本月 2日，記者發現張衞健陪母到養和睇醫生。其間他緊搭母親肩膀，進入李樹芬樓心臟科（圖）。對記者回應表示：「冇事！」
娛樂喧
留港暫停接劇 張衞健陪母養和覆診
張衞健乃圈中公認的孝順仔，多年來侍母至孝，一個養全家。前年張媽媽余嘉碧游泳遇溺一度昏迷，幸好最終搶救成功。雖然逃過一劫，但據知年事已高的張媽媽心臟機能需長期觀察，故要定期到養和醫院檢查。
張衞健為了方便母親返醫院覆診，去年便一擲 4千萬，在距離醫院僅 5分鐘車程的跑馬地雲暉大廈購入一個近二千呎單位。而北上拍劇賺人仔多年的他，自去年開始亦只接商演，其餘時間便與老婆張茜一同留港照顧母親，做足 100分。
13歲時被父親拋妻棄子的張衞健， 17歲便孭起頭家，輟學打工供養媽媽及兩弟張衞彝及張衞基。就算年前張衞彝公開力數哥哥拖欠自己替對方任經理人時的約 1600萬佣金，兩兄弟因財反目，但張媽媽依然企硬張衞健一邊，發聲明力撐長子「過去數十年對家人均盡孝盡義，絕無虧欠身邊人」，可見張衞健兩母子關係甚好。
秘道離開醫院
前年張媽媽在尖沙嘴香港洲際酒店游泳遇溺危殆，在內地開工的張衞健夫婦連夜趕返港，更出動老友蘇永康代陪留院母親，幸最後逃過一劫。不過據知一直體魄健康，說話聲如洪鐘的張母，自那一次意外後身體機能下滑，需要定期檢查心臟。上周二（ 2日）早上約 11時，本刊發現張衞健偕瘦了一圈的張母到養和醫院李樹芬樓心臟科覆診。其間記者向張衞健問及母親身體狀況，他只笑笑口說：「冇事，有心，睇醫生啫！」然後便匆匆搭着母親膊頭上樓。他們離去時則刻意走秘道成功避過記者。
據知張衞健為方便母親往返醫院，去年 4月更一擲$4,085萬，在距離養和僅 5分鐘車程的雲地利道雲暉大廈購入一個高層單位，着母親搬到該單位好好保養身子。
據一知情人說：「你知老人家昏迷過，真係會虛弱好多。以前 auntie唔單止鍾意游水，游乾水都鍾意，閒閒哋一次打 8個東，不過依家怕心臟負荷唔到，打少咗好多，仲要一年見醫生 check幾次。不過好彩佢對游水都冇心理陰影，依家會慢慢游，有時健仔仲會陪阿媽一齊去屋苑泳池游水。」
標尾會造人
近年一直北上拍劇賺人仔的張衞健，為了多陪母親，自去年開始便減產。因拍劇動輒幾個月較困身，故他暫時改接工時短又可賺快錢的商演活動。他對上一次拍內地劇已是去年的《神醫傳奇》，但也只屬客串性質。其餘時間可留港陪媽媽之餘，又可以陪伴老婆張茜。
「 Dicky（張衞健）話依家最想享受生活同陪屋企人，賺錢真係其次。其實佢近呢十年八年都買咗幾個物業，喺國內都有，仲使乜咁搏吖。早年佢老婆又小產過，大家都一度心情低落，好不容易至重拾心情。張茜依家都係 41歲，仲有機會標尾會，所以 Dicky更加唔想掛住做嘢搵錢囉！」知情者說。
張衞健有膊頭有承擔，盡力照顧一家，果然是個孝順仔兼好老公。
|
鍾意就快D Share啦！
|
|
|