒「長腿 G.E.M.」前一個月， Eddie已向 Queenie報定案，未婚夫妻因此冇見成個月，一來 Queenie入股冰室後兩人磨擦漸增、二來 Queenie因為跟無綫續約問題而煩惱，再加埋偷食風波， Queenie本來立定決心作個了斷，但因為一個「信」字，決定只把婚禮延期。
而連日來的新聞，亦驚動 Queenie身在美國的家人；本週一（ 18日）， Queenie回覆《 FACE》表示除非捉姦在床，否則都願意相信 Eddie，順便亦安撫遠方的家人。
喜愛夜蒲
俗語有云一次不忠、百次不用，話到明一次吖嘛！如果十次八次不忠，咁又唔同計法。其實拍拖三年， Eddie彭懷安未停過蒲，蒲親就實有女埋身，「長腿 G.E.M.」算係乜？更戰鬥格嘅佢都攬過唔少。
未同朱慧敏行埋時， Eddie試過拖長腿妹夜蒲，正式拍拖後，又斷正俾低胸𡃁模仙樂都挨住行。咁啱嘅？嗰次又係話送人返屋企喎！仙樂都對本刊說：「我哋之間好少提佢女朋友……希望佢哋可以開花結果！」
Eddie：冇做過越軌行為
本來對外多句說話都唔肯講，但知道今次玩大咗，週日（ 17日） Eddie見到《 FACE》即刻暢所欲言，更拍片向 Queenie發誓：「我哋有溝通過，要重申我同佢（長腿 G.E.M.）冇做過一啲越軌嘅行為， Queenie由始至終係相信我，不過喺籌備婚禮上需要時間磨合。我哋冇聯絡呢一個月，大家都有搵方法冷靜，佢去行山拜神，我就去吸收下啲正能量。我相信之後 ok嘅，我唔開心都會借酒消愁，又因為飲酒俾人影過幾次，雖則冇越軌，但對大家都唔係咁好，我相信以後嘅日子，除咗應酬要去飲酒，我唔會飲酒，令到身邊錫我嘅人可以放心。」
戒煙、戒酒、戒蒲都好，但最緊要都係戒色。難得女友肯畀機會，自己醒定喇！
Eddie冇樓揸手
月供 2萬私樓倒貼
朱慧敏於 13年以 490萬購入清水灣半島單位，現市值 560萬，原來是準備和 Eddie結婚後入住。
男卑女尊
|
鍾意就快D Share啦！
|
|
|